Kutwula 39 - KITABU KITAKATIFU

Kolombera avasaalisi zinguvu

¹ Lwa vasaalisi vatumika Havundu Hatakatifu, vivikaa zinguvu zindahi ligali, izianavwa ni zimbusi ziu vwoya vwi irangi ya bulu, muzambarao na inzakanyu. Valombera Haruni zinguvu ziuvusalisi, kuli Yahova yaali ni yalaga Musa.

² Valomba kisibaho kutura ku ikatani indahi yuvwoya vwirangi ya bulu, muzambarao ninzakanyu kandi zimbusi ziezahabu.

³ Vaaduya izahabu kuduuka nigwa inyangu kandi nivagikalanyia mu vibaale ving'erere ligali kunangwa viduuki kuyinzilwa ku kolomba ikatani indahi nu vwoya vwi irangi ya bulu, muzambarao kandi inzakanyu.

⁴ Valombera kisibaho zana migoyejukumavega giviri nivajinavira mu zimbega kunangwa keve ikinyala kovofwa.

⁵ Musibi gwanavwa vulahi nuvusiza, ugwalombwa kutura ku vindu vilala viere, izahabu uvwoya vwi irangi ya bulu, muzambarao ninzakanyu, ni ikatani yanavwa vulahi, gwahambanywa ku kisibaho kuva kindu kilala kuli Yahova yalaga Musa.

⁶ Navo valomba magina geberulo, gaviikwa muvwikaliru vwezahabu, agavazwa kuli livaazwa liumuhuri, namita ga vayaayi likomi na vaviri va Yakobo.

⁷ Vaviika ku migoye jukumavega jikisibaho, kuva muvogono vwi zihiiri likomi na ziviri zia Isiraeli, kuli Yahova yalaga Musa.

Lilomba Isalamba

⁸ Valomba isalamba kutura ku vindu vilala viere viavalombera kisibaho, kandi na mangirinya malala meere.

⁹ Yaali eneng'ani zimbega ziosi, na iyalingwa mu haali kaviri. Uvutambi vwayo vwali zisendimita 22 kandi uvuvambalaru vwayo vwali zisendimita 22.

¹⁰ Vaviika ku zimbaso zine zia magina guvuguli. Mu luvaso lwukutanga, vaviika ku ligina liakanyu, itopazi, na lisembe,

¹¹ mu luvaso lwa kaviri, lwali mu na emeradi, ni isafiro, na alimasi;

¹² luvaso lwa kavaga, lwali mu na kwakiro, ni lisalago, na masusito;

¹³ luvaso lwa kane lwali mu na iberulo, karimeri, josiperi. Viavikwa mu vwikaliru vwe izahabu.

¹⁴ Vuli ligina ku magina likomi na gaviri yago gang'odwa ku mulivaazwa ku lieta liu mulala ku vayaayi va Yakobo kunangwa gaduuki kuvugura vogono vwi zihiiri likomi na ziviri zia Isiraeli.

¹⁵ Valombera isalamba minyororo ji izahabu indahi janavwa kuli migoye ji izahabu indahi.

¹⁶ Valomba vwikaliru vwizahabu kandi izimingili ziezahabu ziviri, ni vaviika zimingiri ziviri mu zikona zie igulu zie isalamba.

¹⁷ Vavoha migoye giviri jizahabu ku zimingiri ziviri iziali havundu hi isalamba

¹⁸ nivavoha zisonga zindi ziviri zie migoye jizahabu jaanavwa, nivajiviika ku vwikaliru vuviri na munzira yiyi vajiviika imbiri ku migoye jukumavega ji kisibaho.

¹⁹ Valomba zimingiri ziviri ziezahabu nivaziviika mu zikona ziahaasi zie isalamba, kosonga yu mugati ahimbi ku kisibaho.

²⁰ Valomba zimingiri zindi ziviri ziezahabu nivaziviika kolovega lwa hasi, lwimbiri wi migoye giviri jukumavega gi kisibaho, na isi wacho kolovega lwimbiri, himbi nikisibaho, ahimbi nuvwung'aniru, kandi igulu wumusibi gwikisibao ugwanavwa vulahi ligali.

