Kwidzulitsa 20 - KITABU KITAKATIFU

Malago Kolondekana nu vulwani

¹ “Lwa muturaa kuzia mu vulwani na vasigu vinyu kandi mulole magare gu vulwani, ni zibarasi kandi avasikari vi liihi avanyingi kuvita avinyu, mutavatia mba. Yahova Nyasaye winyu, uwamutuliza mukivala cha Egebeti, alava harara nimunyi.

² Nimukiri kutanga vulwaana, musaalisi alaza imbiri winyu, nokomoloma ku liihi,

³ navoora, ‘Avasaza va Isiraeli, muhuliri! Lidiku lia kalunu muziza muvulwani. Mutatia avasigu vinyu, anoho kukuza mioyo, anoho kodegera mba.

⁴ Yahova Nyasaye winyu niyie wimiraa kuzia harara nimunyi kumulwanira vasigu vinyu, aduuki kumuha liguuta.’

⁵ “Maku avanene va vasikari valavoolera liihi, ‘Nivwaha ku munyi umali kwumbaka inyumba imbia, navuzwa akikiri kugingiriza? Niiva gaveeye ndio, kuduuka yirani yengo weve, gase alakuzira mu vulwani na mundu wundi yingirizi inyumba yeeye.

⁶ Aveeye ho numundu woosi umali kutaga, kizabibu navuzwa siyanyoola ku vwiyangu vwu kuvuna amazabibu gacho? Niiva nindio, kuduuka azie yengo. Gase, alakuzira muvulwani, na mundu wundi alasangalira iwaini yago.

⁷ Ni mundu ki oveeye hano umali kuhamba mukali, navuzwa akikiri kumuleeta? Nigaveeye ndio, kuduuka yirani yengo weve. Gase alakuzira muvulwani, na musaza wundi amuhile.’

⁸ “Avanene vavasikali valameeda kovoolera avasikari vuvulwani: ‘Nivwaha oveeye nuvuti kandi nu mwoyo mudedekere? Nigaveeye ndio, kuduuka yirani yengo weve; Gase mioyo ja avamwavo veve jilakuza kuli mwoyo gwigwe.’

⁹ Lwa vanene vavasikali vamala komoloma ku liihi, valatovola nokuviika aviimiliri va vulii muganda gwi liihi.

¹⁰ “Lwa mwisuunda imbiri kwingilira lidaala linene, kutanga kuduuka muhaane ku avandu valio vwiyangu kwihana mu ligiinga makono kumanyia vaguutiywi.

¹¹ Niiva vavugilira kwegehiza mu ligiinga makono, ma vamwiguliri virivwa vielidaala zana, hene yaho, vosi avanyooleka mulio valagwa avatugwa vinyu kandi valaimukola miyinzi.

¹² Navuzwa niiva valasura kwihana kumunyi, kandi vatange limulwaana, maku mulakumbiriza nukuvugula lidaala yilio navasikari vinyu.

¹³ Maku lwa Yahova Nyasaye winyu aleka muvuguli lidaala zana, muliita avasaza vosi avaveeye mulio.

¹⁴ Navuzwa munyala kwivugulira aveene avakali, avana, mitugu nivindu viosi iviveeye mu lidaala yilio. Munyala kutumikira vindu viosi via vasigu vinyu. Yahova umali kuvihaana ku munyi.

¹⁵ Nindio gaduukanaa mukore ku madaala manene gaveeye ihale kutura ku munyi, mu kivala cha muzizaa komenya mu.

¹⁶ “Navuzwa lwa muvuguraa amadara manene gaveeye mu kivala cha Yahova Nyasaye winyu amuhezaa, mwiti vandu vosi.

¹⁷ Mudivizi avandu vosi ligali: Avahiti, Avaamori, Avakanaani, Avaperezi, Avahivi, kandi Avajebusi, kuli Yahova Nyasaye winyu yamulaga mukore.

¹⁸ Muviiti kunangwa vavuli kumukola mwone ku Yahova mu limwigiza mukore vindu viosi viukuvihiriza via vakora mu lisigamira avanyasaye vaavo.

¹⁹ “Lwa mugerizaa kuvugura lidaala linene, mutatemi misaala ja makuyu galio mba, kali niiva livugula lilavugula ing'inga indambi. Munyala kulia makuyu gajo navuzwa mutononyi misaala jalio mba kigira misaala ju mu mulimi sijiveeye avasigu vinyu mba.

²⁰ Munyala kotema misaala jindi josi ja mumanyi ndi sijiveeye jamakuyu mba, na mwumbe ulugaga lwukukonya kugumira lidaala lia ulwaana nalio kuduuka uliguuti