Kwidzulitsa 22 - KITABU KITAKATIFU

¹ “Niiva olola eng'ombe anoho ligondi liu mundu wa Isiraeli wache niligota utalileka ligote mba, navuzwa ulilanyie ku mwene.

² Navuzwa niiva mwene lio amenyi ihale kuivi, anoho niiva siumanyi mwene lio, ulavihila yengo woovo na uliliindi. Lwumwene lio yaza kulienya, ulamuha.

³ Kola ndio kandi niiva onyoora ibunda ya amwavo woovo, inguvu yeeye, anoho vindu vindi viosi viu mundu wa Isiraeli wachie woovo.

⁴ “Niiva olola ibunda anaho eng'ombe yu mundu wa Isiraeli wache woovo igwiyi haasi, utageleka mba; ugekonye kugisingiriza.

⁵ “Avakali vativiika zinguvu zia vasaza mba, kandi avasaza vativiika zinguvu zia vakali kali hakuzu mba, kigira Yahova Nyasaye winyu yasura avandu vakora vindu kuli yivi.

⁶ “Niiva wakanyoola inyumba yi linyonyi ku musaala anoho haasi, anoho kunzira neveeye mu ni liinyia, niligoneye ku mavuyu anoho niliveeye navana valio, utavugula liinyia harara navana valio mba.

⁷ Unyala kuvugura vana valio, navuzwa oleke liinyia lizie, kunangwa uduuki komenya madiku manyingi kandi ove niliiva lilahi lielimeedeka nilizizagilira imbiri.

⁸ “Lwa wumbaka inyumba imbia, olombe lugaga lovodong'ane kwigulu kwinyumba, gase ulaleeta kisaahi kuduuka kunyumba yooyo niiva mundu alaguluka kutura ku ma akuze.

⁹ “Utataaga kitagwa kindi mu mulimi mulala mwere harara ni mizabibu mba. Niiva ulakola ndio, wigalira kutumikira makuyu ga mazabibu zana anoho gi vitagwa vindi zana.

¹⁰ “Utavoha eng'ombe ni ibunda harara kung'usa ligembe liu kulima mba.

¹¹ “Utiviika inguvu yalombwa mu lizuganyia uvwoya vwa magondi harara ni kitani mba.

¹² “Unave vuyuusi ku zimbega zine zie zikona zie zinguvu zizio.

Malago kigira liiva harara liu mukali nu musaza

¹³ “Niiva musaza alaleeta mukali kandi, niyakamara kuva naye, na siamwenyaa mba,

¹⁴ kandi amwononyiri lieta no kumuha lieta lidamanu naamuyaala ku kovora; ‘Ndaleta mukali uyu navuzwa ndaagona naye, sindamunyoora kuni kelolero choosi chu mukana mugima mba.’

¹⁵ Ahene yaho, aviivuli vu mukaana valavugula zisuka zie keserero zia masahi gaveeye ku kumanyia ndi mukaana yaali umugima, ku valazimanyia imbiri we kiyaalo ku avakulundu vi lidaala.

¹⁶ Baba mukaana alavolera avakulundu, ‘Ndaha musaza uyu mukaana wange ave mukali weve naye kalunu siamwenyaa mba.

¹⁷ Kalunu aviiki kuye amakuva guvugini na agi zisoni na avoora, ndi siyaali mugima lwa yamuleta. Navuzwa heenzi, yiki nicho kelolero chu lukana lwu vugima vwu mukaana wange!’ Maku aviivuli veve valalangaminya zisuka zekeserero ukwa masahi vugima gaveeye, imbiri wa vakulundu vi lidaala.

¹⁸ Kunangwa avakulundu vi lidaala valavugula musaza uyu vamuhe amageri.

¹⁹ Valamutungiza vidonye mia moja vie ifeza na vahane mabesa yago ku baba mukaana, kigira musaza zana oleeti makuva gi zisoni ku mukaana Umuisiraeli. Kali ndio, alazizagilira kuva mukali weve. Siaveeye mumunwa kumukunga madiku geege goosi aga akikiri mwoyo mba.

²⁰ “Navuzwa niiva amakuva gi kiyaalo yaga gaveeye agiligali, na sikeveeye ho nikindu kimanyia ndi mukaana yaali mugima,

²¹ hene yaho valahila mukaana zana ha kiliango chi inyumba ya baba weve, na avasaza vi lidaala lilie valamulasa magina akuze. Yamala kokora kindu chie zisoni hagati ha avandu viitu ku likolera ovoheyi munyumba ya baba weve, nakikiri kuzia lukali. Munzira yiyi mulatuliza uvudamanu yivu hagati hinyu.

²² “Niiva musaza alanyolerwa naagoni numukali wu musaza wundi, vombi viitwi. Munzira yiyi ulatuliza uvudamanu yivu mu Isiraeli.

²³ “Niiva musaza alanyooleka mu lidaala naagoni nu mukaana mugima uwaateevwa koleetwa nu musaza wundi,

²⁴ hene yaho vombi valahirwa ichova wi lidaala na valaswe amagina, vakuzi. Mukaana alakuza kigira siyaakuba zikwiri akonywe kali niyaali mu lidaala mba. Kandi musaza alakuza kigira yonogonyi mukali wu musaza wundi. Munzira yiyi, mulatuliza uvudamanu yivu hagati hinyu.

²⁵ “Navuzwa niiva musaza anyoora mukaana wateevwa nu kukwevwa mumbulimu ihale wi lidaala, kandi namugumira nokogona naye kuzinguru, musaza wakola inguuva yiyi aliitwa yeng'ine.

²⁶ Utakola kindu ku mukaana oyo mba, kigira siakoli uvwoni uvugira yiitwi mba. Amakuva yaga gaveeye vuzwa kuli agu mulala wingiliraa nukwita mutende.

²⁷ Musaza zana yagumira mukaana kuzinguru naagona naye; lwu mukaana yakuba zikwiri, sihaali ho numundu wamusola mba.

²⁸ “Niiva musaza yagana nu mukaana mugima utateevwa kandi namugumira kuzinguru no kogona naye, ma vanyooleke,

²⁹ alatungaa baba wu mukaana vukwi vwi vidonye amusini viefeza. Kuduuka amuleete kuva mukali weve, kigira yamala kumwonogonyia. Sialamukunga madiku gi livamwoyo lilie liosi mba.

³⁰ “Mundu woosi ataha baba weve zisoni ku ligona nu mulala ku vakali veve mba.