Kutwula 37 - KITABU KITAKATIFU

Lilomba Lisandugu lia Malago

¹ Bezeleli yalomba Lisandugu lia Malago kutura ku lubaho lwi Kikuma, uvutambi vwalio vwali zisendimita 110, nuvuvambalaru vwalio vwali zisendimita 66 kandi zisendimita 66 kudiguluka.

² Yavaka ku izahabu indahi ichova nu mugati, ma kandi naalilombera itaji kovodong'ana zimbega zialio ziosi.

³ Yaalilombera zimingiri zine ziezahabu, ziukuginga naahambanyia ku virenge vialio vine, zimingiri ziviri kolovega lulala, ni zimingiri zindi ziviri kolovega Lundi.

⁴ Yalomba misaala ju kugingira ku kutura ku kikuma, navaka ku izahabu,

⁵ ma naayingiriza mu zimingiri ku zimbega ziosi zie Lisandugu lia malago.

⁶ Yalomba endeve yizimbavasi yizahabu indahi ligali, vutambi vwayo vwali zisendimita 110 nuvuvambalaru vwayo vwali zisendimita 66.

⁷ Yalomba avakerubi vaviri kutura ku zahabu yaduywa,

⁸ mulala vuli kundulu kwendeve yizimbavasi.

⁹ Avakerubi zana vahenzana, nivavaambuyi zimbaha igulu, kukinga endeve zana. Avakerubi viinama kohenza endeve yi zimbavasi.

Lilomba emesa yu mugadi gwa Nyasaye

¹⁰ Yalomba emesa kutura ku lubaho lwi kikuma, uvutambi vwayo vwali zisendimita 88, nu vuvambalaru vwayo vwali zisendimita 44, uvudiguluku vwayo vwali zisendimita 66.

¹¹ Yavaka ku izahabu indahi ligali, naagelombera itaji yizahabu nagikumbiriza zimbega ziayo ziosi.

¹² Yalomba kandi lukigiti lwayo kukumberiza zimbega ziosi, vugalamu vwalwo vwali zimilimita 75 navaka kundulu kwayo izahabu zimbega ziosi.

¹³ Yaagelombera zimingiri ziukugingira zine ziezahabu, ma naziviika mu zikona zine ahi virenge viavo viali.

¹⁴ Zimingiri ziukugumira misaala ju kugingira komesa zana ziavikwa ahimbi nu lukigiti.

¹⁵ Yalomba misaala ku lubaho lwikikuma navaka ku izahabu.

¹⁶ Yalomba viju viezahabu indahi vio komesa; zisahani, vikombe, zijagi, kandi ni zibakuli ziukutumika kuhaanira ku iwaini.

Lilomba kinaara chi taya

¹⁷ Yalomba kinaara chitaaya ku izahabu indahi ligali. Yalomba uvwikaliru vwacho numusaala gwacho kutura ku izahabu yaduywa, mauwa, matu, nivimuli viacho viali kindu kilala.

¹⁸ Chaali ni zisia sita iziatula mumbalu mwacho, zisia zivaga kutura ku vuli lovega lwi kinaara Lundi yilwo.

¹⁹ Vuli lulala ku zisia sita lwali ku namawa gavaga malahi, galombwa kuli vimuli viu muzuliu, harara ni visivu na matu, zisia ziosi sita ziatula ku kinaara chitaaya.

²⁰ Musaala gwi kinaara chitaaya gwaali na mawa malahi gane agalombwa kuli kimuli chu muzuliu harara ni visivu namatu gikimuli.

²¹ Haali ho ni kisivu kilala isi wa vuli lusia ku zisia sita zie kinaara.

²² Visivu, zisia, ni kinaara chitaaya viali vuzwa kedonye kilala chizahabu yaduywa.

²³ Yalomba zitaya saba zie kinaara chitaaya, kandi yalomba vigumiliru viacho, ni zisahani ziacho kutura ku izahabu indahi.

²⁴ Yatumikira zikilo salasini na tano ziezahabu indahi okolomba kinaara chitaaya ni viju viacho viosi.

Lilomba uvwali vwu kusambira ku kimuli

²⁵ Yalomba uvwali ku zimbaho zie kikuma vwu kusambira ku kimuli. Vwali nuvuvambalaru voleng'ani zimbega ziosi, uvutambi kandi uvuvambalaru vwali zisendimita 45, kuzia igulu vwali zisendimita 90. Zinziga ziavwo ha zikona zine ziavwo vwali kindu kilala.

²⁶ Vaakunika igulu wavwo kali zimbega ziavwo zine ziosi nizahabu indahi ligali, kandi naviika lukigiti lwizahabu kovodong'ana ku zinduru ziosi.

²⁷ Yaavolombera zimingiri ziukuginga ziviri ziezahabu kandi naazihandiza kundulu kwavio, mumbalu mwavwo mwombi, kugumira misaala ja vwagingirwaku.

²⁸ Yalomba misaala kutura ku zimbaho zie kikuma, ma naazivaka ni zahabu.

Lilomba amaguta ni Kimuli

²⁹ Kandi yalomba maguta matakatifu gukuvaka kandi Kimuli kifunyaa mwayu mulahi ligali, ichazuganywa kuli maguta gu muhomo.