Kwidzulitsa 18 - KITABU KITAKATIFU

Kidieli cha Vasaalisi

¹ “Ihiiri ya Levi itava ni kidieli chi kivala mu Isiraeli mba. Muvogono yivwo valalia vihaanwa ni visiuviliru vindi, ivihaanwa ku Yahova.

² Vatava nimiandu ji milimi kuli zihiiri zindi mba. Kidieli chavo keveeye uvugasu vwu kuva avasaalisi va Yahova, kuli Yahova yavasuuviriza.

³ “Yiki kilava kidieli cha Avasaalisi kutura ku avandu avahaana vihaanwa niiva ni igiriki anoho ligondi, musaalisi alahevwa kinama chimbiri, ni zisaya ziombi, ni kifu.

⁴ Kuduuka vanyoore makuyu gukutanga gu vuswage vwinyu, iwaini imbia, maguta mahia nuvwoya vwukutanga vwa magondi ginyu.

⁵ Yahova Nyasaye winyu yatovola ihiiri ya Levi kutura mu zihiiri ziosi zia Isiraeli vamutumikiri kuli avasaalisi mihiga ni mihiga.

⁶ “Mundu wi ihiiri ya Levi woosi uva niyenya kutura mu madaala ginyu ga Isiraeli hamenyi, anyala kuzia lwayenyi havundu ha Yahova alitovola.

⁷ Kandi anyala kutumika ho kuli musaalisi wa yahova Nyasaye weve, kuli vandu vi ihiiri ya Levi kandi avatumikaa imbiri wa Yahova.

⁸ Kuduuka anyoore kidieli kilala chere chi chukulia kuli avasaalisi vandi na anyala kuviika choosi cha vandu vinyumba yeeye vamutumira.

Lieganihiza ku miima

⁹ “Lwu muduuka mu kivala cha Yahova Nyasaye winyu amuhezaa, mutalonda miima nilikola lidamanu lia vandu vi zihiiri vaveeye mu mba.

¹⁰ Mutahaana avana vinyu kuva kisiuviriru chukusambwa mu muliru ku vwali vwinyu mba; kandi mutaleki avandu vinyu vakole uvusigitiri mba anoho kohenza zingavi zindamanu,

¹¹ anoho kokora ovologi kwikinga kovologi, kandi mutavaleka vatevelerizi mioyo ja vakuzu mba.

¹² Yahova Nyasaye winyu adunyiraa avandu vakora vindu viukuvihiliriza yivi, kandi yicho nicho kigira akunga zihiiri yizio vatuli mu kivala yicho muvingilira.

¹³ Muve avasuuvirifu ku Yahova Nyasaye winyu.”

Lisuuviriza kutuma muporofeti

¹⁴ Maku Musa yavoola, “Mu kivala cha muveeye ahimbi kuvugura, avandu vizihiiri yizio vaanala kolonda liemilirwa ni zing'anagani izia yavo avakolaa vusigitiri nivenyereriza zingavi zindamanu. Navuzwa Yahova Nyasaye winyu siamuvugiliraa mukore ndio mba.

¹⁵ Muvogono yivwo Yahova Nyasaye winyu alamutumira muporofeti kuli inzi kutura mu vandu vinyu, na munyi kuduuka mumuhuliri.

¹⁶ “Ku lidiku lia mwavuganywa ha kiguru cha Sinai, mwateeva muvuli kuhulira Yahova, Nyasaye witu naamuloma kandi muvuli kolola liiva lilie liu muliru munene kigira mwatia ndi mulakuza

¹⁷ Kunangwa yahova yambolera, ‘Vamali koteeva liteeva lilahi liovogeri.

¹⁸ Ndavatumira muporofeti kuli ivi kutura hagati ha avandu vaavo. Ndamuvolera icha avoora naye alavolera avandu vindu viosi via inzi mulaga.

¹⁹ Alamoloma mu lieta liange, kandi ndahaana amageri ku mundu woosi usulaa kumuhulira.

²⁰ Navuzwa niiva muporofeti woosi aluvilira komoloma likuva mu lieta liange ku lihindagiliza lwa inzi mburi kumulaga akole ndio, kuduuka akuzi kigira agene yago, nandio kandi muporofeti woosi amolomaa mu lieta lia avanyasaye vandi kuduuka akuzi.’

²¹ “Munyala kogenya kuli monyala kumanyiriza niiva likuva liu muporofeti silitulaa ku Yahova.

²² Niiva muporofeti amolomaa mu lieta lia Yahova, na agaavoola gavuli kwekoleka, maku, likuva yilio siliveeye kutura ku yahova mba. Muporofeti oyo umali komoloma ku vunyali vwivwe na munyi mutamutia mba.