Kwidzulitsa 27 - KITABU KITAKATIFU

Amalago ga Nyasaye ku vibaho via magina

¹ Maku Musa harara na vakulundu va Isiraeli yavolera avandu, “Mulonde amalago goosi agamuhezaa kalunu.

² Lidiku lia muliambuka mugera gwa Jorodani nokwingira mu kivala cha Yahova Nyasaye winyu amuhezaa, mulasingiriza magina manene, nukugahoma vodohi

³ kandi mung'ode kugo malago na amigizu yaga goosi lwa muva mwakambuka nu kwingira mu kivala kigunamu yicho cha Yahova, Nyasaye wa vaguuga vinyu, yamusuuviriza,

⁴ Lwa muva ni mwakaambuka Jorodani, musingirizi magina yaga, aga mulagaa kalunu, ku Kiguru cha Ebali, kuli mulagaa kalunu na mulagahoma no vodohi.

⁵ Mwumbakiri yo Yahova uvwali vwa magina agakiri kuvazwa ku nikivia mba.

⁶ Mwumbake uvwali vwa Yahova Nyasaye winyu na magina gumulimi, agatavazwa, kandi muhaane ku vwali vihaanwa viukusambwa kigira Yahova Nyasaye winyu.

⁷ Muhaane kandi visiuviliru vie mirembe nokuvilira yo. Kandi musangare imbiri wa Yahova Nyasaye winyu.

⁸ Ku magina gahomenywe novodohi, mung'ode ku vulahi vuli likuva lie lilaga lia Nyasaye.”

⁹ Kunangwa Musa harara na vasaalisi, vandu vi ihiiri ya Levi, vavoolera avandu va Isiraeli vosi, ndi “Mukiring'ane O, Isiraeli, na mumbulirizi! Kalunu mumali kugwa avandu va Yahova Nyasaye winyu;

¹⁰ Kunangwa muhuliri Yahova Nyasaye winyu kandi mugumiri malago gege nimiima jije aga muheezaa kalunu.”

Vilaamo ku livula kuhulira

¹¹ Kunangwa Musa yalaga avandu va Isiraeli ku lidiku zana yilio navoora,

¹² “Inyima wu kwambuka mugera gwa Jorodani, zihiiri yizi zilasingila ku Kiguru cha Gerizimu lwu vugasu vuhaanawa ku vandu yava: Simioni Levi, Yuda, Isakari, Josefu na Benjamini.

¹³ Zihiiri yizi zilasingila ku Kiguru cha Ebali kulaama avandu: Rubeni, Gadi, Asheri, Zabuloni, Dani na Nafutali.

¹⁴ Avandu vi ihiiri ya Levi valamoloma makuva yaga ku avandu vosi va Isiraeli nu mwoyo munene.

¹⁵ “ ‘Alaamwe mundu olomba kifananyi chavazwa anoho kutulwa, ikindu keveeye chu kuvihiliriza ku Yahova, miyinzi ja makono gu musiza, na akisingirizi muvwivisu, akisigamiri’ “Kandi avandu vosi valavoora, ‘Amini!’

¹⁶ “ ‘Alaamwe uchayanga aviivuli veve.’ “Avandu vosi valativura, ‘Amini!’

¹⁷ “ ‘Alaamwe oyo usuundaa kigingi chu lwako lwu mutende weve.’ “Avandu vosi valavoora, ‘Amini!’

¹⁸ “ ‘Alaamwe oyo wimiliraa umuvoku kogota kunzira.’ “Avandu vosi valavoora, ‘Amini!’

¹⁹ “ ‘Alaamwe oyo uchaminyaa likalagirwa liu mugeni, muvisandu numukunzakali.’ “Avandu vosi valavoora, ‘Amini!’

²⁰ “ ‘Alaamwe oyo ogonaa numukali wa baba weve, kigira umali kuviika baba weve mu zisoni!’ “Avandu vosi valavoora, ‘Amini!’

²¹ “ ‘Alaamwe mundu ogonaa ni inyama ku zing'ano ziosi.’ “Avandu vosi valativura, ‘Amini!’

²² “ ‘Alaamwe oyo ogonaa na mbozo weve, mukaana wa baba weve, anoho wa mama weve.’ “Avandu vosi valavoora, ‘Amini!’

²³ “ ‘Alaamwe oyo ogonaa na navizara weve.’ “Avandu vosi valavoora, ‘Amini!’

²⁴ “ ‘Alaamwe oyo witaa mutende weve mu vwivisu.’ “Avandu vosi valavoora, ‘Amini!’

²⁵ “ ‘Alaamwe oyo uvugura viambiti yiiti mundu utaveeye na mahiolo.’ “Avandu vosi valavoora, ‘Amini!’

²⁶ “ ‘Alaamwe oyo uvula kuhulira amalago na amigizu goosi ga Nyasaye.’ “Avandu vosi valavoora, ‘Amini!’