Kutwula 34 - KITABU KITAKATIFU

Vibaho vihia via Magina

¹ Yahova yavolera Musa, “Vaza vibaho viviri via magina kuli viali viu kutanga, na ndang'oda kuvio amakuva gaali ku vibaho viu kutanga, via watanyia.

² Wetegeke mugamba mumavwevwe, na wanigiri ku kiguru cha Sinai kunzaganira kosonga kwacho.

³ Mundu mulala ataaza harara nivi mba; mundu mulala ataloleka ku ahimbi kolovega lwosi lwi kiguru mba; kandi magondi anoho zing'ombe zitanyoleka ku niziaya himbi ni kiguru mba.”

⁴ Kunangwa Musa yavaaza vibaho vindi viviri, nilidiku lialondaku, yaavigiinga navihira ku kiguru cha Sinai, kuli Yahova yaali naamulagi.

⁵ Yahova yiikira mu lilesi, nasingira harara weve, nukutivula lieta lilie litakatifu Yahova.

⁶ Maku Yahova yavita imbiri weve navoora, “inzi, Yahova, mbeeye Nyasaye wizura zimbavasi kandi lirerera, utaveeye nu vutima vwa vwangu kandi umanyia uvuyanzi vonene nu vusuuvirifu.

⁷ Inzi nduukizaa lisuuviriza liange kumakula na makura kandi samiiha uvudamanu nuvwoni; navuzwa ndahaana amageri ku avana kandi kuvisukululwi kuduuka kulikula lia kavaga kandi lia kane kigira vwoni vwa vababa vaavo.”

⁸ Musa yagwa hasi vwangu mamumama kandi nasigamira Yahova.

⁹ Musa yavoola, “Yahova, niiva ligali uyanzizwa ninzi, ngogonya, nuyanza unyala kuzia harara nikunyi. Avandu yava vaveeye vikirage, navuzwa ukusamihi uvudamanu vwitu kandi vwoni vwitu, kandi ukuvugiliri kuva avandu vovo.”

Lilagana Likolangwa Lihia

¹⁰ Yahova yavolera Musa, “Inzi kalunu nombaa lilagana na avandu va Isiraeli. Ndakora vindu vinene imbiri wavo vikikiri kokoleka ku havundu hoosi mu lirova hagati hi zihiiri mba. Avandu vosi valakalole vindu vinene via Inzi, Yahova, nyara kokora, kigira nziza kumukolera vindu viukutihiza.

¹¹ Mulonde amalago ga inzi muheezaa lidiku lia kalunu. Ndakunga vandu va Mori, Kanaani, Hiti, Perezi, na Jebusi vatuli imbiri winyu lwa mwisuunda kuvingilira.

¹² Mutahambani, na avandu vikivala cha muzizaa mu mba, kigira yaga ganyala kuva mutego gwu kwita hagati hinyu.

¹³ Mu vogono yivwo, muvunanyie uvwali vwavo, nukusambula minaara mitakatifu jaavo, nokotemanyia vifananyi viu munyasaye wikikali wavo Ashera.

¹⁴ “Mutasigamiri umunyasaye wundi mba kigira Inzi, Yahova, mbeeye Nyasaye wokokendeka.

¹⁵ Mutahambani na avandu vi kivala yicho mba, kigira ulwa vasigamira avanyasaye vatamanyikani nu kuhaana kuvo visiuviliru, valamugenihiza, kandi mulagelizwa ukulia harara navo viukulia viavahanaa ku vanyasaye vaavo.

¹⁶ Avayaayi vinyu vanyara koleta avakali vageni, avanyala kuvakola vavuli kuva avasuuvirifu ku Inzi, kandi vasigamiri avanyasaye vaavo.

¹⁷ “Mutelomberi avanyasaye vimigasa kandi kuvasigamira mba.

