Kwidzulitsa 28 - KITABU KITAKATIFU

Uvugasu vwi lihulira

¹ “Niiva mulahulira ligali mwoyo gwa Yahova Nyasaye winyu, nukulinda nu vusuuvirifu malago geege aga muheezaa kalunu, Yahova alamuginga higulu muve ihiiri enene ligali kuvita zihiiri zindi ziosi ku lirova.

² Muhuliri Yahova Nyasaye winyu nuvugasu yivu vwosi vulava vwinyu.

³ “Yahova alagasiza madaala ginyu goosi kandi milimi jinyu josi.

⁴ “Yahova alamugasiza na avana vanyingi, niviamo vinyingi kandi ni mitugu je zing'ombe na magondi manyingi.

⁵ “Yahova alagasiza vuswage vwinyu kandi alagasiza viukulia vienyu viosi.

⁶ “Ulagasizwa lwa wingira, kandi ulagasizwa lwa utura.

⁷ “Yahova alaguuta avasigu vovo lwa vakwingilira kutura lovega lulala, navuzwa viiruki kutura mu zimbega saba.

⁸ “Yahova Nyasaye woovo alagasiza miyinzi ja makono googo kandi aliizuliza videera vivio nu vuswage. Alakugasiza mu kivala chakohezaa.

⁹ “Niiva mulahulira Yahova Nyasaye winyu na mukore vindu viosi via amulagaa alamukola muve avandu veve vatakatifu kuli yamusuuviriza.

¹⁰ Maku avandu vosi vukulirova valalola ndi Yahova umali kumutovola muve vandu aveeve, kandi valamutia ligali.

¹¹ Yahova alamuha avana vanyingi, zing'ombe zinyingi, ni viamo vinyingi mu kivala cha Yahova Nyasaye winyu yasuuviriza kuhaana ku avaguuga vinyu.

¹² Alakubiza imbura mu zing'inga ziayo kutura mwigulu na agasizaa miyinzi jije josi, kunangwa mwegobizi zihiiri zinyingi, navuzwa munyi simulasava kutura kuvo mba.

¹³ Yahova Nyasaye winyu alamukola aviimiliri hagati hi zihiiri na simulava valondi vaavo mba. Mulava nilizizagilira imbiri kazozo, na simulava nu vudaka niiva mulamuhulira nu vusuuvirifu amalago geege goosi aga muheezaa kalunu.

¹⁴ Navuzwa sigamuduukira muvuli kugalonda munzira yoosi, anoho musigamiri kandi mutumikiri avanyasaye vandi mba.

Vilaamo kigira livula kuhulira

¹⁵ “Navuzwa niiva uvuli kuhulira mwoyo gwa Yahova Nyasaye woovo kandi uvula kuhulira nu vusuuvirifu malago geege goosi nokokola miima jije josi ja inzi mali kumuha lidiku lia kalunu, ahene yaho vilaamo vidamanu yivi viosi vilamugwira.

¹⁶ “Mulalaamwa mu madaala ginyu kandi mulalaamwa mumilimi jinyu.

¹⁷ “Yahova alalaama viamo vienyu viu vuswage kandi alalaama viukulia vienyu viu vuswage.

¹⁸ “Mulalamwa mu lwivulu lwi zinda zienyu, liama lie kivala chiinyu, kandi limeedeka lie viayo vienyu vie zing'ombe kandi vimeme vie chayo cha magondi ginyu vilalaamwa.

¹⁹ “Mulalaamwa lwa mwingira kandi lwa muturaa.

²⁰ “Yahova alamuletera vilaamo, ovogoyanu kandi kivi mu viosi via mukoraa muluhi mudivi no kogota vwangu kigira ovudamanu vwa mumali kokora mu limuleka.

²¹ Yahova alamutumira zinguzu zindamanu kuduuka mudivizwi mwosi, mukiva cha wingira mu.

²² Yahova alamuleetera zinguzu zihambizanaa, mavimba no lodegela, kandi kemeyu nuvukindu vuhiu kudiviza vitagwa vienyu. Kivi yiki kilava harara ni munyi kuduuka lwa mukuza.

²³ Imbura silakuba mba, na lirova lienyu lilava lidinyu kuli kivia.

²⁴ Mu vogono yivwo, alatuma imbura mukivala chienyu imbuza yuluguuki nu muyeke; vilamugwira kutura mwigulu kuduuka lwa mudivizwa ligali.

²⁵ “Yahova alakola vasigu vinyu va muguuti. Mulavingilira kutura mulovega lulala, navuzwa mu liruka kutura kuvo mu zimbega saba, kandi avandu vosi vu mulirova valadegerizwa lwa valora ichekolekaa ku munyi.

²⁶ Lwa mukuza manyonyi gu muvulimu galalia miviri zienyu. Sihalavaho nu mundu wu wukuzikunga mba.

