Kwidzulitsa 25 - KITABU KITAKATIFU

¹ “Niiva vandu va Isiraeli vaviri valazia kuyarana mu kiyaalo kwavukanyia vosoolo hagati haavo, na mulala anyoleke siaveeye nimbala, nu uwundi aveeye nilihiolo,

² Niiva muhioli akalagirwa kukuywa, mukalagi alamuvolera agone hasi mamumama, ma akuywi. Zimbimbu ziakuywa zilalondekana nu vudamanu vwakoli.

³ Anyala kukuywa zimbimbu zinyingi kali kuduuka zimbimbu arubaini; navuzwa zitavita mba, kuvita ahene yaho zilamuha zisoni imbiri wa avandu.

⁴ “Utavoha munwa gwe eng'ombe lwa ugitumikiraa kuhuura vuswage mba.

Agadukanaa Okolere amwavo woovo wakuza

⁵ “Niiva avamwavo vaviri vamenyi harara, na mulala kuvo akuzi, vugira koleka mwana muyaayi, mukunzakali weve sialaleetwa nu mundu kutura ichova winyumba yaavo mba. Gaduukiraa amwavo musaza wakuza oyo amwilanyie umwandu.

⁶ Muyaayi wukutanga wavivula alavalizwa kuva muyaayi wu musaza wakuza kunangwa aduuki kuzizagiliriza lieta lie inyumba yeeye.

⁷ Navuzwa niiva amwavo musaza wakuza oyo asuraa koleta mukunzakali wa amwavo weve, mukali oyo alazia ku aviimiliri vi lidaala yilio avoole, ‘Amwavo musaza wange sialakola agamuduukira akole mba; umali kusuura kwivulira amwavo weve kisukururwi hagati ha avandu va Isiraeli!’

⁸ Maku aviimiliri vi lidaala valamulanga, vamolome naye. Niiva alava nakisuuyi koleta mukali oyo,

⁹ mukunzakali wa amwavo alazia kuye imbiri wa aviimiliri vi lidaala, amutulizi kilala ku vilato vivie, amutuziri amate mumoni, ma avoole, ‘Yiki nicho chekoleka ku musaza usulaa kwivulira amwavo weve kisukururwi.’

¹⁰ Lieta lie inyumba yeeye lilamanyikana mu Isiraeli kuli, inyumba yu musaza wi kilato chiche chatulizwa.

Amalago gandi

¹¹ “Niiva avasaza vaviri vakubana, nu mukali wu mulala kuvo agelizi kokonya musaza weve ku liezuumba uvusaza vwu musaza wundi amukole,

¹² mutamumanyia liverererwa mba; temi mukono gwigwe gutuli ligali.

¹³ “Mutava ni vibimiru mu misigo jinyu, kilala kilitu ni kindi ichangu mba;

¹⁴ anoho mutava nivibimiru vie zing'ano ziviri, kilala kenene, ni kindi kekekeeke mba!

¹⁵ Mutumikiri vibimiru via giligali kandi viu vusuuvirifu, kunangwa muduuki komenya madiku manyingi mu kivala cha Yahova, Nyasaye winyu amuhezaa.

¹⁶ Yahova aadunyiraa avandu vaveeye nu vugadi.

Lilaga ukwita vandu va Maleki

¹⁷ “Mwizurizi icha vandu va Maleki vaakora ku munyi lwa mwaali nimutulaa Egebeti.

¹⁸ Sivaatia Nyasaye mba, kandi ndio vamutulira kutura inyima lwa mwaali ni muluhi kandi nimuveeye avadedekere, ni vita vandu vosi avaari ni vatigaye inyima nivaluhi.

¹⁹ Kunangwa, lwa Yahova, Nyasaye winyu amala kumuha kivala zana yicho, kandi namukoli muve ni mirembe kandi naamuhonyi kutura ku vasigu vinyu avamenyaa ahimbi nimunyi, muve na giligali kwita vandu va Maleki vosi, kunangwa mundu kali mulala avuli kuvizuriza mba. Mutivilira kokora ndio mba!