Kwidzulitsa 2 - KITABU KITAKATIFU

¹ Maku kwirana nikuzia mu changalangwe, nikolonda kunzira inzizaa kunyanza Inzakanyu kuli Yahova yaali nalagi; kandi kwavugula ing'inga indambi nikogendagendaa vuzwa mu kivala chi vigulu cha Edomu.

² “Maku Yahova yambolera

³ ndi kwakagendagenda mu kivala chi vigulu yiki ku ing'inga indambi, na kalunu gakuduukiraa kuzie kolovega lwa ivaale.

⁴ Yambolera mbane amalago yaga ku munyi, ‘Muveeye ahimbi kuvitira mu kivala chi vigulu cha Edomu, kivala cha aviiko vinyu va ihale, visukululwi va Esau. Valamutia navuzwa mwehenze ligali.

⁵ Mutatangizi uvulwani navo mba, kigira sindamuha kali imiita ndala yi kivala chavo mba, kigira ndaamara kuhaana ku visukululwi via Esau kivala cha Edomu kuva miandu jaavo.

⁶ Munyala kugura chukulia na amazi kutura kuvo.’

⁷ “Mwizurizi kuli Yahova Nyasaye winyu amali kumugaasiza mu vindu viosi viamumali kokora. Yamulinda ku mihiga arubaini lwa mwagendagenda kuvitira mu changalangwe kenene yiki, na simwadaka kindu mba.

⁸ “Kunangwa kwazizagilira no logendo, kuvitira halovega ha avaamitu viitu, visukululwi va Esau, avamenyaa mu kivala cha Edomu ihale kutura munzira ya Elaba kutura Elazi na Ezionigeberi kwazia mulovega lwi changalangwe cha Moabu.

⁹ Yahova yambolera; utadambiza avandu va Moabu, visukululwi va Loti mba, anoho kuvalwaana mba. Mali kuvaha lidaala lia Ari, kandi sinzizaa kuhaana ku munyi kivala chavo mba.”

¹⁰ Ihiiri ya avandu vanene na avizingulu ligali, avalangwa Emimu, vamenya mu Ari. Vaali avataambi kuli avandu va Anaki ihiiri yindi ya vandu vanene na avizingulu.

¹¹ Kuli avandu va Anaki navo kandi vamanyikana kuli Refaimu, navuzwa avandu va Moabu vavalanga avandu va Emimu.

¹² Avandu va Hori vamenya mu Edomu maziambiri, navuzwa visukululwi via Esau viavakunga, nividiviza ihiiri yaavo ma nivamenya mu, kuli avandu va Isiraeli navo lwinyima vakunga avasigu vaavo kutura mu kivala cha Yahova yamanya navaha kuva miandu jaavo.

¹³ “Kunangwa kwambuka mugera gwa Zeredi kuli Yahova yakovolera.

¹⁴ Yiji jaali mihiga salasini na nane kutura nikutula Kadeshi Barinea. Avasaza vosi vuvulwani, avi likula yilio vaali ni vaakuza, kuli Yahova yaali navooye valava.

¹⁵ Yahova yaazizagilira kuhing'ana navo kuduuka lwa yaali niyakadiviza vosi ligali kutura hokososa.

¹⁶ Inyima wa avasaza viliihi vosi vaali nivakakuza,

¹⁷ Yahova yakovolera,

¹⁸ ‘Kalunu kuduuka muvitiri mu kivala cha Moabu kolonda kunzira yi lidaala lia Ari.

¹⁹ Lwa muduuka ahimbi mu kivala cha avandu va Amoni, visukululwi va Loti, mutavadambiza anoho kutangiza uvulwani navo mba, kigira sinzizaa kuhaana ku munyi kivala cha ndaavaha kuva miandu jaavo mba.’ ”

²⁰ “Kivala yiki chamanyikana kandi kuli kivala cha Refaimu, lieta lia avandu vamenya yo ku maziambiri; Avandu va Amoni vavagulika lieta zamuzumimu.

²¹ Vaali avandu avizingulu ligali, kandi vatambi kuli vandu va Anakimu. Vaali avanyingi ligali kandi ihiiri yizingulu ligali. Navuzwa Yahova yavadiviza kunangwa avandu va Amoni vavugura kivala chavo kandi nivamenya mu.

