Kwidzulitsa 16 - KITABU KITAKATIFU

Lipasaka

¹ “Mulindi mweli gwa Abibu, kandi muve ni lisavo lie Lipasaka lia Yahova Nyasaye winyu, kigira mweli gwa Abibu lwa Yahova Nyasaye winyu yamutuliza mu kivala cha Egebeti mu ing'inga yu vudiku.

² Muzie havundu harara hu kusigamira Yahova, na mwitiri yo lilala ku magondi anoho zing'ombe kigira chukulia ichi Lipasaka kuhaana luyali ku Yahova Nyasaye winyu.

³ Lwa muva nimulizaa chukulia yiki, mutalia harara nu mugadi gwalomberwa mu mamera mba. Ku madiku saba kuduuka mulie mugadi gutaveeye mu na mamera, kuli mwakora lwa mwatula Egebeti mu lididikana kuli yilio. Mulie mugadi yigu, kigira gulalangwa mugadi gwu vusaliri, kunangwa ku madiku ga muveeye mwoyo, mwizurizi lidiku lia mwatula Egebeti, kivala chuvusaliri.

⁴ Ku madiku saba mulala ku munyi atanyooleka ku na mamera munyumba yeeye mu kivala chienyu choosi mba; kandi inyama yi kisiuviriru cha mwiti hamugorova gwi lidiku liu kutanga kuduuka iliivwi uvudiku vulala vwere yivwo.

⁵ “Mutiitiri kisiuviriru chiinyu chi Lipasaka mu lilala ku madaala ga Yahova, Nyasaye winyu alimuha mba;

⁶ nihataveeye havundu harara heng'ine hukusigamira, aha Yahova yatovola. Hene yaho kuduuka mwitiri ho kisiuviriru chienyu chi Lipasaka hamugorova, liuva niliyeraa, ku ing'inga yi lidiku lie litula lienyu mu kivala cha Egebeti.

⁷ Kandi mudeeke inyama zana nukugiliira havundu harara hukusigamira; ma mwirane yengo mugamba gwi lidiku lilonda ku.

⁸ Ku madiku sita, galonda ku, mulalia mugadi gutaveeye mu namamera mba. Ku lidiku lia saba, mulava nilivugana linene liukusigamira Yahova Nyasaye winyu, kandi mutakoli miyinzi josi ku lidiku liene yilio mba.

Lisavo lie ligesa

⁹ “Valiza masiza saba kutura ing'inga mutanga kogesa uvuswage,

¹⁰ Maku mulombe lisavo lie Ligesa kuhaana luyali ku Yahova Nyasaye winyu ku limuleetera kihanwa chu vwihaani kolondekana ku vugasu vwa Yahova Nyasaye winyu amali kumuha.

¹¹ Musangare imbiri wa Yahova Nyasaye winyu harara na avana vinyu, vatumikiri vinyu kandi vandu vinyumba ya Levi avageni, avavisandu kandi avakunzakali vamenyi mu madaala ginyu. Mukore yaga goosi havundu harara hukusigamira ha Yahova yatovola.

¹² Mwizurizi ndi mwaali avatugwa mu Egebeti; muhenze vulahi malago yaga goosi.

Lisavo lia madiri

¹³ “Inyima wa muva nimwakamala kuhuura nokoteera uvuswage vwinyu vwosi, nukukamulira amazabibu ginyu goosi, mulombe lisavo lia madiri ku madiku saba.

¹⁴ Musangaliri lisavo yilio harara na avana vinyu vatumikiri, kandi na vandu vinyumba ya Levi, avageni, avavisandu navakunzakali vamenyi mu madaala ginyu.

¹⁵ Muhaane ku Yahova Nyasaye winyu luyali ku lilomba lisavo ku madiku saba havundu harara hukusigamira ha Yahova yatovola. Musangare kigira Yahova umali kugasiza ligesa lienyu kandi miyinzi jinyu.

¹⁶ Avasaza vosi vi ihiiri yinyu kuduuka vaze kusigamira Yahova, Nyasaye winyu haali kavaga ku muhiga havundu harara hukusigamira ha Yahova yatovola, ku ing'inga yi lisavo lie Lipasaka, lie Ligesa kandi lisavo lie Vidioli. Vuli musaza kuduuka aleete kihanwa, vataaza imbiri wa Yahova makono meere mba.

¹⁷ Sa mulala kuli anyaliza, kolondekana nu uvugasu vwa Yahova Nyasaye winyu amali kumuha.

Ovotovoli vwa Avakalagi

¹⁸ “Mutovole avakalagi na vatumikiri vandi mu vuli lidaala lia Yahova Nyasaye winyu amuha. Avasaza yava kuduuka vakalagili avandu vugira liyaanzilira.

¹⁹ Mutachaminya uvulungi! Mutamanyia liyaanzilira vandu valala kuvita avandi mulikalaga mba! Anoho mutavugilira kuvugura viambeti mba, kigira viambeli vivakulizaa zimoni kali zia avageri kandi avasuuvirifu, vichaminyaa amakuva gu mundu mulungi mu kiyaalo.

²⁰ Mulalonde uvulungi vweng'ine; kunangwa muduuki komenya mu kivala cha Yahova Nyasaye winyu amuhezaa.

Kusigamira avanyasaye

²¹ “Lwa mulombera Yahova Nyasaye winyu uvwali mutaviiki kifananyi chu musaala chu munyasaye wikikali Ashera ahimbi navwo mba.

²² Kandi mutasingirizi itiiru yi ligina kigira kifananyi chu kusigamira mba; Yahova Nyasaye winyu avidunyiraa.