Kwidzulitsa 12 - KITABU KITAKATIFU

Havundu, hukusigamira

¹ “Yaga nigo malago agadukanaa mulonde muhuliri madiku goosi ga muveeye mwoyo mu kivala cha Yahova Nyasaye wa vaguuga vinyu amuhezaa mugalonde.

² Gamudukira ligali havundu hoosi ha avandu vi zihiiri zindi vaasigamira avanyasaye vaavo ku vigulu vitambi, nokutugulu kandi isi wi misaala mivisi.

³ Saambuli vwali vwavo, mwononyie ligali minaara mitakatifu jaavo ja magina, musaambe vifananyi viavo viu munyasaye wikikali Ashera kandi mutemanyie vifananyi viavo, kunangwa valavuli kuvisigamira kandi.

⁴ “Mutasigamiri Yahova Nyasaye winyu kuli avandu yava vasigamira avanyasaye vaavo mba.

⁵ Kutura mu kivala chi zihiiri zienyu ziosi, Yahova alatovola havundu harara haduukana avandu vosi vazie imbiri weve nu kumusigamira ho.

⁶ Mulahila yo visiuviliru vienyu viu kusambwa nivisiuviliru vienyu vindi, nezizaka zienyu nevihaanwa vienyu viduukiru, nevihaanwa viamwalagana na Yahova, vihaanwa viuvwihaani kandi vihaanwa viukutanga ivivulwa mu viayo vienyu vie zing'ombe kandi viamangodi.

⁷ Hazana yaho, Nyasaye winyu, umali kumugaasiza, munyi harara na avizinyumba zienyu, mulalira nokusangalira vindu vilahi viamumali kuyinzira aku vudinyu.

⁸ “Lwing'inga yeyo iduuka, mutakolaa kuli mwakolangi mba. Kuduuka kalunu, munyi mwosi mwasigamiraa Yahova vuzwa kuli muyanzaa

⁹ kigira mukikiri kwingira mu kivala cha Yahova Nyasaye winyu amuhezaa, uwa mulimenya mumirembe kandi mumuvwelemerizi.

¹⁰ Lwa mwambuka mugera gwa Jorodani, Yahova Nyasaye winyu alaleka muvuguli kivala zana kuva miandu kandi mulamenya yo. Alamukinga kutura ku vasigu vinyu vosi na mulamenya mu ni mirembe.

¹¹ Yahova Nyasaye winyu alatovola havundu harara heng'ine haduukana, ha asigamirwa, kandi ahene yaho, kuduuka muleete ho kuye vindu viosi via inzi mali kumulaga: visiuviliru vienyu viukusambwa kandi visiuviliru vienyu vindi, zizaka zienyu kandi vihaanwa vidukiru via mwalagana na Yahova.

¹² Musangaliri uwene yeyo imbiri wa Yahova Nyasaye, munyi harara na avana vinyu vayaayi na vakana, avatumikiri vinyu vasaza na vakali, kandi vandu vinyumba ya Levi sivalava ni milimi jaavo aveene mba.

¹³ Mwilindi gase mulahaana visiuviliru vienyu viu kusambwa vuli havundu hoosi ha muloraa;

¹⁴ Kuduuka muvihaane vuzwa havundu harara heng'ine ha Yahova alitovola mu kivala kilala chi zihiiri zienyu aveene. Hazana yaho niho aha muhaanira visiuviliru vienyu viu kusambwa, kandi mulakolera ho goosi aga ndamulaga.

¹⁵ “Navuzwa muveeye avavoholore ukwita nu kulira zinyama zienyu hoosi ha mumenyi. Munyala kulia zinyingi kuli Yahova Nyasaye winyu amuha. Munyi mwosi, avalahi na vadamanu kolondekana ni miruka jidiini, munyala kulia inyama ye embongo ni inyama yi kisusu.

¹⁶ Navuzwa mutatumikira masahi gazio kuli chukulia mba; kuduuka mugasundule ichova ku marova kuli amazi.

