Kutwula 5 - KITABU KITAKATIFU

Musa na Haruni imbiri wu Mwami wa Egebeti

¹ Maku Musa na Haruni vazia ku Mwami wa Egebeti nivamuvoolera, “Yahova, Nyasaye wa Isiraeli, avoora, ‘Leka avandu vange vazie, kunangwa vaduuki konombera lisavo liu kuhaana luyali ku inzi mwigendanyama.’ ”

² Na Mwami wa Egebeti yateeva, “Yahova nivwaha, Inzi nduki kumuhulira nukuhaana munwa ku vandu va Isiraeli vazie? Inzi simanya Yahova; kandi sindaleka Isiraeli kuzia.”

³ Musa na Haruni vaamutivulira, “Nyasaye wa Vaheburaina umali kwivuula mwene ku kunyi. Mwaza yaanza ukuvugiliri kuzie ologendo lwa amadiku gavaga kuhaanira Yahova, Nyasaye wiitu visiuviliru mwigendanyama. Nikutakola ndio, alakakwita nuvulwaye anoho mu vulwani.”

⁴ Mwami wa Egebeti yavolera Musa na Haruni, “Kigira ki muvuguli avandu nimuvatuliza ku miyinzi jaavo? Mwilanyie avatugwa yavo vayinziri!

⁵ Avandu munyi mumali kuva avanyingi ligali kuvita vandu va Egebeti. Na kalunu mwenya koleka kuyinzira!”

⁶ Lidiku zana yilio, Mwami yalaga avasingiliri va vatugwa Egebeti na vimiliri va vandu va Isiraeli navoora,

⁷ “Muleke kuhaana ku avandu vunyasi vwokolomba amadafali kuli maziambiri. Muleke vazie kweyenya aveene.

⁸ Kandi ndio muvateeve kolomba inamba ya madafari kuli maziambiri; lidafari litagehera ku kali lilala mba. Vavoola, leki kuzie kusiigamira Nyasaye.

⁹ Mukore avandu yava vayinziri vudinyu, vavuli konyoora ku vwiyangu vwukuhuliriza amakuva govovehi mba.”

¹⁰ Avasingiliri va avatugwa na vasingiliri na vandu va Isiraeli vazia nivavolera vandu Vaisiraeli ndi, “Mwami sialamuha uvunyasi vundi kandi mba.

¹¹ Avoora ndi kuduuka munyi aveene muzie kwenya hoosi aha munyala kovonyoola, navuzwa kuduuka mulombe inamba ya madafari ndalanzere kuli kazozo.”

¹² Kunangwa avandu vazia havundu hoosi mu kivala cha Egebeti kwenya uvunyasi.

¹³ Aviimiliri va avatugwa, vazizagilira kuvaniga kuzingulu valombe inamba ndala nzere ya madafari vuli lidiku kuli aga valomba lwa vahevwa uvunyasi.

¹⁴ Vimiliri va vatugwa vaakuya vasingiliri va vandu va Isiraeli ava vaali nivaviika kusingilira miyinzi, vavateeva, “Kigira ki avandu munyi simulombaa inamba ya madafari kuli mwalomba maziambiri mba?”

¹⁵ Maku avasingiliri zana vazia ku mwami nivililira nivavoora, “Kigira ki okokoleraa yaga, ivi wuluyali?

¹⁶ Kunyi sikoheveywi uvunyasi mba, navuzwa kukinigwa kolonga inamba ndala nzere ya madafari! Henza, kalunu kukuywa na avandu vovo. Avandu vovo vene nivo avaveeye nuvudamanu.”

¹⁷ Mwami yavativulira, “Munyi muveeye avagata na simwenya kokora miyinzi mba, na nicho kigira nimundeva muleke muzie kuhaanira Yahova ivisiuviliru.

¹⁸ Kalunu mwirane muzie kuyinzira! Simulahevwa vunyasi kali hakuzu mba, navuzwa mulazizagilira kolonga inamba ya madafari kuli kazozo.”

¹⁹ Na vimiriri va vandu va Isiraeli valora ndi vakaduuka mu kivi, ulwavavoolerwa ndi vaduukana valonge inamba ndala nzere ya madafari kuli kazozo vuli lidiku.

²⁰ Lwa vaali nivazizaa, vavugana na Musa na Haruni, avaari nivavalindiliraa.

²¹ Kandi vaavoolera Musa na Haruni ndi, “Yahova alole munyi ma amukalagiri! Munyi mumali kokora kunyi kufunyi vugundu imbiri wu Mwami na vatumikiri veve vosi kandi vagumiyi vivavi mu makono gaavo kukwita.”

Musa yilirira ku Yahova

²² Musa yirana ku Yahova kandi navoora, “O, Yahova, kigira ki umali kokolera avandu vovo vudamanu? Kigira ki nunduma hano?

²³ Kutura ninzia kokomolomera ku mwami wa Egebeti oyo umali kokolera vandu va Isiraeli vindu vidamanu ligali. Na ivi siuvakonyi ku nikindu choosi kuvahonyia mba!”