Kwidzulitsa 29 - KITABU KITAKATIFU

Lilagana lia Yahova na Isiraeli mu kivala cha Moabu

¹ Yaga nigo amakuva gi lilagana lia Yahova yalaga Musa kolomba na avandu va Isiraeli mu kivala cha Moabu. Yaga goosi gaali komeeda ku lilagana lia Yahova yaali naalombi navo ku kiguru cha Sinai.

² Musa yalanga avandu vosi va Isiraeli navavoolera, “Munyi mwelolera aveene aga Yahova yakola ku Mwami wa Egebeti, ku vatumikiri veve, kandi ku kivala chiche choosi.

³ Mwalora nizimoni zienyu aveene vulwaye vudamanu vwukutihiza ligali vilolekizu kandi viokogenyia vinene ligali via Yahova yakola.

⁴ Navuzwa kuduuka lidiku liene yili, Yahova akikiri kumuha zing'anagani ziukumanyiriza anoho zimoni ziokolola anaho amatu gukuhulira vindu viekoleka.

⁵ Ku mihiga arubaini, Yahova yamwimilira kuvitira mu changalangwe, kandi zinguvu zienyu nivilatu vienyu siviatanduka mba.

⁶ Simwali numugadi gwu kulia anoho iwaini anoho chukunwa kilulu mba, navuzwa Yahova yamuhaanira kolondekana ni lienya kunangwa aduuki kumwigiza ndi aveeye Nyasaye winyu.

⁷ Kandi lwa kwaduka hano, Mwami Sihoni wa Heshiboni, kandi mwami Ogu wa Bashani, vaza kulwaana nikunyi; navuzwa kwavaguuta.

⁸ Kwavugula kivala chavo, nikugavulira vandu avihiiri ya Rubeni, Gadi ni inusu yihiiri ya Manase.

⁹ Muhuliri nu vusuuvirifu vwosi amakuva goosi gi lilagana yili kunangwa muduuki kugasizwa mu vindu viosi via mukora.

¹⁰ “Kalunu munyi mwosi musingiyi imbiri wa Yahova Nyasaye winyu, aviimiliri vinyu na vatumikiri vinyu, kandi avasaza vandi vosi va vandu va Isiraeli,

¹¹ vosi harara na vakali kandi avana vinyu, na avageni vamenya hokososa hinyu, avatenyi vizingu zienyu na valeeti va amazi ginyu.

¹² Kalunu musingiyi hano kunangwa muduuki kwingira mu lilagana yili lia Yahova Nyasaye alombaa ni munyi ku liesuuha kandi muvugiliri lienya lialio;

¹³ kunangwa Yahova aduuki kudinyiriza munyi muve vandu veve, naye ave Nyasaye winyu; kuli yamusuuviriza harara na avaguuga vinyu, Aburahamu, Isaka na Yakobo.

¹⁴ Si kuveeye ni kumunyi veng'ine ava Yahova alombaa lilagana yili ni liesuuha yili mba.

¹⁵ Alilombaa ni kunyi kwosi avakusingiyi hano imbiri weve kalunu kandi harara ni visukululwi vietu harara nayavo avakikiri kwivulwa.

¹⁶ “Munyi aveene mumanya kuli kwamenya mu vudinyu mu kivala cha Egebeti, kandi kuli kwavitira muvivala vie zihiiri zindi.

¹⁷ Mwalora hagati haavo vifananyi viu kuvihiliriza viavo vialombwa kutura ku misaala, magina, ifeza kandi izahabu.

¹⁸ Mulole ndi siaveeyeho nu musaza anoho mukali avinyumba anoho ihiiri, usingiyi hano kalunu ugirung'anaa kutura ku Yahova Nyasaye wiitu, azie kusigamira avanyasaye vi zihiiri zindi. Yiki kilava kuli muli guvirukaa kuva kitagwa kilulu kandi chu vusungu.

¹⁹ “Lwu mundu kuli uyu ahuliraa makuva gi liesuuha yaga, yigaasizaa mumwoyo gwigwe, ma aganagana, ‘Ndava ni mirembe, kali niimba ninzizagilira kogenda mu zinzira ziange mwene.’ Yago galadiviza munyi mwosi, avalahi na vadamanu.

²⁰ Yahova sialasamiiha mundu kuli uyu. Mu vogono yivwo, vutima vusamba vwa Yahova vulaaka kuye, kandi kivi chi vilaamo viosi viang'odwa mu kitabu yiki vilamugwira kuduuka lwa Yahova asiminya lieta lilie kutura mu lirova yili.

²¹ Yahova alamwahula kutura mu zihiiri ziosi zia Isiraeli, na alaleeta maduywa kuye kolondekana ku vilaamo viosi vie lilagana iviang'odwa mu kitabu chi lilaga yili.

²² “Mu makura gaaza, visukululwi vienyu kandi avageni kutura muvivala vie ihale valalola maduywa nu vusaliri vwa Yahova amali koleta ku kivala chienyu.

²³ Milimi jilava miere jokogotiza, ijafuumwa niligoke kandi jumbi. Kindu sikilatagwa anoho kwama mu mba kandi kali indiva silamera mumba. Kivala chienyu kilava kuli Sodoma na Gomora, cha Adima na Zeboiimu, icha Yahova yadiviza lwa yaali nu vutima vululu.

²⁴ Maku lirova liosi, zihiiri ziosi zilateeva, ‘Kigira ki Yahova akoli yaga ku kivala chavo? Uvutima vululu vusamba yivu voveeye kigira ki?’

²⁵ “Lituvuli lilava, ‘Gaveeye kigira avandu yava valeka lilagana lia yahova, Nyasaye wavaguuga vaavo, lia yakola navo lwa yavatuliza mu kivala cha Egebeti.

²⁶ Vazia kutumikira avanyasaye vandi ava vavura kusigamira ku maziambiri, avanyasaye va Yahova yaali ni namali kuvagaya vatasigamira.

²⁷ Kunangwa vutima vwa Yahova vulava ku kivala chavo, nokoleta kucho maduywa givilaamo viosi iviang'odwa mu kitabu yiki.

²⁸ Yahova yiiha avandu yava kutura mu kivala chavo nilivihilirwa linene kandi nu vutima vululu ligali, naavasiuva mukivala kegeni, kandi vaveeye uwene yeyo kuduuka kalunu.’

²⁹ “Vindu viaviswa viveeye via Yahova Nyasaye wiitu navuzwa viveeye havulavu viveeye vietu harara na vana viitu mihiga ni mihiga, kunanwa kuduuki kokora makuva gi lilaga lilie.