¹⁸ “Mulindi nu kwizuliza Lisavo liu mugadi gutaveeye mu namamera. Kuli mali kukulaga, mulalia mugadi gutaveeye mu na mamera ku madiku saba, mu mweli gwa Abibu, kigira gwaali mu mweli zana yigwo gwa mwatula Egebeti.

¹⁹ “Vindu viosi viatanga kwivulwa viveeye viange; muyaayi wukutanga kandi ku mitugu jijo jikisaza viosi viveeye viange.

²⁰ Navuzwa chatanga kwivulwa chisukiri, mulilana kukigula kandi ku lihaana kememe mu vogono vwacho. Niiva simwenya kwirana kukigula muvunanyie ligoti liacho. Mwilane kugura vuli muyaayi watanga kwivulwa. “Hatava ho nu mulala ololekaa imbiri wange nataveeye nikihaanwa mba.

²¹ “Muveeye na madiku sita gokokoleramu miyinzi jinyu, navuzwa mutakoli miyinzi ku lidiku lia saba mba, kali mu ing'inga yililima anoho yiligesa.

²² “Mulinda nukwizuliza Lisavo lie Ligesa lwa mutanga kogesa viukulia viukutanga vie ingano, kandi mwizurizi nukulinda Lisavo lia madiri mu ing'inga ya muvungiza makuyu ginyu.

²³ “Avasaza vosi kuduuka vaze kusigamira Yahova, Nyasaye wa avandu va Isiraeli, haali kavaga ku muhiga.

²⁴ Kigira ndakunga zihiiri imbiri woovo kandi ndavambalariza zinzako zie kivala chienyu kandi sihalavaho nu mundu ogeriza kuguuta kivala chienyu mba, lwa muloleka imbiri wa Yahova Nyasaye winyu haali kavaga ku muhiga.

²⁵ “Mutahaani masahi gikisiuviliru change harara nikindu choosi ekeveeye mu na mamera mba; kandi kihanwa chi lipasaka kitatigala kuduuka mugamba mba.

²⁶ “Muleete munyumba ya Yahova iligesa liukutanga lievitagwa vienyu vuli muhiga. “Mutadekeri kememe nikikinuuna maveere ganyia mba.”

²⁷ Yahova yavolera Musa, “Ong'ode amakuva yaga, kigira galava ku musingi gwa mang'ana yaga nduuki kolomba lilagana ku ivi na vandu va Isiraeli.”

²⁸ Musa yamenya yo harara na Yahova madiku arubaini, mbasu nuvudiku natalizaa anoho kunwa kindu. Yang'oda amalago likomi ku vivaho.

Musa yasulunguta kutura mu kiguru cha Sinai

²⁹ Lwa Musa yasulunguta kutura mu kiguru cha Sinai nagiingi amalago likomi, mumoni mwimwe mwang'ereng'ana kigira yaali natura komoloma na Yahova; navuzwa mwene siyamanya mba.

³⁰ Haruni na vandi vosi vahenza Musa nivalora mumoni mwimwe nimung'ereng'anaa, na vaatia kwisuunda ahimbi kuye.

³¹ Navuzwa Musa yavalanga Haruni harara na aviimiliri vosi; vavandu vazia kuye, na Musa yamoloma kuvo.

³² Inyima wa yago, avandu vosi va Isiraeli vamukumbiriza, na Musa yavaha amalago ga Yahova yaali naamuheleye ku kiguru cha Sinai.

³³ Lwa Musa yaali ni yakamala komoloma navo, yakunika mumoni mwimwe ninguvu inzasasu.

³⁴ Ing'inga yoosi ya Musa yingiraa mu Lihema komoloma na Yahova yaatuliza inguvu inzasasu. Na ulwa yaatulaa ichova, yavolera avandu va Isiraeli vindu viosi via yalagwa kovora,

³⁵ kandi valora mu moni mwimwe nimung'ereng'ana; maku Musa yifumaa inguvu inzasasu mu moni mwimwe kuduuka ing'inga yindi lwa yazizaa komoloma na Yahova.