Kwidzulitsa 21 - KITABU KITAKATIFU

Liitwa litamanyikani

¹ “Niiva mundu alanyooleka mbulimu niyitiiywi mu kivala cha Yahova Nyasaye winyu amuhezaa na kandi sigamanyikani nivwaha umwiti,

² kuduuka aviimiliri na vakalagi vinyu vatuli ichova vazie kubima uvutambi vwo logendo kutura ahumuviri gonyooleki kuduuka ku madaala agaveeye ahimbi.

³ Kunangwa aviimiliri vi lidaala liveeye ahimbi ligali ku muviri gwa uyu witwa kuduuka vavuguli eng'ombe ikikiri kokora ku miyinzi josi kandi ikikiri kuvikwa ku iniira.

⁴ Gavadukiraa vagihili mwivona ahimbi nu mugera gwa mazi ugutakamaa kandi ahataalimwa ku kali hakuzu anoho kutaagwa kindu. Ahene yaho valavunanyira ho ligoti lie eng'ombe yeyo.

⁵ Avasaalisi vihiiri ya Levi, navo valiesuunda ahimbi kigira nivo ava Yahova Nyasaye winyu yatovola vamutumikiri kandi vagaasizwi vandu mu lieta lilie. Valakalaga kolondekana na makuva gaavo na makuva goosi aguvuhangalizani na aguvukubani.

⁶ Maku vimiliri vosi kutura mu lidaala liveeye ahimbi na havundu hu mundu witwa yanyooleka, valiisavira makono gaavo kong'ombe yi ligoti livunagiywi.

⁷ Kandi valavoora, ‘Kunyi sikwita mundu uyu kandi sikumanyi nivwaha wamwita mba.

⁸ Oh, Yahova, samiiha avandu vovo Isiraeli, ava wahonyia kutura Egebeti. Ukusamihi kandi utaleka liitwa liu mundu utaveeye nimbala live ku kunyi mba.’

⁹ Kunangwa mulikola aga Yahova yenya, simulavalizwa kuva ni lihiolo kigira liitwa yilio mba.

Avakali vahambe vu vulwani

¹⁰ “Lwa Yahova Nyasaye woovo ahaanaa liguuta mu vulwani, ma muvuguli avahambe,

¹¹ niiva wakalola hagati ha vahambe mukali wi ligondo lilahi ligali ma ukayirwi ligali kandi wenye kumuleeta ave mukali woovo,

¹² muhile yengo woovo, uwavegera liisu lilie, akale amasaanda geege,

¹³ kandi agirung'anyie zinguvu zizie. Kuduuka amenye hango hoho kandi asiomere aviivuli veve kulwu umweli mulala; inyima wa yago, unyala kumuleeta ave mukali woovo.

¹⁴ Lwi nyima, niiva siulayanzizwa naye mba, umuvugiliri azie naveeye umuvoholore. Utamukola mutugwa na umugulizi mba, kigira waamuniga kogona nivi.

Miandu ju muyaayi wukutanga

¹⁵ “Nigava mundu aveeye na vakali vaviri na vombi vamwivuliri avana vayaayi vaviri, navuzwa mwana wu kutanga avuli kuva wu mukali wayayaanza,

¹⁶ lwa akalagaa kugavulira avayaayi veve miandu javeeye najo, atahaana kidieli chu mwana wu kutanga ku mwana wu mukali wa yayanza mba.

¹⁷ Kuduuka avuguliri umwana watanga kwivulwa, umwana wu mukali utayaanzwa, amuhe vidieli viviri ku viosi viaveeye navio; muyaayi oyo aveeye kelolero chi zinguru ziu mwana watanga kwivulwa ziveeye zizie. Vulungi vwu muyaayi wu kutanga voveeye vwivwe.

Muyaayi Utahulira

¹⁸ “Niiva mundu aveeye nu muyaayi wi kirage kandi mwibaali utahulira mwoyo gwa aviivuli veve, kali ni vamuha mageri,

¹⁹ hene yaho aviivuli veve valamugumira na vamuhili imbiri wa vakulundu vi lidaala ku luhia ayaalwi.

²⁰ Valavoolera avakulundu, ‘Muyaayi wiitu uyu nu wikirage kandi mwibaali. Siakuhuliraa mba. Yononyia mabese kandi aveeye muhambika.’

²¹ Kunangwa avasaza vi lidaala vosi valamulasa na magina kuduuka akuzi. Kuduuka mutulizi uvudamanu yivu hagati hinyu. Vuli mundu mu Isiraeli alahulira agaamali kwekoleka, na alava nu vuti ligali.

Malago gandi

²² “Niiva mundu alakola uvwoni uvuduukanaa likuza, naye niyiitwa kandi muviri gwigwe gusuungwi ku musaala,

²³ muviri gwu mukuzu oyo gutagona ku musaala vudiku vwosi mba; kuduuka guyavilwi mu lidiku zana yilio, kigira usuungiywi, alamiywi na Nyasaye na munyi mutononyia kivala chienyu cha Yahova Nyasaye winyu yaaha munyi kuva miandu jinyu mba.