Kwidzulitsa 3 - KITABU KITAKATIFU

Isiraeli vaguuta Mwami Ogu

¹ “Maku kwagirung'ana kuzia ivaale kunzira inzizaa mu kivala cha Bashani, na Ogu, Mwami wa Bashani, harara na vasaza vi liihi lilie vosi vaatura kukulwaana ahimbi ni lidaala lia Edirei.

² Navuzwa Yahova yambolera, ‘Utamutia mba. Nziza kumuhaana, eyo harara na avandu veve kandi ni kivala chiche ku ivi. Okole malala meere kuye kuli ga wakola ku Sihoni, Mwami munene wa Amori, uwamihaa kutura mu Heshiboni.’

³ “Kunangwa Yahova Nyasaye wiitu yavika Ogu, Mwami wa Bashani harara na vasaza vi liihi lilie liosi hasi hi zinguru zietu kandi kwavita vosi.

⁴ Ku ing'inga ndala nzere yeyo, kwavugula amadara geege goosi. Si liali ho kali lilala iliatigala mba. Kwavugula amadara goosi sitini kandi nikivala choosi cha Origobu, cha Ogu, mwami wa Bashani yamiha.

⁵ Amadara yaga goosi gakumbirizwa nulugaga lwa madigi matambi ligali, ni virivwa, nivivohero viukuhana virivwa zana, kandi gaali ho kandi madaala manene manyingi gavula kukumbirizwa na madigi gumbakwa.

⁶ Kwagadiviza goosi ligali kuli kwakora ku Sihoni mwami wa Heshiboni, kwiita avandu vosi, avasaza, avakali, kandi avana vosi.

⁷ Kwavugula mitugu josi, kandi ni kulanya madaala goosi.

⁸ “Ku ing'inga yeyo, kwavugula kivala keveeye kolovega lwi ivugwi wu mugera gwa Jorodani kutura ku avamiihili vaviri va vandu va Amori kutura ku mugera gwa Arinoni kuduuka ku kiguru cha Herimoni.

⁹ (Avandu va sidoni valanga kiguru cha Herimoni yicho, Sironi, na vandu va Amori vakilaangaa Seniri.)

¹⁰ Kwavugula kivala choosi chu Mwami Ogu wa Bashani, madaala manene gumukelelemo, vivala via Gileadi viosi na Bashani kuduuka ku madaala gaveeye ivugwi ga Seleka na Edirei.”

¹¹ (Omwami Ogu niyie waali wukumaliriza uwatigalaa ku vandu va Refaimu. Kidali chiche ichalombwa Kutura ku kivia chaali zimita zine uvutambi na uvugika nivuva ahimbi zimita ziviri, kolondekana ni kibimu chaviikwaho. Kinyala kololeka mu lidaala linene lia vandu va Amori lia Raba.)

Zihiiri ziamenya ivugwi wu mugera gwa Jorodani

¹² “Lwa kwavugula kivala yiki kuva miandu jietu, ndaha ihiiri ya Rubeni na Gadi kivala keveeye ivaale wi lidaala lia Aroeri, liveeye ahimbi nu mugera gwa Arinoni harara ni nusu yi kivala chi vigulu cha Gileadi, harara na madaala gacho.

¹³ Kivala chatigaraa cha Gileadi kandi Bashani icha Ogu yamiha, ndaha inusu yi ihiiri ya Manase vamenye mu, agaveeye kovora kivala choosi cha Arigobu Bashani choosi chamanyikana kuli kivala cha vandu va Refaimu.”

¹⁴ Jairo, kutura mu ihiiri ya Manase yavugula kivala choosi cha Arigobu Bashani kuduuka ku lwako lwa vandu va Geshuru na vandu va Maakazi, na yavilanga, Havozi Jairo kuli lieta lilie liveeye kuduuka kalunu.

¹⁵ “Ndahaana kivala cha Gileadi ku vandu vi nyumba ya Makiru, uwi ihiiri ya Manase.

¹⁶ Kandi ndaha vandu vi ihiiri ya Rubeni na Gadi kivala choosi kutura Gileadi kuduuka kumugera gwa Arinoni. Hagati hu mugera haali ho nu lwako kolovega lwi isavaalu, nu ulwaako lwa ivaale lwali mugera gwa Jaboku, ogoveeye lwako lwa vandu va Amoni.

¹⁷ Kolovega lwi imadioli kivala chavo chaduuka ku Mugera gwa Jorodani, kutura kunyanza ya Galilaya mu lovega lwa ivaale kusulunguta kunyanza yi jumbi kolovega lwi isavaalu kandi kuduuka hi wi kiguru cha Pisiga kitangiraa kolovega lwi ivugwi.

¹⁸ “Ku ing'inga ndala nzere yeyo, ndaavaha amalago yaga; ‘Yahova Nyasaye wiitu umali kumuha kivala keveeye ivugwi wu mugera gwa Jorodani, mukivuguli. Kalunu, avasaza vinyu vizingulu kandi vi liihi vatumi vaambuki mugera gwa Jorodani imbiri wa wi zihiiri zindi zia Isiraeli, kunangwa vavakonye kuvugura kivala chavo.

¹⁹ Navuzwa avakali na avana vinyu, kandi mitugu minyingi, vilatigala inyima mu madaala ga inzi mali kuhaana ku munyi.

²⁰ Mukoonye avandu va Isiraeli vache vinyu kuduuka lwa vavugura kivala cha Yahova Nyasaye winyu avahezaa, imadioli wu mugera gwa Jorodani kandi kuduuka lwa Yahova aleka vamenye yo mu mirembe. Lwi nyima mwirane sa mulala mu kivala cha inzi mali kumuha.’

²¹ “Maku ndiganihiza Joshua: ‘Umali kolola goosi ga Yahova Nyasaye winyu yakola ku avami vanene vaviri yavo, Sihoni na Ogu. Yahova alakola malala meere ku uvwamihi vwosi vwiikivala chiche cha mumali kwingilira nu kulwaana nacho.

²² Utavatia mba, kigira Yahova Nyasaye winyu niyie umulwaaniraa.’

Musa siyavugilirwa kwingira Kanaani mba

²³ “Ing'inga yeyo ndaasaara Yahova nu mwoyo gwosi nimbora,

²⁴ ‘O, Yahova Wanyala Viosi, inzi manya ndi ivi umali kumanyia vuzwa litanga lie vindu vinene kandi viokogenyia via uzizaa kokora. Sihaveeyeho na nyasaye mwigulu anoho ku lirova unyala kokora vindu viezingulu via ivi umali kokora mba!

²⁵ Ngusaala O, Yahova, oleke nyambuki mugera gwa Jorodani ndore kivala kilahi kandi kenoru kolovega Lundi lula; kivala kilahi chi vigulu via Lebanoni.’

²⁶ “Navuzwa Yahova yambihilira kigira avandu munyi kandi si yaali anyala kumbuliriza mba. Muvogono yivwo, Yahova yambolera, ‘Yago gaduuki! Utativula makuva yaga mba!

²⁷ Zia kondongozi kwi kiguru cha Pisiga ma ohenze ivaale kandi isavaalu, ivugwi kandi imadioli. Ohenze vulahi ligali ku icha ololaa, kigira si ulambuka mugera gwa Jorodani mba.

²⁸ Ohe Joshua amalago geege. Muluvirizi kandi muleminyi mwoyo gwigwe ku lienya lilie; kigira alimilira avandu yava vaambuki kuzia kuvugura kivala cha ivi olola kila.’

²⁹ “Kunangwa kwamenya mu livona liveeye kolovega lundi lwi lidaala lia Bezi-peoru.”