Kutwula 35 - KITABU KITAKATIFU

Amalago Kigira Lisabato

¹ Musa yavungiza avandu va Isiraeli vosi, navavoolera, “Yaga na amakuva ga Yahova amali kumulaga mukore:

² Munyi muveeye na madiku sita gokokola miyinzi jinyu, navuzwa lidiku lia saba, mulikole kuva litakatifu, liveeye lisabato lio kohonga ku Inzi, Yahova. Mundu woosi okola miyinzi ku lidiku yilio, aliitwa.

³ Kali mutafwana muliru mu zinyumba zienyu ku lidiku lie lisabato mba.”

Vihaanwa kigira Lihema Litakatifu

⁴ Musa yavolera avandu va Isiraeli vosi, “Yaga nigo amalago ga Yahova amali kulaga:

⁵ Mulombe kihanwa ku Yahova. Mundu woosi oveeye nu mwoyo gwukuyaanza kuhaana, aleete kihanwa chizahabu, ifeza nu mugasa;

⁶ ikatani indahi, vwoya vwirangi ya bulu, muzambarao kandi inzakanyu, nikatani indahi kandi nuvwoya vwizimbuli,

⁷ ni visero via magondi mamigu viabuulwa nuvwakanyu, nizinguvu zielizivi, nu musaala gwi kikuma,

⁸ maguta gi taaya, kimuli kilahi,

⁹ magina giveruli, magina gukuhandiza ku kisibaho chu musaalisi munene nisalamba yu mukiritu.

Iviju viu Mulihema liu kuvuganira mu na Yahova

¹⁰ “Avasiza vosi avalahi mumunyi kuduuka vaze kolomba vindu viosi kuli Yahova yalaga:

¹¹ Lihema, vikuniku vialio, viukwigulu, ni vivohero vialio, ni zitiru zialio, ni viduku vialio,

¹² ni Lisandugu lia malago, nizitiiru zialio, nikikuniku chalio, kandi ninguvu yukukinga inzasasu;

¹³ ne emesa, nizitiiru ziayo, niviju viayo viosi; mugadi mutakatifu gwu kuhaanira Nyasaye;

¹⁴ kinaara chitaaya yu vulavu ni viju viayo viosi, zitaya na maguta muzio;

¹⁵ nu vwali vwukusambira ku kimuli ni zitiru ziavwo; na maguta gukuvaka; kimuli kifunyaa mwayu; viosi ninguvu yu kukinga mu kiliango chi Lihema;

¹⁶ uvwali vwukusambira ku vihaanwa, numugasa, lokereko lwacho lwumugasa, nimisaala javwo, jukuvuginga, niviju viavwo viosi, ebenzeni yukwisavira ku harara nuvwikaliru vwayo;

¹⁷ ni zinguvu ziulugaga lwu mugizi, nizitiiru ziagwo, vwikaliru vwavio, ninguvu yukukinga mu kirivwa chumugizi;

¹⁸ ni vivambo vie Lihema, nivivaambo viu mugizi, nimigoye javio;

¹⁹ ni zinguvu zindahi ziukutumikira mu Lihema, zinguvu zindakatifu zia Haruni musaalisi kandi ni zia avana veve kutumikira ku miyinzi ju vusaalisi.”

Avandu valeta vihaanwa viavo

²⁰ Maku avandu va Isiraeli vosi vaatura imbiri wa Musa.

²¹ Vuli mundu wenyaa kwihana, yaleeta vihaanwa ku Yahova kigira vutumiki mu Lihema liu kuvuganira mu, kandi kigira vutumiki vwalio vwosi, kandi kigira zinguvu zindakatifu ziosi.

²² Vandu vosi vaali nilienya, vombi avakali na vasaza, valeta magina guvuguli, zing'ano ziosi, zimingiri ni viju vindi viosi viezahabu. Vuli mundu yaleeta kindu chi zahabu kuva ikihaanwa ku Yahova.

²³ Mundu woosi uwaali ninguvu indahi yibulu, yu muzambarao, kiforosadi, ninzakanyu, ni yikatani indahi, nu vwoya vwi zimburi, ni zinguvu zia magondi mamigu zie irangi inzakanyu, zinguvu zie kesero kilahi yivi viosi vialetwa.

²⁴ Yavo vosi avaari nu vunyali vwu kuhaana mugasa, izahabu valeta kihanwa chavo ku Yahova; nu mundu woosi waali nimisaala jikikuma jinyala kutumika ku miyinzi josi vajileeta.

²⁵ Avakali vasiza valahi valeta zinguvu zia vanavi na makono gaavo; valeta zinguvu zie katani indahi, zimbusi zia bulu, kandi ziu muzambarao, nu vwoya vwakanyu.

²⁶ Kandi valomba zimbusi kutura ku vwoya vwi zimburi.

²⁷ Vimiliri valeta amagina guvuguli ge berulo, amagina gukuhandiza ku kisibaho nu kusalamba yu mukiritu

²⁸ viukufunya mwayu, amaguta gu muzitaya, maguta gu kwivaka, kandi kimuli kifunyaa umwayu mulahi.

²⁹ Avandu vosi va Isiraeli vakali na vasaza valeta kihanwa ku Yahova, vihaanwa viukwihaana kigira miyinzi josi ja Yahova yavalaga vakole kuvitira ku Musa.

Avasiza vi Lihema liu kuvuganira mu na Yahova

³⁰ Musa yavolera avandu va Isiraeli, “Yahova umali kotovola Bezeleli, mwana wa Uri, mwisukulu wa Huri kutura muihiiri ya Yuda.

³¹ Nyasaye umali kumuha Roho weve, muvusiza, nu muvogeri, nu mu miyinzi jizing'ano ziosi ziu vusiza,

³² no kolomba miyinzi ji feza, ni ju mugasa, nijizahabu

³³ nu kuvaaza amagina nu kugahaandiza muzimbaho, niziavazwa, numumiyinzi jizing'ano ziosi ziu vusiza.

³⁴ Yahova umali kuhana kandi ku Oholiabu muyaayi wa Ahimasa kutura mu ihiiri ya Dani, unyala ukwigiza avandi uvusiza vwavo.

³⁵ Umali kuvaha ovogeri vwo kokora miyinzi zing'ano ziosi; avasiza vukuvaaza amagina, avasiza valungikizaa vulahi zing'ano ziosi ziuvusiza, avasiza vukunava ikatani indahi yirangi ya bulu, muzambarao ninzakanyu, kandi avasiza vi zinguvu zing'ano ziosi. Vanyara kokora zing'ano ziosi zie miyinzi kandi vaveeye avageri vukulungikiza miyinzi josi juvusiza.