Kutwula 9 - KITABU KITAKATIFU

Likuza lie Mitugu

¹ Yahova yavolera Musa, “Zia ku Mwami umuvolere ndi Yahova, Nyasaye wa Vaheburaina, avoora, ‘Leka avandu vange vazie, kunangwa vaduuki kusigamira.

² Niiva ulasuula koleka vazie,

³ ndakuha amageri ku lileeta vulwaye vwu kutihiza ku mitugu jijo josi ku zibarasi, zibunda, zing'amia, zing'ombe, magondi kandi ku zimburi.

⁴ Ndaviika ho liavukanyia hagati hi mitugu ja vandu va Isiraeli ni ja vandu va Egebeti, nu umutugu gwosi gwa avandu va Isiraeli sigulakuza mba.

⁵ Inzi, Yahova, mali kulaga mugamba eve ing'inga ya ngola yaga.’ ”

⁶ Lidiku lialonda ku Yahova yakola kuli yaali navooye. Mitugu josi ja vandu va Egebeti jaakuza, navuzwa imitugu ja vandu va Isiraeli sijakuza ku kali mulala mba.

⁷ Mwami yateeva ichaali nichekoleki, na yavolerwa ndi umutugu kali mulala gwa vandu va Isiraeli sigukuzi ku mba. Navuzwa yadinyia umwoyo, gwigwekandi navula koleka avandu vazie.

Amaduywa ga Amavimba

⁸ Maku Yahova yavolera Musa na Haruni, “Vugula ligoke mumukono nigwizuyi kutura mu kisambiru; Musa alaliuha mwigulu imbiri wu Mwami.

⁹ Nalio lilasalika kuli uluguuki ku kivala choosi cha Egebeti; na havundu hoosi haligwa lilaleeta amavimba agagirung'ana kugwa zingwagu ku vandu kandi kumitugu.”

¹⁰ Navo vaavugura ligoke nivasingira nalio imbiri wu Mwami, Musa yaaliuha mwigulu, nalialeta amavimba agagirung'ana nigagwa zingwagu ku avandu kandi ku mitugu.

¹¹ Avakumu sivali vanyara kololeka imbiri wa Musa mba, kigira amavimba gaali nigavamaliyi kuli vandu va Egebeti vandi.

¹² Navuzwa Yahova yakola mwoyo gwu Mwami kuva mudinyu kandi, kuli Yahova yaali navooye mulitanga ndi, Mwami sialahulira Musa na Haruni mba.

Amaduywa ga Amagina gimbula

¹³ Maku Yahova yavolera Musa, “Vuka mugambazuri wagane nu Mwami na umuvolere ndi Yahova, Nyasaye wa Avaheburaina, avoora, ‘Leka avandu vange vazie, vaduuki kusigamira.

¹⁴ Ing'inga yiyi sindaleeta amaduywa ku vatumikiri vovo kandi ku avandu vovo venyine mba, navuzwa ndahaana mageri kali ku ivi mwene, kunangwa uduuki kumanya ndi sihaveeye ho nu wundi kuli inzi mu lirova liosi mba.

¹⁵ Ndava nindanyiira mukono gwange kuduya ivi harara na avandu vovo nu vulwaye vudamanu, ngano mwadivizwa ligali.

¹⁶ Navuzwa kukumanyia zinguru ziange inzi mali koleka ivi ove mwoyo, kunangwa lusuma lwange luduuki kulanda mu lirova liosi.

¹⁷ Kali ukikiri mwigingiri na usuyi koleka avandu vange vazie.

¹⁸ Mugamba ing'inga kuli yinu inzi ndakubiza imbura enene ya magina, ikikiri kuva ku ho mu Egebeti kali lidiku lindi kutura lilombwa lie kivala.

¹⁹ Kalunu uhaane amalago kumitugu jijo ni vindu viosi via oveeye navio iviveeye mumilimi, vingilizwi mu zinyumba. Amagina gimbula galakuba ku avandu nukumitugu jiliva nijilekeywe vugira kukingwa, na viosi vilakuza.’ ”

²⁰ Valala ku vatumikiri vu Mwami vaali nuvuti kigira aga Yahova yaali navooye, na valeta avatugwa kandi mitugu mu zinyumba kwigama.

²¹ Avandi, sivahulira lieganihiza lia Yahova yavaha mba, ma nivaleka mitugu kandi avatugwa vaavo ichova.

²² Maku Yahova yavolera Musa, “Ginga mukono gugwo mwigulu, kandi amagina gimbula galakuba, mukivala choosi cha Egebeti, ku vandu, ku mitugu kandi ku vitagwa ni misaala.”

²³ Kunangwa Musa yaginga imbimbu yeeye mwigulu, kandi Yahova yatuma inguba kandi imbura yamagina kandi oloheni lwakuya lirova. Yahova yatuma

²⁴ imbura enene ya magina, noloheni lwaaka imbiri ninyima. Gwaali umuliviti munene gwimbula gwavula kololeka ku mu Egebeti ing'inga yindi kutura nekolwa ihiiri.

²⁵ Imbura yamagina yaduya vindu viosi iviali mu kivala cha Egebeti, harara na vandu, kandi ni mitugu josi. Yatura hasi vitagwa viosi mu milimi nivunanyia misaala josi.

²⁶ Kivala cha Gosheni, mwa avandu va Isiraeli vamenya niho havundu havula kuva niimbura ya magina.

²⁷ Maku mwami yatumana Musa na Haruni navoora, “Ing'inga yiyi mali kokora uvwoni; Yahova aveeye mulungi, na Inzi harara na avandu vange kokoli vudamanu.

²⁸ Musaale ku Yahova! Lihiligana linene lienguba kandi imbura ya magina viduuchi! Inzi musuuviriza ndi ndaleka muzie. Simulava hano kandi mba.”

²⁹ Musa yamuvolera, “Nonoho lwa mba nindakatula mu lidaala linene linu, ndaginga amakono gange igulu mu lisaala ku Yahova. Lihiligana lie inguba kandi imbura ya magina vilalekera, kunangwa muduuki kumanya ndi lirova liveeye lia Yahova.

³⁰ Navuzwa inzi manya ndi ivi harara na vatumikiri vovo simutizaa Yahova Nyasaye mba.”

³¹ Ikatani ni ishairi viadivizwa, kigira ishairi yaali niyumi; ni katani yaali nisivukaa.

³² Navuzwa uvuswage ningano siviononywa mba, kigira viali nivikikiri kokomera.

³³ Musa yatura ku Mwami mu lidaala. Yaginga makono geege igulu mulisaala ku Yahova. Lihiligana lie inguba, niimbura yamagina viosi vialekera kukuba.

³⁴ Lwu Mwami yalora agaali nigekoleki, yaazizagilira kokora uvwoni. Oyo harara na vatumikiri veve vadinyia mioyo jaavo kuli kazozo.

³⁵ Kandi kuli Yahova yaali navooye maziambiri kuvitira ku Musa, Mwami siyaleka vandu va Isiraeli vazie mba.