²⁷ Yahova alamuleetera mavimba kuli yakola vandu va Egebeti. Mulava nulwiyago ku miviri jinyu, na simulahona mba.

²⁸ Yahova alaleeta ku munyi vulalu kandi vovoku kandi alagoyanyia zing'anagani zienyu.

²⁹ Mulahavatiza yiyi na yiyi mbasu hagati kuli umuvoku mu kisundi, navuzwa simunyala konyoora inzira mba. Simulagaasizwa mu vindu viosi via mukora mba. Muladambizwa nu kunuurwa madiku goosi, na sihalavaho nu mundu wu kumukonya mba.

³⁰ “Mulahaamba vakana, navuzwa vasaza vandi valavaleeta. Mulumbaka zinyumba, navuzwa simulamenya mu mba, mulasimika vizabibu, navuzwa simulalia mazabibu gacho mba.

³¹ Zing'ombe zienyu ziliitirwa imbiri wi zimoni zienyu, navuzwa simulalia ku zinyama ziazio kali hakuzu mba zibunda zienyu zilavugulwa ku zilavugulwa kuzinguru imbiri wi zimoni zienyu, navuzwa simulilanyirwa mba. Amagondi ginyu galahevwa avasigu vinyu, navuzwa sialava ho nu mundu ogokonya mugasoole mba.

³² Avayaayi na vakana vinyu valahaanwa kuli avatugwa kuzihiiri zing'eni muloraa. Vuli lidiku, zimoni zienyu zilahenzerera mbula muvalole ni viranaa, navuzwa sivalirana mba. Makono ginyu sigalava nu vunyali kuvasoora mba.

³³ Zihiiri zing'eni zialalia viamo viosi via mwayinzira vudinyu kuvitaaga, na munyi simulanyora kindu nitaveeye lidambizwa ni likolerwa vudamanu kazozo.

³⁴ Kunangwa mulava vandu vu vulalu kigira uvusaliri vwinyu.

³⁵ Yahova aladuya masigamo nivirenge vienyu vive nuvuzunu vwa mavimba aga utanyala kohonywa, kutura kuzinduvatiru kuduuka ku lwote lwi mitwi jinyu.

³⁶ “Yahova alamuhila harara nu mwamihi munene winyu mukivala kegeni, uwa munyi anoho avaguuga vinyu vavura komenya maziambiri. Uwene yeyo, mulasigamira avanyasaye vavaazwa ku misaala namagina.

³⁷ Muvivala via Yahova alimusalanyira mu, avandu valegosa ku gamali kwekoleka ku munyi. Valamukolera kehenyahenye na manyego.

³⁸ “Mulamiiza vuguza vunyingi mu milimi, navuzwa mulava niligesa likekeeke kigira zisigi zilalia vitagwa vienyu.

³⁹ Mulasimika mizabibu minyingi nokugisembelera, navuzwa simulavungiza mazabibu gajo anoho kunwa iwaini yajo mba kigira zing'ende zilagalia.

⁴⁰ Mulava na mizeituni havundu hoosi mu kivala chienyu, navuzwa simulivaka maguta gajo kali hakuzu mba, kigira makuyu gajo galavunguluka.

⁴¹ Mulivula vana avayaayi na avakaana, navuzwa ulavagotiza, kigira valahirwa ihale kuli avahambe vuvulwani.

⁴² Misaala ni viamo vie kivala chienyu choosi vilaliivwa ni zisigi.

⁴³ “Avageni avamenyaa hagati hinyu valanyora zinguru ligali zinyingi kumuvita, navuzwa munyi mulazizagilira kogotiza zinguru zienyu.

⁴⁴ Valava na mabese kumwegobiza, navuzwa munyi simulavegobiza mabesa mba. Valava aviimiliri, navuzwa munyi mulava avalondi vaavo.

⁴⁵ “Vilaamo yivi viosi vilaza ku munyi kandi vilava ni munyi kuduuka lwa mudivizwa ligali, kigira simwahulira Yahova Nyasaye winyu nokugumira malago gege ga yamuuha mba.

⁴⁶ Vilava kelolero kandi chokogenyia ku munyi ni visukululwi vienyu mihiga ni mihiga.

⁴⁷ Yahova yamugasiza mu zinzira ziosi, navuzwa simwali munyala kumutumikira nuvusangali kandi nuvuyanzi mu mioyo jinyu mba.

⁴⁸ Kunangwa mulatumikira avasigu vinyu va Yahova azizaa kutuma kumulwaana. Mulava ni inzara, nu vuluhu kandi chahonyo, kandi vudaka vwi vindu viosi. Yahova alamudambiza nu vululu kuduuka lwa mudivizwa ligali.

