Kwidzulitsa 23 - KITABU KITAKATIFU

Kuvula kuvalizilwa kuli vandu va Yahova

¹ “Musaza waladwa anoho wu vusaza vwivwe vwamala kukalwa sianyala kuvalizwa harara na avandu va Yahova mba.

² “Mundu woosi windasimba anoho kisukururwi chu mundu kuli uyu kuduuka ku likula lie likomi, sianyala kuvalizwa harara na avandu va Yahova mba.

³ “Mundu wa Amori anoho mundu wa Moabu anoho mulala ku kisukururwi chiche chi likomi, atingira mu livugana lia Yahova mihiga ni mihiga mba.

⁴ Vasuura kuhaana ku munyi chukulia na mazi lwa mwaali kunzira yinyu kutura mu kivala cha Egebeti, kandi valagana kutunga Baalamu muyaayi wa Beori, kutura mu lidaala lia Pezori mu kivala cha Mesopotamia, amulaame.

⁵ Navuzwa Yahova Nyasaye winyu siyaali anyala kuhuliriza Baalamu mba; mu vogono yivwo yagirung'anyia kilaamo zana nikigwa ligasizwa kigira yamuyanza.

⁶ Ku lohono lwa muveeye ihiiri mutenya kolomba mirembe anoho vokonyi ni zihiiri yizi mba.

⁷ “Mutalegerizi vandu va Edomu mba. Vaveeye aviiko vinyu. Mutachaaya vandu va Egebeti mba, kigira mwamenya kuli avageni mu kivala chavo.

⁸ Visukululwi viavo kutura ku likula lia kavaga vanyara kuvalizwa harara na avandu va Yahova.

Kunihiza ahokososa ha vasikari vi liihi

⁹ “Lwa muveeye ahokososa mu ing'inga yu vulwani, kuduuka mwerehe ligali ku vindu viosi ivinyala kumukola muvuli kuva valahi kolondekana nidini.

¹⁰ Niiva mulala ku munyi avasaza alagwa mudamanu kigira yaali kwelotera vudiku, kuduuka azie ichova wa hokososa na ave yo mbasu gwosi.

¹¹ Navuzwa lwa mugolova guduukaa, gamuduukira yisingi, ma yingiri hokososa liuva niliyeraa.

¹² “Kuduuka mulombe havundu ichova wa ahokososa aha munyala kuzia lwa mwenya kwekonya.

¹³ Mulava ni kisiri kuli kilala ku viuma vienyu cha munyala kulimira liliina lwa mwenya kwekonya, ma mwilirizi liliina zana kufuma mavi ginyu

¹⁴ mulombe ahokososa hinyu have halahi, kigira Yahova Nyasaye winyu agendaa hokososa hinyu kumukinga nokumuha uvuguuti ku avasigu vinyu. Mutakoli kindu kidamanu kinyala kokora Yahova amuleke mba.

Amalago gandi

¹⁵ “Niiva mutugwa yirukiyi ku ivi nu kwehonyia kutura ku uwamutuga, utamwilanyia ku munene weve mba.

¹⁶ Leka amenye hagati hoho, hoosi ahayaanza kandi mu lidaala liosi lia atovoraa na utava mululu kuye mba.

¹⁷ “Mundu wa Isiraeli musaza anoho mukali atava liraya mu Litembeli mba.

¹⁸ Mabese gi mitungu ju mukali anoho musaza muheyi gataleetwa munyumba ya Yahova Nyasaye winyu kutuunga kihanwa chi liesuuha ku liosi mba. Yahova avihiriraa malaya gu mu Litembeli.

¹⁹ “Lwa mwegobiza mundu wa Isiraeli wache winyu amabese anoho viukulia, anoho kindu kindi choosi, mutamuteeva atungili ku iviambeti mba.

²⁰ Munyala kutungiza chambeti ku kindu choosi cha mwegobiza mugeni; navuzwa sigaveeye ku mundu wa Isiraeli wache winyu mba. Mugumiri lilago yili na Yahova Nyasaye winyu alagasiza vindu viosi via mukora mu kivala cha muzizaa kuvugura.

²¹ “Lwa mulomba liesuuha ku Yahova Nyasaye winyu, mutasuula kutwekiza lilagana lilie mba, kigira Yahova Nyasaye winyu sialavula kumuvaanza mba, na galava vwoni ku ivi kuvula kulinda lilagana liilio.

²² Navuzwa niiva muvura kolomba lilagana lie liesuuha ku Yahova, sivulava vwoni ku munyi mba.

²³ Choosi chu minwa jinyu jitivuyi ku liesuuha, kuduuka mulole ndi muduukizi kigira mwalomba liesuuha lienyu mu liyaanza lienyu ku Yahova Nyasaye winyu iminwa jinyu vene.

²⁴ “Lwa muvitiraa mu mulimi gwi kizabibu chu mundu wundi, munyala kulia amazabibu goosi ga munyala, navuzwa mutagingi kali lilala mu vikabo vienyu mba.

²⁵ Lwa muvitiraa mu mulimi gwu vuswage gwumutende winyu, munyala kuvuunga viangala viu vuswage namakono ginyu mulie, navuzwa mutaviika engonono mugese vuswage zana mba.