Kwidzulitsa 26 - KITABU KITAKATIFU

Vihaanwa vie engeso

¹ “Inyima wa mumala kuvugura kivala cha Yahova, Nyasaye winyu amuhezaa kandi nimumali kwitulara yo,

² sa mulala ku munyi kuduuka aviiki mu kihinda vilala ku viamo viukutanga viagesi nukuvihili havundu harara hu kusigamira Yahova.

³ Zia ku musaalisi okolaa miyinzi ing'inga yene yeyo kandi umuvoolere, ‘Kalunu nzimanyia ku Yahova, Nyasaye wange, ndi mali kwingira mu kivala cha yasuuviriza avaguuga viitu kuha kunyi.’

⁴ “Musaalisi alavugula kihinda kutura ku ivi na akiviiki ku vwali vwa Yahova Nyasaye winyu.

⁵ Kunangwa imbiri wa Yahova mulavoola makuva yaga, ‘Guuga wiitu yaali mugendagendi vuzwa, uwahila vandu vinyumba yeeye Egebeti vamenye yo. Vaali vakekeeke lwa vazia yo, navuzwa vaagwa ihiiri enene kandi yi zinguru ligali.

⁶ Avandu va Egebeti vamukolera uvudamanu, vululu ligali, nivamuniga mukore miyinzi kuzinguru kuli avatugwa.

⁷ Maku mwanira munyore ovokonyi kutura ku Yahova, Nyasaye wa avaguuga vinyu. Yahulira kandi nalora uvusaliri vwitu, uvudinyu kandi vovereri vwitu.

⁸ Kuzinguru zizie zinene kandi zinguru ziu kulwaana, yakohonyia kutura Egebeti. Yakola vilolekizu niviokogenyia, kandi naakora vindu viukutihiza.

⁹ Yakoleta hano kandi naakuha kivala kigunamu yiki.

¹⁰ Kunangwa kalunu koletaa ku Yahova makuyu gi kidieli chukutanga chi ligesa icha amali kuhaana ku kunyi.’ “Maku mulaviika kihinda hasi, imbiri wa Yahova, Nyasaye winyu, na musigame imbiri weve.

¹¹ Muve nilisandiza kigira vindu vilahi via Yahova Nyasaye winyu umali kuha munyi harara na vandu vinyumba yienyu muleke vandu vihiiri ya Levi na avageni avamenyaa hagati hinyu vasangale harara nimunyi mu lizuliza lie lisavo.

¹² “Vuli ku muhiga gwa kavaga, muhaane kidieli chi likomi chi vitagwa vienyu ku vandu vi hiiri ya Levi, avageni avavisandu, kandi avakunzakali, kunangwa, kunangwa mu vuli kiduma chavandu, valava niviukulia vivaduuka kulia kutula mumadala jinyu.

¹³ Muvoore ku Yahova, ‘Sikitigaye ku chukulia kitakatifu chi kidieli, munyumba yitu mba. Kumali kukihaana ku vandu vihiiri ya Levi, avageni, avavisandu navakunzakali, kuli wakulaga kokole. Sikutinguhi anoho kwiviliyi lilala ku malago galondekanaa ni kidieli mba.

¹⁴ Sikwakulia kucho lwa kusiomangi mba. Sikumali kulia kucho lwa kwaali vadamanu kolondekana ni miima ji diini mba; kandi sikuhaani ku kidieli chi likomi yicho kuli isadaka ya vakuzu mba. Kumali kuhulira ivi O, Yahova; kumali kokora kindu choosi kuli wakulaga kolondekana nikidieli chi likomi.

¹⁵ Henza hasi hano kutura hatakatifu hoho mwigulu, na ugasizi avandu vovo, Isiraeli; ugasizi kandi kivala kigunamu icha umali kuhaana kukunyi, kuli wasuuviriza avaguuga viitu.’

Avandu va Yahova

¹⁶ “Kalunu Yahova Nyasaye winyu amulagaa muhuliri malago geege goosi; kunangwa mugahuliri nu vusuuvirifu ni mioyo jinyu josi kandi na roho jinyu josi.

¹⁷ Kalunu mumali kuvugilira Yahova kuli Nyasaye winyu. Mumali kusuuviriza kumuhulira, kulinda malago geege goosi, kandi kokora goosi aga mulaga.

¹⁸ Kalunu Yahova umali kumuvugilira kuli avandu veve, kuli yamusuuviriza; kandi mulagaa muhuliri amalago geege goosi.

¹⁹ Alakamukole muve avanene kuvita ihiiri yindi yoosi ya yalomba, kandi mulahaana lisandiza nu luyali ku lieta lilie. Mulava avandu veve, kuli yamusuuviriza.”