Kwidzulitsa 30 - KITABU KITAKATIFU

Ligasizwa inyima wu kwirana ku Yahova

¹ “Mali kumuha mutovola hagati hi ligasizwa ni kilaamo. Lwi vindu yivi viosi vimali kokoleka ku munyi, kandi mumenyi hagati hi zihiiri zia Yahova Nyasaye winyu umali kumusalanyia, mwilizulizi litovola lia ndamuha.

² Niiva munyi harara ni visikululwi vienyu, mulirana ku Yahova, kandi muhuliri malago geege nu mioyo jinyu josi agamuhezaa kalunu,

³ maku Yahova, Nyasaye winyu alava ni zimbavasi ni munyi. Alamwiranyia kutura mu zihiiri uwa yaali namali kumusalanyia kandi alamukola muve ni limeedeka.

⁴ Kali niiva mwasalanywa ihale ligali kuduuka ku keheri chi zikona zie lirova, Yahova Nyasaye winyu alamuvungiza harara kandi alamwilanyia,

⁵ kunangwa muduuki kuvugura kivala cha avaguuga vinyu vamenya mu maziambiri. Kandi alamukola muve vanyingi ligali kuvita avaguuga vinyu.

⁶ Yahova Nyasaye winyu alamuha mioyo jukuhulira nukwegehiza harara ni visukululwi vienyu, kunangwa muduuki kumuyaanza nimioyo jinyu josi, na roho jinyu josi kandi mulazizagilira komenya mu kivala yicho.

⁷ Yahova Nyasaye winyu alagirung'anyia vilaamo yivi viosi aviviiki ku avasigu vinyu, kandi yavo avamudunyira nokumudambiza.

⁸ Na munyi mulirana kuhulira Yahova kandi nokulinda malago geege goosi aga muheezaa kalunu.

⁹ Yahova alamugasiza mu viosi viamukoraa ku lwivulu lwi zinda zienyu, kandi lwivulu lwi mitugu jinyu kandi liama linyingi lie milimi jinyu; alava nuvusangali nu kumugaasiza kuli yagasiza avaguuga vinyu.

¹⁰ Navuzwa kuduuka muhuliri Yahova Nyasaye winyu nokolonda malago geege goosi ni miima jije josi, ijang'odwa mu kitabu chi lilaga yiki. Kuduuka mugirung'ane muyeke kuye ni mioyo jinyu josi kandi na roho jinyu josi.

¹¹ “Lilago lia muheezaa kalunu siliveeye lidinyu ku munyi ligali mba, anoho ihale ku munyi mba.

¹² Siliveeye igulu mwigulu muluhi muvoore, ‘Nivwaha ukuninira mwigulu akoleetere kandi akwilwaaziri, kunangwa kuduuki kulihulira.’

¹³ Anoho siliveeye engereka winyanza, ndi muduuki kovora ‘Nivwaha ukwambukira inyanza, yaaze kukwilwaazira kunangwa kuduuki kulihulira?’

¹⁴ Navuzwa likuva yili liveeye ahimbi ku nimunyi. Liveeye mu minwa jinyu, numumioyo jinyu, kunangwa muduuki kulihulira.

¹⁵ “Henza, kalunu muheezaa litovola hagati hu vulahi nu vudamanu, livamwoyo ni likuza.

¹⁶ Niiva mulahulira malago ga Yahova Nyasaye winyu aga muheezaa lidiku lia kalunu, ku liyaanza Yahova Nyasaye winyu, ku ligenda mu zinzira zizie, kandi ku ligumira malago geege nimiima jije kandi ni likalaga lilie, maku mulava mwoyo nokomedeka kuva ihiiri ya vandu vanyingi. Yahova Nyasaye winyu alamugasiza mu kivala cha mwingira mu nokomenya mucho.

¹⁷ Navuzwa niiva mioyo jinyu jilagilung'ana nokoyeeka halovega nokusuula kuhulira, navuzwa muzie kusigamira avanyasaye vandi nu kuvatumikira,

¹⁸ mwiganihizaa havulavu ligali ndi muladivizwa. Simulamenya madiku manyingi mu kivala yicho, engereka wu mugera gwa Jorodani, icha muveeye ahimbi kwingira nokomenya mucho mba.

¹⁹ Inzi kalunu muheezaa litovola hagati hi livamwoyo ni likuza, hagati hu vugasu vwa Nyasaye ni kilaamo cha Nyasaye, kandi nangaa ligulu ni lirova kololekiza litovola lia mulomba. Tovoli livamwoyo kunangwa munyi harara ni visukululwi vienyu muduuki kuva mwoyo.

²⁰ Muyanze Yahova Nyasaye winyu, mumuhuliri kandi muve avasuuvirifu kuye maku munyi harara ni visukululwi vienyu mulamenya madiku manyingi mu kivala cha yasuuviriza avaguuga vinyu, Aburahamu, Isaka na Yakobo.”