Kwidzulitsa 32 - KITABU KITAKATIFU

Lwimbu lwa Musa

¹ “Ligulu ni Lirova, huliri amakuva gange muhulirizi vulahi agambooraa.

² Amigizu gange galakuba kuli zingelegeliza ziembula kandi limoloma liange litonyatonye ku lirova kuli lime, Makuva gange galaaza kuli lunyilira ku vitagwa vidoto, kuli ulunyilira ku uvunyasi vodotodoto.

³ Ndizominya lieta lia Yahova kandi avandu veve valivoola ago ovonene vwivwe.

⁴ “Yahova aveeye mukingi munene winyu, muduukiru kandi mulungi mu zinzira zizie ziosi. Nyasaye winyu aveeye musuuvirifu kandi wagiligali; akolaa agaveeye malungi kandi amalahi ku vandu vosi.

⁵ Navuzwa munyi simuveeye avasuuvirifu mba kandi simuduukani kulangwa avandu veve mba, ihiiri yuvwoni kandi yuvugaadi.

⁶ Ni ndi munyala kokolera Yahova munyi avandu vasiru kandi vataveeye novogeri! Aveeye Baba winyu, mulombi winyu yalomba munyi muve ihiiri.

⁷ “Muganagane ku agaavita, agizing'inga zia kale ligali, muganagane mihiga ja makura manyingi muteeve avababa vinyu vamuvolere ageekoleka. muteeve avasaakulu vinyu vamuvolere gi zing'inga zia kale.

⁸ Oveeye Igulu Ligali kuvita yahaana zihiiri milimi jaavo. Yavukanyia avandu vosi, yavavikira zinzako ziavo kolondekana nilivaliza lia avandu va Isiraeli.

⁹ Kidieli cha Yahova keveeye avandu veve visukululwi via Yakobo viveeye miandu jije.

¹⁰ “Yavanyoola nivagendagendaa mu changalangwe, mwigendanyama mwe kesoma kenene ni mbuuza yavakinga kandi yavalinda, kuli anyala kukinga endolero yemoni yeeye.

¹¹ Kuli kihungu chigizaa avana vacho kuburuka, kivagumilira vulahi kuzimbaha ziacho nizivambuki, nindio Yahova yalinda vandu va Isiraeli vavuli kugwa.

¹² Yahova yeng'ine yimilira avandu veve vugira ovokonyi vwu munyasaye mugeni.

¹³ “Yavaleka vamiihi vivala vievigulu, kandi valia iviamo viu mu milimi. Vanyoola uvwuki vwu mbulimu kutura hagati hi zinyanda; kandi misaala ja mizeituni jakola vulahi mu malova gamagina.

¹⁴ Yavaha isiagi, maguta namaveere kutura ku mitugu jaavo; zing'ombe ni zimburi ziavo ziahaana maveere manyingi. Vaali na magondi mamigu zimburi, nizing'ombe zindahi ligali kandi, viayo vie mitugu ja Bashani. Ingano indahi ligali kandi vanwa iwaini imbia.

¹⁵ “Avandu va Yahova vaagwa avatugi, navuzwa avibaali. Vakomera kandi vaali ni viukulia vinyingi. Valeka Nyasaye wavo uwavalomba, kandi nivasuula muhonyi wavo wi zinguru.

¹⁶ Lisigamira vanyasaye vandi liakendekiza Yahova, vudamanu vwavo vwakola Nyasaye kuva nu vutima.

¹⁷ Vahaana visiuviliru ku vanyasaye vitali vigiligali; ku avanyasaye vageni va avaguuga vaavo vavura kumanya, avanyasaye va Isiraeli vavura kolonda malago gaavo.

¹⁸ Vivilira Nyasaye wavo, muhonyi wi zinguru wavo. Uwavaha livamwoyo.

¹⁹ “Lwa Yahova yalora yaga, yavihilirwa kandi yasura vakana na vayaayi veve.

²⁰ Yavoola, ‘Sindavakonya kandi mba’ kandi ndalora ichaaza chekoleke kuvo kigira vaveeye likula lie kirage, kandi sivaveeye vasuuvirifu mba.

²¹ Harara nifananyi viavo, vamali kongola mbe nu vutima, vamali kungola kokendekela vanyasaye vaavo vanyasaye vataveeye vagiligali kunangwa, ndatumikira ihiiri kuvakola vave nu vutima, Ndavakora vandekele ihiiri yavandu vasiru.

²² Vutima vwange vuladuuka kuvo kuli muliru kandi vulasaamba vindu viosi ku lirova. Vuladuuka isi wikivala vakuzu nu kuhakiza misingi ji vigulu.

²³ “ ‘Ndaleta amaduywa gataveeye nekeheri kuvo.

²⁴ Valakuza kigira inzara kandi luhuuza. Valakuza kigira zinguzu ziu kutihiza. Ndatuma zinyama zinduru ziu mumulitu kuvingilira kandi zinzoka ziu vusungu vululu kuvaluma.

²⁵ Liihi lilaleeta likuza mu zinzira; litihiza linene lilavingilira mu zinyumba. Avayaayi na vakana valakuza; avana vadoto anaho avasaakulu sivalalekwa mwoyo mba.

²⁶ Ndakavadivizi ligali, kunangwa avuli kuva ho nu uvizuliza.

²⁷ Navuzwa sindakaleke avasigu vaavo vigingiri, ndi vamali kuguuta avandu vange, lwa yaali ninzi Yahova mwene umali kuvasionolanyia.’

