Kwidzulitsa 24 - KITABU KITAKATIFU

Lilekana kandi liirana koletana

¹ “Niiva musaza aleetaa mukali kandi lwi nyima atovole ndi siamwenyaa mba kigira anyooye kindu muye ikitamuyaanzizaa, kuduuka amung'odere ibarwa yokolekana, ma amuhe, ma amukungi kutura munyumba yeeye.

² Maku niiva aleetwa nu musaza wundi,

³ musaza weve wakaviri naye amuvihilirwi, ma amung'odere ibarwa yu kwavukana, ma amuhe na amukungi kutura munyumba yeye, anoho niiva musaza weve wakaviri zana akuza,

⁴ ahene yaho musaza weve wukutanga, sialilana kumuleeta mba. Amuvuguli kuva wamala kwonogonywa. Niyiirana kumuleeta vulava uvudamanu ku Yahova. Mutaleeta uvwoni vwukuvihiliriza yivu mu kivala cha Yahova Nyasaye winyu muheezaa mba.

Malago gandi

⁵ “Lwu mundu asereraa mwiha weve, atavugulwa kuzia mu vutumiki vwi liihi mba; anaho miyinzi jindi jukutumikira avandu mba. Alava muvoholore komenya hango kulwu muhiga mulala, kuyaanziza mukali weve.

⁶ “Lwa mwegobiza mundu kindu, mutavugula lugina lwa asieraa ku vuswage vwivwe anoho isiu kuli kihambiliru mba. Likora ndio linyagaa vandu vinyumba yu mundu oyo inzira yokolomba chukulia ku vave mwoyo.

⁷ “Mundu woosi onyooleka niyivaa mundu wa Isiraeli wache weve, na amukole mutugwa weve, anoho amugulizi mu vutugwa, kuduuka yiitwe. Munzira yiyi mulatuliza uvudamanu yivu hagati hinyu.

⁸ “Lwa mulwaala vulwaye vwo ovogere, muve nagiligali kokora aga avasaalisi vi ihiiri ya Levi vamuvolera. Londa amigizu ga mali kumuha.

⁹ Mwizurizi aga Yahova Nyasaye winyu yakola ku Miriamu lwa mwaali nimutulaa Egebeti.

¹⁰ “Lwa mwegobiza mundu kindu choosi, mutazia munyumba yeeye kuvugura inguvu ya azizaa kumuha kuli kihambiliru mba.

¹¹ Musingiri ichova kandi mumuleke muletere kihambiliru umwene.

¹² Niiva aveeye mudaka, mutagona ni kihambiliru chiche mba.

¹³ Mulamwilanyira kihambiliru chiche vuli hamugorova, kunangwa ave unyala kogonera zinguvu zizie. Maku, alamusandiza, kandi Yahova Nyasaye winyu alayanzizwa ni munyi.

¹⁴ “Mutadambizi vatumikiri vatungwa, vaveeye vadaka kandi vi lienya ligali, kali nivaveeye vandu va Isiraeli vache vinyu anoho vageni vamenyi mu lilala ku madaala ginyu.

¹⁵ Vuli lidiku, liuva nilikiri koyeera, muvatuungi mitungu jie lidiku yilio. Venya mabese yago kandi vaviiki mioyo jaavo josi ku liganyoola. Gase nimuvula kuvatuunga, valanira ku Yahova kigira munyi, na mulava ni lihiolo liu vwoni.

¹⁶ “Aviivuli vatiitwa kigira uvwoni vokolwa na avana vaavo mba, kandi avana vatiitwa kigira uvwoni vokolwa na aviivuli vaavo mba. Mundu yiitwi vuzwa kigira vwoni vwa oyo umwene amali kokora.

¹⁷ “Mutachaminyi likalagirwa liu vulungi lia vageni anoho vavisandu mba; kandi mutavuguli inguvu yumukunzakali kuli kihambiliru mba.

¹⁸ Mwizurizi kumanya ndi mwaali avatugwa mu Egebeti, kandi Yahova Nyasaye winyu yamuvoholora kutura yo. Yicho nicho kigira nimuha lilaga yili.

¹⁹ “Lwa muva nimugesaa viukulia mu milimi jinyu kandi mwivilire viganda viuvuswage via mugesi, mutirani kuvivugula mba, muvileke kigira avageni, avavisandu anoho avakunzakali; kunangwa Yahova Nyasaye winyu aduuki kumugasiza mu miyinzi jamakono ginyu josi.

²⁰ Lwa muva nimwakamala kodoola makuyu ga muzeituni ginyu harara, mutirani kuvugura galekeywe inyima mba. Gaveeye aga vageni, aga vavisandu kandi aga vakunzakali.

²¹ Lwa muva nimwakavungiza mazabibu ginyu mutiirana mu vizabibu kandi lwa kaviri mba. Amazabibu gatigaye gaveeye ga avageni, avavisandu kandi avakunzakali.

²² Mutiviliri ndi mwaali avatugwa mu Egebeti mba. Yiki nicho kigiri inzi mali kumuha lilago yili.