¹⁷ Mutaliira ku vihaanwa via muhaanaa ku Nyasaye mu madaala ginyu aha mumenyi mba: kali niiva izaka yuvuswage vwinyu anoho iwaini yinyu, anoho ya maguta gamuzeituni, anoho mitugu jitanga kwivulwa jie zing'ombe anoho magondi, anoho vihaanwa via mwalagana na Yahova anoho vihaanwa vienyu viu vuyanzi anoho vihaanwa vienyu vindi.

¹⁸ Munyi harara na avana vinyu, vatumikiri vinyu harara na vandu vinyuma ya Levi avamenyi mu madaala ginyu kuduuka muliri vihaanwa vienyu imbiri wa Yahova Nyasaye winyu havundu harara heng'ine hatovolwa kusigamira Yahova Nyasaye winyu. Mulasangalira uwene yeyo imbiri wa Yahova Nyasaye winyu ku viosi viamumali kokora.

¹⁹ Muhenze vulahi ligali, gase mulaleka vandu vinyumba ya Levi mu madiku goosi ga mumenya mu kivala chienyu.

²⁰ “Lwa Yahova, Nyasaye winyu, avambalaliza kivala chienyu kuli yamusuuviriza muveeye vavoholole kulia inyama kuli munyala.

²¹ Niiva havundu harara hukusigamira yaho haveeye ihale ligali kutura ku munyi, maku, lwa muva nimwenya inyama, munyala kwita ndala ku zing'ombe anoho magondi ga Yahova amali kumuha, kandi munyala kulira inyama zana hango, kuli mali kumuvolera.

²² Mundu woosi, oveeye mulahi anoho mudamanu kolondekana ni miruka jidiini anyala kulia inyama yeyo, kuli anyala, inyama yikisusu anoho ye embongo.

²³ Mutalia inyama na masahi gakiri mu mba, kigira livamwoyo liveeye mu masahi; kandi mutalia livamwoyo harara ninyama mba.

²⁴ Mutalia masahi yago mba. Mugasunduli ichova ku marova kuli amazi.

²⁵ Nimulonda lilago yili, Yahova alayanzizwa na goosi galava malahi ku munyi harara ni visukululwi vienyu.

²⁶ Vuguli zisadaka zienyu ni vihaanwa viosi via mwalagana kuhaana ku Yahova, muhiri havundu hukusigamira Yahova.

²⁷ Muhaane visiuviliru vienyu viu kusambwa viduukana kusaambirwa ku uvwali vwa Yahova. Amasahi gi visiuviliru vienyu kuduuka guufwi ku vwali vwa Yahova Nyasaye winyu; navuzwa munyala kulia inyama.

²⁸ Mwilindi kandi muhuliri malago ga muheezaa yaga, kunangwa muduuki kuva vulahi harara ni visukululwi iviizaa inyima winyu mihiga ni mihiga, kigira mulava nimukoraa agaveeye malahi kandi gukuyaanzi Yahova, Nyasaye winyu.

Lieganihiza ku Vifananyi

²⁹ “Yahova Nyasaye winyu aladiviza zihiiri ziosi lwa mwingiliraa kivala chavo, kandi mulakivugula no komenya mucho.

³⁰ Inyima wa Yahova kudiviza zihiiri yizio imbiri winyu, mulole ndi muvuli kolonda miima ji zidiini ziavo, kigira yivu vulava vuhimwa. Mutageriza kwenyeleriza kumanya kuli vasigamira avanyasaye vaavo, kunangwa musigamiri munzira ndala nzere mba.

³¹ Mutasigamira Yahova Nyasaye winyu kuli yavo vasigamira avanyasaye vaavo mba, kigira mu lisigamira avanyasaye vaavo, vakora vindu viukuvihiliriza zing'ano ziosi via Yahova adunyiraa. Kali vahaana avana vaavo kuli visiuviliru mu muliru ku vwali vwavo.

³² “Mukore goosi aga mali kumulaga; mutameeda kindu choosi kugo anoho kutuliza ku kindu choosi mba.