²⁸ “Isiraeli vaveeye ihiiri itaveeye niziganagani kandi sivaveeye novogeri kali hakuzu mba.

²⁹ Valava novogeri, ngano vakamanyirizi yaga, vakamanyirizi keheri chavo kilava ndi!

³⁰ Mundu mulala anyala ndi kuguuta avandu elefu ndala? Anoho avandu vaviri vanyara ndi kuguuta avandu zielefu likomi? Yahova Nyasaye wavo umali kuvaleka; Nyasaye wi zinguru wavo umali kuvaleka.

³¹ Avasigu vaavo vamanya ndi, avanyasaye vaavo aveene vaveeye avadedekere sivaveeye ni zinguru kuli Nyasaye wa Isiraeli mba.

³² Kigira mizabibu jaavo jiveeye visivu via Sodoma; kandi kutura mu milimi ja Gomora. Mazabibu gajo gaveeye mazabibu guvusungu visaganyi viacho viveeye vilulu.

³³ Iwaini yaavo eveeye kuli vusungu vwenzoka, voveeye vusungu vululu vwitaa kuli vwikihirigoma.

³⁴ “Yahova yizuliza cha vasigu vaavo vamali kokora alindiliraa ing'inga indahi yukuvaha mageri,

³⁵ Ing'inga yiza lwa valiguutwa, ing'inga yi lidivizwa liavo eveeye ahimbi. Lidiku lie lidivizwa liavo leveeye ahimbi.

³⁶ Yahova alakakaragiri avandu veve. Alavererera avatumikiri veve lwa lilola zinguru ziavo nizigehaa, kandi sihavaho nu mundu ulitigala mba, muhambe anoho muvoholore.

³⁷ Maku Yahova alakateeve avandu veve, ‘Vaveeye haliha avanyasaye vizingulu yavo va mwasuuvira?’

³⁸ Mwavalihiza zitinya zie visiuviliru vienyu, kandi nimuvaha iwaini vanwi? Leki vaze, vamukonye kalunu! Leki vanyaguli zimbiru kumukonya.

³⁹ “ ‘Inzi, kandi Inzi wengine mbeeye Nyasaye; sihaveeyeho numunyasaye wundi oveeye wiligali mba. Nzitaa, kandi mbana livamwoyo, Nzataa ologoma kandi mbonyia, na sihaveeyeho numundu unyala kuhing'ana ku icha ngolaa mba.

⁴⁰ Kuli ligali inzi mbeeye Nyasaye oveeye mwoyo mihiga ni mihiga ng'ingaa mukono gwange yigulu kandi nzisuha,

⁴¹ ndi ndahiagala kivavi change kehemahemaa, nokolola ndi uvulungi vokoleywe. Ndavanza kisaalia ku avasigu vange. Kandi mbane amageri ku yavo avandunyira.

⁴² Imivano jange juvuta jilatonyatonya amasahi gaavo, kandi kivavi change kilaviita vosi avahing'anaa niinzi Sindaleka mundu kali mulala kuva mwoyo ulwaana niinzi; kali vandu avizing'oma na vahambe valakuza!’

⁴³ “Zihiiri, kuduuka mwizominye avandu va Yahova ahaanaa mageri ku yavo vosi avaviita. Avanzaa kisaalia ku avasigu veve kandi asamiiha uvwoni vwa avandu veve.”

⁴⁴ Musa na Joshua mwana wa Nuni vimba lwimbu yilu, kunangwa avandu va Isiraeli vaduuki kuluhulira.

Amigizu ga Musa gukumaliriza

⁴⁵ Lwa Musa yaali niyakamara kuhaana amigizu ga Nyasaye yamuha ku avandu va Isiraeli,

⁴⁶ yavoola, “Muve na giligali kuhulira amalago yaga goosi aga inzi mali kumuha kalunu. Mwirane kwigiza avana kunangwa vaduuki kolonde amalago yaga goosi aga inzi mali kumuha kalunu mwigizaa avana vinyu malago yaga kunangwa vaduuki kolonda amigizu goosi ga Nyasaye nu vusuuvirifu vwosi.

⁴⁷ Amigizu yaga goosi sigaveeye agavuzwa mba; navuzwa gaveeye livamwoyo lienyu liene. Mugalonde na mulamenya madiku manyingi mu kivala engereka wumugera gwa Jorodani icha muveeye ahimbi kukivugula.”

⁴⁸ Lidiku liene yilio Yahova yavolera Musa,

⁴⁹ “Zia ku vigulu via Abarimu mu kivala cha Moabu, kolovega lundi lwi lidaala linene lia Jeriko; niina ku Kiguru cha Nebo kandi ohenze ku kivala cha Kanaani icha mbeeye ahimbi kuhaana ku avandu va Isiraeli.

⁵⁰ Ulakuzira ku kiguru yicho kuli amwavo woovo Haruni yakuzira ku kiguru cha Hori muviri gwigwe gwayavilwa kuli avaguuga veve.

⁵¹ Kigira vombi simwali avasuuvirifu ku inzi imbiri wa avandu va Isiraeli. Lwa mwaali ha Kidaho cha mazi ga Meriba ha Kadeshi, mu changalangwe cha Zini, munyi simwahaana ku inzi luyali imbiri wa avandu mba.

⁵² Ulalola kivala zana kutura ihale vuswa, navuzwa siulazia kwingira mu kivala yicho, icha mbezaa avandu va Isiraeli mba.”