⁴⁹ Yahova alaleeta zihiiri ku munyi kutura ihale, ku keheri chi lirova, ihiiri ya munyi mutamanya lulimi lwayo. Valaza hasi vwangu ku munyi kuli liburuka lie kihungu;

⁵⁰ ihiiri ihenzaa vululu ligali, itaveeye ni zimbavasi ku vasakulu kandi ku avasoleri.

⁵¹ Valalia mitugu jinyu kandi viamo vienyu na munyi mulava ninzara kuduuka lwa mukuza. Sivalamulekela vuswage ku iwaini, maguta ga mizeituni, anoho magondi mba, kuduuka lwa mukuza.

⁵² Valamumbiriza nukumumwingilira mu vuli lidaala mu kivala cha Yahova Nyasaye winyu amuhezaa. Amadigi matambi gi zingaga aga mulisuuvira galagwa.

⁵³ “Kigira lisalira lia vasigu vinyu valileeta ku munyi ing'inga ya mulikumberizwa muvuli kutura ichova mulalia inyama ya avana va Yahova Nyasaye winyu amali kumuha.

⁵⁴ Kali mundu muhocha ligali kandi wi zimbavasi hagati hinyu sialivererera amwavo weve, anoho mukali wa yayaanzaa anoho avana veve vatigara mba.

⁵⁵ Sialaha kali mulala kuvo inyama ya avana veve yava nalizaa mba; kigira siaveeye nikindu kitigaye, kandi kigira sialiva uvusaliri vwa vasigu vinyu valileeta ku munyi ing'inga yi likumbirizwa madaala ginyu goosi.

⁵⁶ Kali mukali muhocha kandi wizimbavasi hagati hinyu, wavula koseena induvatiru ye kerenge chiche hasi alasura kuhaana musaza weve muyanze kandi avana veve,

⁵⁷ zingovi zitulaa munda mwimwe kandi mwana mudoto wa yiivuyi kigira alavalia makiriri ing'inga yi likumbirizwa kandi muvudinyu vwa vasigu vinyu valileeta ku munyi mu madaala ginyu goosi.

⁵⁸ “Niiva mulavula kuhulira nu vusuuvirifu amigizu ga Nyasaye goosi agang'odwa mu kitabu yiki, kandi muvura kuhaana luyali kulieta liokogenyia na liu kutihiza lia Yahova Nyasaye winyu

⁵⁹ hene yaho, alatuma ku munyi kandi ku visukululwi vienyu amaduywa guvulwaaye vutahona kandi vulwaye vudamanu vuhambizana uvutanyala kwigalirwa.

⁶⁰ Alilanyia ku munyi uvulwaye vwosi vudamanu vwa mwaali navwo mu Egebeti, na silakahone mba.

⁶¹ Alatuma kandi zing'ano ziosi ziu vulwaye kandi amaduywa goosi agavula kutalwa mu kitabu yiki cha malago na miigizu ga Nyasaye kandi muladivizwa ligali.

⁶² Kali ni muliiva avanyingi kuli zing'ereng'ani muvwerefu ni vakekeeke vuzwa ku munyi avalihononoka, kigira mwavura kuhulira Yahova Nyasaye winyu;

⁶³ kandi galava, kuli gayaanziza Yahova kumukolera vulahi mu lizizagilira nokumukola muve avanyingi, kandi ndio galamuyaanziza mu livadiviza kandi mu lileeta kivi kumunyi. Mulatulizwa mu kivala cha muveeye ahimbi kwidikira mu.

⁶⁴ “Yahova alamusalanyia hagati hi zihiiri ziosi kutura kolovega lulala lwe keheri chi lirova kuduuka kolovega lundi, kandi uwene yeyo mulatumikira avanyasaye valombwa kutura ku misaala na magina, avanyasaye va munyi anoho avaguuga vinyu vavura kusigamira amaziambiri.

⁶⁵ Hagati hi zihiiri yizio, simulanyora mirembe havundu hoosi anoho vweremelizi kali hakuzu mba. Simulava na hokosoosizira zinduvatiru zienyu mba. Yahova alamukola munyangana mu zing'anagani, kandi zimoni zienyu zilaluha kulindilira, kandi mulakuza mioyo.

⁶⁶ Livamwoyo lienyu lilava mu vuhiimwa. Mbasu nu vudiku, mulava nu vuti vonene kandi mulamenya mu liitia likuza kazozo.

⁶⁷ Mioyo jinyu jilakubagana nuvuti ku vuli kindu cha muloraa. Vuli mugamba mulegomba gove mugolova. Vuli hamugorova mulegomba gove mugamba.

⁶⁸ Yahova alamwilanyia Egebeti mu zimeri kali niiva yavoola ndi simulilana yo kandi mba. Uwene yeyo, mulageriza kwiguliza munyi aveene ku avasigu vinyu kuli avatugwa, navuzwa sihalavaho numundu woosi ulienya kumugula mba.”