Kutwula 4 - KITABU KITAKATIFU

Nyasaye Yahaana ku Musa Zinguru zio Kokora Vilolekizu

¹ Maku Musa yativulira Yahova, “Galava ki niiva vandu va Isiraeli sivalaasuuvira kandi sivalahulira agambooraa. Ndakora ki niiva valavoora ‘Yahova siyaaloleka ku ivi mba.’ ”

² Yahova yamuteeva, “Oveeye naki mu mukono gugwo?” Naye yativura, “Imbimbu.”

³ Yahova yamuvolera, “Gilase hasi.” Lwa Musa yagilasa hasi, yagwa enzoka; na Musa yiruka kutura kuyo.

⁴ Navuzwa Yahova yavolera Musa, “Nyira mukono gugwo ugivuguli kutura inamukira.” Kunangwa Musa yanyira mukono gwigwe nagigumira, na yagwa imbimbu kandi,

⁵ Yahova yavoola, “Okole yaga kumanyia Isiraeli ndi Inzi Yahova, Nyasaye wa vaguuga vaavo, Nyasaye wa Aburahamu, wa Isaka, na Yakobo, umali kololeka ku ivi.”

⁶ Yahova yavolera Musa kandi, “Viika mukono gugwo mu kwaha mumwo.” Musa yakola ndio, na lwa yagutuliza mu, gwaali novogere nigulavi kuli likonzo.

⁷ Maku Yahova yavoola, “Yiranyia mukono gugwo mukwaaha kandi.” Yakola ndio, na ulwayagutuliza ichova ing'inga yiyi, gwaali vuzwa mulamu kuli muviri gwigwe.

⁸ Yahova yavoola, “Niiva sivalakusuuvira, anoho kuvugilira kelolekizu chukutanga, valavugilira kelolekizu chinyima.

⁹ Niiva ku vilolekizu viviri yivi sivalakusuuvira, kandi nivasuula kuhulira agovoolaa, vugula amazi kutura mu mugera gwa Naili na ugasunduli kulirova liumu. Amazi galagirung'ana kuva amasahi.”

¹⁰ Navuzwa Musa yavoola, “Awa Yahova, utanduma mba. Inzi sindaavaku umumolomi mulahi kali hakuzu mba; kandi ngikiri kuvaku mulala ku vamolomi avalahi kutura ing'inga yawatanga komoloma ku inzi mba. Molomaa galaha kandi lulimi lwange loveeye luliduhu.”

¹¹ Yahova yamuvolera, “Nivwaha walomba munwa gwu mundu? Nivwaha umukolaa kuva idimbidi anoho wahana matu noho nivwaha umuhezaa lilola anoho umukolaa muvoku? Siaveeye Inzi Yahova?

¹² Kalunu zia! Ndakokonya komoloma, kandi ndakovolera agovoola.”

¹³ Navuzwa Musa yamutivulira, “Awa, Yahova, mwaza tuma mundu wundi.”

¹⁴ Maku, Yahova yaali nu vutima na Musa navoora, “Amwavo woovo Haruni wihiiri ya Levi aveeye ndi? Inzi manyi ndi oyo anyala komoloma vulahi ligali. Kandi, henza, yaazaa kuvugana nivi na ulwakolola, alava nuvuyanzi ligali.

¹⁵ Unyala komoloma naye na umuvolere ganyala kovora. Na inzi ndamuvolera vombi gamukola.

¹⁶ Alava umumolomi woovo kandi ku vandu. Na ivi ulava kuli Nyasaye weve ukumuvoolera agaavoola.

¹⁷ Vugula imbimbu yiyi na ulakola vilolekizu viokogenyia nayo.”

Lirana lia Musa mu Egebeti

¹⁸ Maku Musa yirana ku Jezero, navizara weve, namuvolera, “Mwaza nuyanza ndeka nzirane ku aviiko vange avaveeye mu Egebeti ndore niiva vakikiri mwoyo.” Jezero yamuvugilira nazia nimirembe.

¹⁹ Lwa Musa yaali nakikiri mu Midiani, Yahova yamuvolera, “Yirana uzie Egebeti, kigira yavo vosi avenya vakwiti vaakuzi!”

²⁰ Kunangwa Musa yavugula mukali weve na vayaayi veve naavanyinyia ku bunda, niyirana mu kivala cha Egebeti nagiingi imbimbu ya Nyasaye yamuvolera avuguli.

²¹ Yahova yavolera Musa kandi, “Nguyu kalunu wiranaa Egebeti, olole ndi okoli vilolekizu viosi viamali kukuha zinguru okole imbiri wu mwami wa Egebeti. Navuzwa ndakora mwoyo gwu mwami kuva mudinyu, naye alavula kulakuula avandu va Isiraeli vazie.

²² Maku ulamuvoolera ligali ndi, Inzi, Yahova mboraa, ‘Isiraeli aveeye muyaayi wange wukutanga.

²³ Ndaakovolera oleke mwana wange muyaayi azie, ku aduuki kusigamira, navuzwa ivi wasuula. Kalunu Inzi nziza kwita mwana woovo muyaayi wukutanga.’ ”

²⁴ Lwa Musa yaali naagoni hokososa nave kunzira nazizaa Egebeti, Yahova yagana naye, niyenyaa kumwita.

²⁵ Maku Zibora, mukali weve, yavugula ligina liugi, naakeva muyaayi weve, nadiira vusaza vwa Musa niligodo lia yakeva ku mwana weve.

²⁶ Kigira mwima gwi likevwa, yavolera Musa, “Ivi oveeye musaza mwiko wange.” Kunangwa Nyasaye yahonyia Musa.

²⁷ Yahova yaali niyakavoolera Haruni, “Zia waganiri Musa mwigendanyama.” Kunangwa yazia kumwaganira ha kiguru kitakatifu cha Nyasaye, na lwayagana na naye, yamuvusa.

²⁸ Kunangwa Musa yavolera Haruni vindu viosi via Yahova yaali navooye lwa yamuvolera yirane Egebeti. Yamuvolera kandi kigira vilolekizu via Yahova yamulaga akole.

²⁹ Kunangwa Musa na Haruni vazia Egebeti nivavuganyia harara aviimiliri va vandu va Isiraeli.

³⁰ Haruni yavavolera vindu viosi via Yahova yaali navoleeye Musa, ma Musa yakola vilolekizu viosi imbiri wa vandu.

³¹ Vasuuvira, kandi lwa vahulira ndi Yahova umali kuuza kuvo kandi ololi kuli vadambizwa kivi kenene, vinama hasi nivasigamira Yahova.