Kutwula 40 - KITABU KITAKATIFU

Lisingiliza nukusaalisa Lihema liukuvuganira na Yahova

¹ Yahova yavolera Musa,

² “Lidiku liu kutanga liu mweli gwu kutanga iliumbaka Lihema liukuvuganira mu na Yahova.”

³ Viika mu Lisandugu lia malago iliveeye mu na malago likomi, kandi uviiki mu isuuka yu kukinga imbiri walio.

⁴ Oleeta mu emesa kandi uviiki ku viju zana. Yingiriza mu kandi kinaara chitaaya, kandi uhambizi zitaya ziacho.

⁵ Uviiki uvwali vwizahabu vwukusambira ku ikimuli imbiri wi Lisandugu lia malago ma usuungi ku isuuka mu vwingiliru vwi Lihema.

⁶ Uviiki uvwali vwi vihaanwa viukusambwa imbiri wi Lihema liu kuvuganira mu na Yahova.

⁷ Uviikaa ebenzeni yukwisaavira ku hagati hi Lihema Liukuvuganiramu nu vwali na viiki ku amazi.

⁸ Umbake lugaga kukumbirizaa mugizi zimbega ziosi, ma usuungi isuuka mu vwingiliru vwalwo.

⁹ Maku usaalisi Lihema harara niviju vialio viosi mu livivaka maguta matakatifu na vilava vitakatifu.

¹⁰ Kelondaku, usaalisi uvwali ni iviju viavwo viosi mu livuvaka maguta na vulava uvutakatifu ligali.

¹¹ Uvake kandi usaalisi ebenzeni yu kwisaavila ku harara nu uvwikaliru vwayo munzira ndala nzere.

¹² “Oleete Haruni na vayaayi veve ha vwingiliru vwi Lihema liukuvuganira mu na Yahova, na uvavoolere visiingi kolondekana numuluka

¹³ uviiki Haruni zinguvu ziuvusalisi na umuvake amaguta, na munzira yiyi umutakase aduuki kundumikira kuli musaalisi.

¹⁴ Oleete vayaayi veve, uvaviiki amasadi.

¹⁵ Maku uvavake amaguta kuli wavaka baba wavo, kunangwa vaduuki kundumikira kuli avasaalisi. Livaka maguta yili lilavakola vave avasaalisi mihiga ni mihiga, muvisukululwi viavo viosi.”

¹⁶ Musa yakola vindu viosi kuli Yahova yaali naamulagi.

¹⁷ Kunangwa mu muhiga gwa kaviri, ku lidiku liu kutanga liu mweli gwukutanga, nivamali kutura Egebeti lihema liu kuvuganiramu na Yahova liumbakwa.

¹⁸ Musa yavika vwikaliru vwalio naasingiriza zifuremu zialio, naakubira ku zimbaho zialio, kandi naasingiriza zitiru zialio.

¹⁹ Yaala isuuka yukufuuma ku Lihema igulu kandi naviika isuuka kufuma ichova walio, kuli Yahova yaali naamulagi.

²⁰ Maku yavugula vibaho viviri via magina, naaviviika mu Lisandugu lia malago. Yavika zitiru mu zimingiri zie lisandugu kandi naviika ku kikuniku.

²¹ Maku yavika lisandugu Liamalago zana mu Lihema, nasuunga ku isuuka munzira yiyi yakinga Lisandugu lie Liamalago, kuli Yahova yaali naamulagi.

²² Yavika emesa mu Lihema liukuvuganira mu na Yahova, ku lovega lwi Ivaale ichova wi isuuka,

²³ naviika ku mugadi guhaanwa ku Yahova, kuli Yahova yaali naamulagi.

²⁴ Yavika kinaara chitaaya mu Lihema liukuvuganira mu na Yahova, kolovega lwi isavaalu, kohenzana nemesa zana.

²⁵ Yahambiza zitaya aheene yaho imbiri wa Yahova, kuli Yahova yaali naamulagi.

²⁶ Yavika uvwali vwizahabu mu Lihema liukuvuganira mu na Yahova, imbiri wi isuuka,

²⁷ kandi nasamba kimuli kifunyaa mwayu mulahi kuvwo, kuli Yahova yaali naamulagi.

²⁸ Kandi yasuunga isuuka mu vwingiliru vwi Lihema Liukwaganira mu Yahova.

²⁹ Uwene yeyo, imbiri wi isuuka, yavika yo uvwali vwu kusambira ku vihaanwa, yitira ku kisiuviriru chukusambwa kandi nahaanira ku kihanwa chu vuswage, kuli Yahova yaali naamulagi.

³⁰ Yavika ebenzeni yukwisaavira ku hagati hi Lihema liukuvuganira mu na Yahova nuvwaali manaviika ku mazi vaduuki kwisaava.

³¹ Musa, Haruni na vayaayi veve, visavaa makono gaavo ni virenge viavo hene yaho.

³² Lwa viingira mu Lihema liu kuvuganira mu na Yahova, na lwa visunda ha vwali visavaa kuli Yahova yaali nalagi Musa.

³³ Musa yumbaka lugaga lwumugizi kukumbiriza Lihema nu vwali zimbega ziosi, kandi yasuunga isuuka yu kukinga mu vwingiliru vwu mugizi. Kunangwa Musa yamala miyinzi josi.

Vukumi vwa Yahova ku Lihema

³⁴ Maku lilesi liakunika Lihema liukuvuganira mu na Yahova, kandi vukumi vwa Yahova vwizula Lihema du.

³⁵ Kigira yaga Musa siyaali unyala kwingira mu Lihema liukuvuganira mu na Yahova mba.

³⁶ Avandu va Isiraeli visunda kutura ahokososa haavo kuzia havundu handi lwi lilesi liesuunda kutura ku Lihema.

³⁷ Kolohoono lwi lilesi liamenya aheene yaho vugira kwisunda, sivasambulaa, anaho sivasuundaa ahokososa haavo mba.

³⁸ Avandu va Isiraeli vosi valora lilesi lia Yahova igulu wi Lihema ing'inga yu mbasu kandi muliru ni gwadukaa igulu walio ing'inga yu vudiku lwa vaali muligendagenda liavo liosi.