Kwidzulitsa 14 - KITABU KITAKATIFU

Kusiomera Vakuzu

¹ “Munyi muveeye avandu va Yahova Nyasaye winyu. Kunangwa lwa musiomeraa avakuzu, mutisalaga miviri jinyu aveene anoho kovega amasu imbiri wi mitwi jinyu kuli avandu vandi vakora mba.

² Muveeye avandu vatovole va Yahova Nyasaye winyu. Kutura mu vandu vosi ku lirova, Yahova umali kotovola munyi muve avandu veve mwene.

Zinyama zindahi ni zindamanu zinifu

³ “Mutalia kindu choosi cha Yahova yavoola keveeye kidamanu mba.

⁴ Yizi nizio zinyama zia munyala kulia: Eng'ombe, ligondi, imburi,

⁵ embongo ne kisusu.

⁶ Munyala kulia inyama ku yoosi eveeye ni zimbagayu ziavukana hagati kaviri, ni iziliiza igamuura.

⁷ Navuzwa mutalia inyama yoosi iyavula kwavukanywa zimbagayu ziayo haali kaviri mba, kandi iliiza igamura mba ingamia, ikitoyoni. Kuduuka zimanyikane kuva zindamanu ku munyi. Ziliizaa igamura, navuzwa siziveeye ni zimbagayu ziavukanywa mba.

⁸ Mutalia zinguruvi mba. Ziveeye zindamanu kigira kali niziavukana zimbagayu, navuzwa sizilizaa igamuura mba. Mutalia ku zinyama yizi kandi mutadiira ku miviri mikuzu jazio mba.

⁹ “Munyala kulia lugano lwosi lwi zisuzi iziveeye nivivehe kandi na magambaya,

¹⁰ navuzwa ku vindu viosi vimenyi mu mazi vitaveeye kandi na magambaya, vitaliivwa mba, kaduuka vimanyikane kuva vidamanu ku munyi.

¹¹ “Munyala kulia linyonyi liosi iliveeye lilahi.

¹² Yizi nizio zing'ano zia manyonyi gataveeye malahi: indizu, vihuungu,

¹³ viliiza, lugaka, liive,

¹⁴ majikoro, no kuzing'ano ziago

¹⁵ imbugavuga, kikuni, kuli zing'ano ziago,

¹⁶ livuudu, likuuli,

¹⁷ esooti,

¹⁸ liguungu, ling'ang'a ku zing'ano ziago, ne lihuu kandi linyinya.

¹⁹ “Viguguli vimolaa viosi iviveeye na mavaha viveeye vidamanu, mutavilia mba.

²⁰ Munyala kulia viguguli viezimbaha ku viosi iviveeye vilahi.

²¹ “Mutalia inyama ya munyoora nikuzi iyeene mba. Munyala kuhaana kuavageni vamenya hagati hinyu valie; anoho munyala kugulizira avageni vandi. Navuzwa munyi muveeye avandu va Yahova Nyasaye winyu. “Mutasinzi kememe chimbuli anoho ligondi nikinuuna mba.

Lilago lie izaka

²² “Mulaviika halovega izaka kidieli chi likomi ku limeedeka lie ligesa lie milimi jinyu vuli muhiga.

²³ Maku muzie havundu harara, aha Yahova Nyasaye winyu amali kotovola asigamirwi ho; kandi uwene yeyo imbiri weve, mulie izizaka ziu vuswage vwinyu, iwaini yinyu, na maguta ga muzeituni kandi iviukutanga kwivulwa vie zing'ombe na magondi. Mukore ndio kunangwa muduuki kwiga kuli munyala kuhaana luyali ku Yahova Nyasaye winyu kazozo.

²⁴ Navuzwa, niiva havundu hukusigamira ha Yahova Nyasaye winyu yatovola haveeye ihale ligali kutura hango hoho, uwa mutanyala kuginga izaka yi viamo vienyu via Yahova amugasizi navio, maku mulakola ndi:

²⁵ Mugulizi viamo vienyu ma muvuguli mabesa zana mugahile havundu harara ahukusigamira aha Yahova Nyasaye winyu amali kotovola.

²⁶ Mulagatumikira ku choosi chamwenyaa, inyama yeng'ombe, yi ligondi, iwaini, chukunwa anoho kindu choosi cha mwenya na uwene yeyo, munyi harara na avizinyumba vinyu mulalira yo na mwisangalizi aveene imbiri wa yahova Nyasaye winyu.

²⁷ “Mutiviliri vandu vinyumba ya Levi avamenyaa mu madaala ginyu mba. Sivaveeye nikidieli anoho nimiandu jaavo aveene mba.

²⁸ Mulimaliriza, vuli muhiga gwa kavaga mulaleeta izaka yi viamo muvivungizi mu madaala ginyu.

²⁹ Chukulia yiki keveeye cha vandu vinyumba ya Levi vosi, kigira sivaveeye ni kidieli anoho miandu jaavo aveene mba, kandi cha avageni, avavisandu, kandi avakunzakali avamenyi mu madaala ginyu. Kuduuka vaze vavuguli choosi cha venya. Mukore ndio, na Yahova Nyasaye winyu aduuki kumugaasiza mu viosi via mukora.