Kutwula 7 - KITABU KITAKATIFU

¹ Yahova yavolera Musa, “Henza, nziza kokokola ove kuli Nyasaye ku mwami, na amwavo woovo Haruni alakomolomera kuye kuli muporofeti woovo.

² Volera Haruni goosi aga ngulaga, naye alavolera Mwami wa Egebeti aleke vandu va Isiraeli vatuli mu kivala chiche.

³ Navuzwa inzi ndadinyia mwoyo gwu Mwami wa Egebeti, kandi kali ndaameeda ligali ivilolekizu kandi iviokogenyia mu kivala cha Egebeti, mwami sialahulira munyi kali hakuzu mba.

⁴ Mwami sialamuhulira mba, maku ndahana mageri ku vandu va Egebeti nokoleta maduywa malulu kuvo, kandi ndatuliza zihiiri ziange, avandu vange, avana va Isiraeli mukivala cha Egebeti nilikalaga linene.

⁵ Maku vandu va Egebeti valamanya ndi inzi mbeeye Yahova, lwa mbana mageri kuvo kandi ndulizi vandu va Isiraeli mu kivala chavo.”

⁶ Musa na Haruni vaakora aga Yahova yavalaga kokora.

⁷ Ing'inga lwa vamoloma ku Mwami, Musa yaali naveeye ni mihiga 80, na Haruni yaali naveeye ni mihiga 83.

Imbimbu ya Haruni yagwa Enzoka

⁸ Yahova yavolera Musa na Haruni,

⁹ “Niiva mwami wa Egebeti aleenya ndi munyi aveene mwimanyie kulikola vilolekizu, volera Haruni avuguli imbimbu yeeye na agilase hasi imbiri wu mwami. Na ilagirung'ana kugwa enzoka.”

¹⁰ Kunangwa Musa na Haruni vazia ku Mwami kandi, vaakora kuli Yahova yaali naavalagi. Haruni yalasa imbimbu yeeye hasi imbiri wu Mwami wa Egebeti na vatumikiri veve, kandi yagirung'ana nigwa enzoka.

¹¹ Maku mwami yalanga avandu veve avageri na vasigitiri. Kandi navo vaakora kindu kilala chere.

¹² Valasa hasi zimbimbu ziavo, na zimbimbu ziavo, ziagirung'ana kugwa zinzoka. Navuzwa imbimbu ya Haruni yaamira iziavo ziosi.

¹³ Mwami yadinyia mwoyo gwigwe kandi, navula kuhulira Musa na Haruni kuli Yahova yavoola.

Amaduywa ga Mazi kugwa Masahi

¹⁴ Maku Yahova yavolera Musa, “Mwoyo gwu Mwami wa Egebeti goveeye mudinyu ligali kandi usuyi koleka avandu vazie.

¹⁵ Kunangwa zia wagane naye mugambazuri lwava nasulungutaa kuzia ha mugera.

¹⁶ Maku volera Mwami, ‘Yahova, Nyasaye wa Avaheburaina, undumi ku ivi ku kokovoolera oleke avandu veve vazie, kunangwa vaduuki kumusigamira mwigendanyama. Navuzwa kuduuka na kalunu ukikiri kuhulira.

¹⁷ Yahova Wuvunyali avoora ndi, kolondekana nayaga ulamanya ndi Inzi mbeeye Yahova. Henza, nziza kukuya mugera nimbimbu yiyi, na amazi galagirung'ana kugwa amasahi.

¹⁸ Zisuzi ziu mugera gwa Naili zilakuza, nu mugera gulafunya vugundu ligali na vandu va Egebeti sivalanyala kunwa mazi gagwo mba.’ ”

¹⁹ Yahova yavolera Musa, “Volera Haruni avuguli imbimbu yeeye kandi anyiiri mukono gwigwe agiviiki ku amazi gi migera jiosi notogera kali ku zinyanza na madavalia goosi mu Egebeti. Amazi galagwa amasahi, kandi kivala choosi kilava amasahi kali mu viju via magina.”

²⁰ Maku Musa na Haruni vaakora kuli Yahova yavalaga. Imbiri wu Mwami navatumikiri veve, Haruni yaginga imbimbu yeeye igulu nakuya mu mugera, na amazi goosi gagirung'ana nigagwa amasahi.

²¹ Zisuzi ziosi ziu mu mugera ziakuza, na gwafunya vugundu ligali. Avandu va Egebeti sivali vanyara kunwa amazi mugwo mba. Amasahi gaali havundu hoosi mu Egebeti.

²² Maku vakumu vu Mwami vaakora malala mere ku vukumu, vwavo nu Mwami yaali mudinyu kuli kazozo. Kuli Yahova yaali navooye, Mwami yasura kuhulira Musa na Haruni.

²³ Mu vogono yivwo, yazia munyumba yeeye yu vwami vugira kali kuvugura ikika.

²⁴ Na vandu va Egebeti vosi vayava kulujinga lwu mugera mbula vanyoore amazi gukunwa, kigira sivali vanyara kunwa amazi kutura mu mugera yigu mba.

²⁵ Amazi gaali masahi kulwa madiku saba kutura Yahova nakuya mu mugera gwa Naili.