Kutwula 38 - KITABU KITAKATIFU

Uvwali vwu Kusambira ku vihaanwa

¹ Yalomba uvwali vwukusambira ku vihaanwa kutura ku lubaho lwi kikuma. Vwali ovoleng'ani zimbega ziosi, uvutambi vwali zimita 2.2 kandi nuvuvambalaru zimita 2.2, na kuzia igulu nivuva imiita 1.3.

² Yalomba zinziga ziavwo hasoonga hi zikona zine ziavwo. Kunangwa niziva kindu kilala navwo. Yavaka mugasa kuvwo vwosi.

³ Yalomba kandi viju viu vwali, vifuria, mijiko, zibakuli, vigumiliru, ni zinju ziu muliru zinyingu ni viukung'ura ligoke, nivituva, niizingaga, ni zinju ziu muliru. Viju viosi yavilomba kutura ku mugasa.

⁴ Yalomba kekereko chumugasa, nakiviika isi kundulu kwuvwaali, kunangwa nikiduuka hagati igulu ku vwali.

⁵ Yalomba zimingiri zine ziukuginga kandi naziviika ku zikona zine ziekekereko chumugasa.

⁶ Yalomba misaala jukuginga kutura ku lubaho lwi kikuma, na yavaka ku mugasa,

⁷ kandi naziviika mu zimingiri ku vuli lovega lwu vwali. Uvwali vwalombwa ku zimbaho kandi vwali mu nu vwiyangu.

Ebenzeni yu Mugasa

⁸ Yalomba zibakuli ziumugasa nu uvwikaliru vwazio vwumugasa kutura kuvielolero viali via vakali avatumikaa ha vwingiliru vwi Lihema liu kuvuganira mu na Yahova.

Lugaga lwi Lihema liu kuvuganira mu na Yahova

⁹ Kigira Lihema liukuvuganira mu na Yahova, yalomba lugaga lwu mugizi ku zinguvu ziukukinga zie katani indahi. Kolovega lwi Isavaalu, zinguvu ziukukinga ziali uvutambi vwi zimita 44

¹⁰ ni zitiru sirini ziu mugasa kandi vwikaliru sirini viu mugasa viali ni vigumiliru kandi ni zinzizi zialombwa ku feza.

¹¹ Lugaga lwu mugizi lwali lulala lwere kuli lovega lwi Ivaale.

¹² Kolovega lwi madioli kwaali yo nizinguvu ziukukinga ziu vutambi zimita 22, ni zitiru likomi nu vwikaliru likomi, nivigumiliru kandi ni zinzizi zialombwa kufeza.

¹³ Kolovega lwi Ivugwi, uwu vwingiliru vwali, lugaga lwu mugizi kandi lwali zimita 22 uvuvambalaru.

¹⁴ Zinguvu ziukukinga ziu vutambi vwi zimita 6.6 vuli ndala ziali kolovega lulala lwu vwingiliru, ni zitiru zivaga kandi vwikaliru vuvaga,

¹⁵ na zinguvu ziukukinga ziu vutambi vwi zimita 6.6 ziali kolovega Lundi lwu vwingiliru, nizitiiru zivaga kandi vwikaliru vuvaga.

¹⁶ Zinguvu iziakumberiza mugizi ku zimbega ziosi ziali ziekatani indahi ligali.

¹⁷ Vwikaliru vwi zitiru vwali vwumugasa, kandi vigumiliru, zinzizi ni vikuniku vie mitwi ji zitiru vialombwa kutura kufeza. Zitiru ziosi ziakumberiza mugizi ziali ziahambanywa harara nizinzizi ziefeza.

¹⁸ Inguvu yukukinga vwingiliru yaali yirangi ya bulu, muzambarao kandi inzakanyu, na yanavirwa ku amangirinya malahi. Uvutambi vwayo vwali zimita 9 igulu nivuva zimita 2 kuli zinguvu ziukukinga ziu mugizi.

¹⁹ Yadiilwa ni zitiru zine mu vwikaliru vone viu mugasa. Vigumiliru, vikuniku viu kwigulu, ni zinzizi ziazio vialombwa kufeza.

²⁰ Vivambo vie Lihema viosi viakumberiza mugizi vialombwa kutura ku mugasa.

Vivia viatumika mu Lihema liu kuvuganira mu Yahova

²¹ Yili nilivaliza lie vivia viosi iviatumika mu Lihema lia Yahova umwi vibaho viviri via magina viavikwa, ukwa malago likomi gang'odwa. Lilohiza zana lialagwa na Musa nililombwa nihiiri ya vandu va Levi avayinziraa hasi hu vusingiliri va Izamara, muyaayi wu musaalisi Haruni.

²² Bezeleli muyaayi wa Uri, mwisukulu wa Huru, wihiiri ya Yuda yalomba vindu viosi via Yahova yalaga Musa.

²³ Mukonyeleri weve Oholiabu, muyaayi wa Ahisamaku, wihiiri ya Dani mung'odi wukuvaza amagina, wokolohiza musiza, kandi munavi wi katani indahi, ya bulu, muzambarao kandi vwoya vwakanyu.

²⁴ Izahabu yoosi iyaavikwa halovega ku vutumiki vwa Yahova kigira Lihema Litakatifu lia Yahova yaali zikilo elefu ndala, yabimwa kolondekana nikibimu chavugilirwa nuvwamiihi.

²⁵ Ifeza kutura mu livalizwa lia avandu yaali zikilo 3,430, kolondekana ni kibimu chavugilirwa nu vwamihi.

²⁶ Amabese yaga gaaleng'ana na mabese ga avandu vavalizwa vosi vatuunga, vuli mundu yatunga kedonye chayatevwa kutuunga, kolondekana nikibimu chavugilirwa nuvwamiihi. Avandu vaali ni mihiga sirini kuzizagilira, vaduuka 603,550.

²⁷ Zikilo 3,400 ziefeza, ziatumikirwa kolomba vwikaliru imia ndala ninguvu yukukinga Lihema litakatifu, na vuli vwikaliru vwali zikilo 34.

²⁸ Zikilo ziatigala 30 zie feza Bezeleli yalomba zinzizi, vigumiliru vie zitiru kandi vikuniku viu kwigulu.

²⁹ Mugasa gwaleetwa gove gwa Yahova gwaduuka zikilo 2,425.

³⁰ Yalomba vwikaliru vwu vwingiliru vwi Lihema liukuvuganira mu na Yahova, uvwali vwumugasa harara ne kekereko chavwo chumugasa, viju viosi vwuvwaali,

³¹ Vwikaliru vwu kukumberiza mugizi zimbega ziosi kandi vwikaliru vwi kirivwa chu mugizi kandi vivambo viosi vie Lihema kandi viu lugaga lwukukumberiza mugizi.