²² Yahova yaali naakori kindu kilala chere kigira avandu va Edomu, kisukururwi cha Esau, avamenyaa mu kivala chi vigulu cha Edomu. Yadiviza vandu va Hori kunangwa vandu va Edomu vavuguli kivala chavo icha vamenyi mu kali kuduuka kalunu.

²³ Kivala chukulujinga lwinyanza ya Meditareniani choosi, avandu kutura mu kisulu cha Kerete vamenya mucho. Vaali nivamali kudiviza vandu va Aviyi avamenyaa mu cho kutura mulitanga, kandi vaali nivavugura kivala chavo choosi kuduuka mu lidaala lie isavaalu lia Gaza.

²⁴ “Inyima wa kwaali nikwakavitira mu kivala cha Moabu, Yahova yakovolera, ‘Kalunu tangi logendo mwambuki mugera gwa Arinomu. Ndamuguutira Sihoni, Muamori, mwamihi munene wa Heshiboni, harara ni kivala chiche. Mumwingiliri, mulwaane naye kandi muvuguli kivala chiche mumenye mu.

²⁵ Kutura kalunu kuzizagilira imbiri, ndakora avandu vosi havundu hoosi vamutie. Vuli mundu aladegera nu vuti ku litala lieta lienyu.’

Avandu va Isiraeli vaguuta Mwami Sihoni

²⁶ “Maku, ndaatuma avatumwa kutura mu changalangwe cha Kedemozi kuzia ku Sihoni Mwami munene wa Heshiboni, namakuva gi mirembe yaga:

²⁷ ‘Kohe munwa kuvitiri mu kivala chicho. Kulavitira mu vulungi, na sikulaleka inzira mba.

²⁸ Kulatunga viukulia viosi via kulia na amazi ga kunwa. Ichakwenyaa vuzwa ni kuvitira mu kivala chicho,

²⁹ kuduuka lwa kwambuka mugera gwa Jorodani kuzia mu kivala cha Yahova Nyasaye wiitu akohezaa. Visukululwi via Esau viamenyaa mu Edomu kandi avandu va Moabu avamenyaa mu Ari vakuvugilira kuvitira mu kivala chavo.’

³⁰ “Navuzwa mwami Sihoni, siyaali anyala koleka kuvitiri mu kivala chiche mba. Yahova Nyasaye winyu yamukola kuva mudinyu kandi yamukola kuva ni liebaala, kunangwa kuduuki kumuguuta kandi kuvugura kivala chiche icha kokemenyi mu kuduuka kalunu.

³¹ “Maku Yahova yambolera, ‘Henza, mali kolola mwami Sihoni harara ni kivala chiche kuva vugira zinguru imbiri winyu. Vuguli kivala chiche mumenye mu.’

³² Sihoni yatura ichova harara na vasaza vi liihi veve vosi kukulwaana ahimbi ni lidaala lia Jahazi,

³³ navuzwa Yahova Nyasaye wiitu yamuvika hasi hi zinguru zietu, kwamwiita, harara na vayaayi veve kandi avasaza vi liihi vosi.

³⁴ Ku Ing'inga ndala nzere kwagumira kandi nikudiviza vuli lidaala, nikwita, avasaza vosi, avakali, kandi avana. Sikwaleka kali mulala.

³⁵ Kwavugula zing'ombe ziavo kandi nikulaanya madaala gaavo goosi.

³⁶ Yahova Nyasaye wiitu yakoleka nikuvugula madaala goosi kutura Areeri liveeye kundulu kwi livona lia Arinoni, nilidaala liveeye hagati hi livona kali kuduuka Gileadi. Sihaaliho ni lidaala lie lidigi litambi iliatigala mba. Yahova Nyasaye wiitu yagaviika hasi hi zinguru zietu.

³⁷ Sikwisuunda ahimbi ni kivala cha vandu va Amori, zimbega ziosi ziu mugera gwa Jaboku, anoho ku madaala gi kivala chi vigulu anoho havundu handi hoosi ha Yahova Nyasaye wiitu yakulaga kuvuli kuzia yo mba.