²¹ Kuli Yahova yaali nalagi Musa, vavoha zimingiri zie isalamba ku zimingiri ziekisibaho numugoye gwuluvusi lwirangi ya bulu, kunangwa isalamba iduuki kwiidila igulu wu musibi kunangwa guvuli kodeya.

Zinguvu zindi ziuvusalisi

²² Iganza yiviikirwa isi wi kisibaho yalombwa kutura ku luvusi lwirangi ya bulu.

²³ Havundu hu kuvitizira mutwi hanavwa vudinyu nuluvusi kunangwa ivuli kutanduka.

²⁴ Valomba ligemo lieganza, vaviika ku mangirinya gikatani indahi gafwana makuyu nu uvwoya vwiranga ya bulu, muzambarao, ninzakanyu.

²⁵ Valomba vikuli viezahabu indahi nivaviviika hagati ha makuyu ku lukigiti lwe iganza zimbega ziosi.

²⁶ Vikuli na makuyu vianavilwa kuligemo lieganza muviika zimbega ziosi, ukwiviikwa mu vutumiki vwu vusaalisi kuli Yahova yalaga Musa.

²⁷ Valombera Haruni na vayaayi veve amasadi amalahi gikatani ganavwa vulahi,

²⁸ nekelemba, nizisuruhali ziekatani indahi zianavwa,

²⁹ nu musibi gwikatani indahi gwanavwa nu vwoya vwirangi ya bulu, muzambarao kandi inzakanyu gwanavirwa mu amangirinya malahi kuli Yahova yalaga Musa.

³⁰ Valomba isahani, itaji indakatifu kutura ku izahabu indahi, ni vang'oda ku amang'oda kuli gu muhuri, “Mutakatifu ku Yahova.”

³¹ Maku vavoha ku mugoye gwa bulu kuhambanyia kukelemba kuli Yahova yalaga Musa.

Limaliriza lie Miyinzi

³² Miyinzi josi ji Lihema liukuvuganira mu na Yahova jamanya nijimalirika. Avandu va Isiraeli vaakora kuli Yahova yalaga Musa.

³³ Valeta Lihema ku Musa ni viju vialio viosi, vigumilu vialio, zifuremu zialio, zimbaho zialio zitiru zialio, vwikaliru vwalio,

³⁴ kikuniku chi kesero cha magondi mamigu chi irangi inzakanyu, kikuniku chizinguvu ziekeseero kilahi, isuuka,

³⁵ ni Lisandugu liamalago misaala jukukinga jalio, endeve yi zimbavasi.

³⁶ Emesa ni viju viayo viosi kandi mugaadi mutakatifu guhaanwa ku Nyasaye

³⁷ kinaara chitaaya chizahabu indahi, zitaya ziayo, viju viazio viosi, kandi maguta gizitaaya;

³⁸ vwali vwizahabu, maguta gukuvaka, kimuli kilahi kifunyaa mwayu, isuuka yukukinga uvwingiliru vwi Lihema liukuvuganira mu na Yahova,

³⁹ uvwali vwu mugasa, harara nekekereko chumugasa, ni zitiru javwo, niviju viavwo viosi ni zibenzeni ziukwisavira ku, nu vwikaliru vwazio,

⁴⁰ zisuka ziukukinga ziu lugaga lwu mugizi, zitiru kandi vwikaliru isuuka yukukinga mu uvwingiliru vwu mugizi, kandi nimigoye jalio, vivambo vie Lihema, viju viosi viukutumikirwa mu Lihema liu kuvuganira mu na Yahova,

⁴¹ izinguvu zindahi ligali zia vasaalisi vaduukana viviikiri Havundu Hatakatifu, zinguvu zindakatifu zia Haruni musaalisi kandi zinguvu zia vayaayi veve.

⁴² Avandu va Isiraeli vaakora miyinzi josi kuli Yahova yalaga Musa.

⁴³ Musa yaahenzeriza imiyinzi josi ma nalora ndi, vakoli kuli Yahova yalaga vakole. Kunangwa Musa yavagasiza.