Kutwula 33 - KITABU KITAKATIFU

Yahova yalaga avandu va Isiraeli vatuli ku kiguru cha Sinai

¹ Yahova yavolera Musa, “Tuli havundu hano, ivi harara na avandu vawaleeta kutura Egebeti, kandi muzie mukivala cha ndasuuviriza kuhaana ku Aburahamu Isaka na Yakobo kandi kuvisukululwi viavo.

² Ndatuma engelosi kumwimilira, kandi ndakunga vandu va Kanaani, Amori, Hiti, Perizi, Hivi, na Jebusi.

³ Muzizaa mukivala kigunamu ligali. Navuzwa inzi mwene sindazia nimunyi mba, kigira muveeye avandu vi kirage, kandi hawundi nyara kumudivizira kunzira.”

⁴ Lwa avandu vahulira makuva madamanu yaga, vatanga kusioma kandi sihaali ho nu mundu uwiviika viukwisiaha vivie mba.

⁵ Kigira Yahova yaali nalagi Musa avavoolere ndi, “Munyi muveeye avandu vikirage. Niiva ndakaziiyi ni munyi ku ing'inga engekeeke, ndakamudivizi ligali. Kalunu mutulizi viukwisiaha vienyu, na inzi ndalora ichanyala kumukolera.”

⁶ Kunangwa inyima wu kutura ku kiguru cha Sinai avandu va Isiraeli siviviika viukwisiaha viuvuguli mba.

Lihema liukwaganira mu Yahova

⁷ Vuli lwosi lwa vandu va Isiraeli vumbaka hokososa Musa yavugula Lihema Liukuvuganiramu ma aliumbaka ihale kutura havundu hokososa. Mundu woosi wenyaa kumanya vulaliri vwa Yahova yingira mu.

⁸ Lwa Musa yaazizaa ichova, uwene yeyo, avandu vasingilaa havwingiliru vwa mahema gaavo nivamuhenza kuduuka lwa Musa yingira mulio.

⁹ Inyima wa Musa yalange niyakingira mu Lihema, munara gwi lilesi gwika hasi, na Yahova yamoloma na Musa kutura mumalesi.

¹⁰ Lwa avandu valora munara gwi lilesi nigusingiyi imbiri wu vwingiliru vwi Lihema, vinamaa hasi. Vuli mundu yasigamiraa Yahova ha lihema lilie.

¹¹ Yahova yamoloma na Musa moni na moni, kuli mundu amolomaa nu mulina weve ma Musa yirana hokososa. Navuzwa musoleri Joshua, uwaali Mukonyeleri weve, mwana wa Nuni, yaatigara mu Lihema liukuvuganira mu.

Yahova yasuuviriza kuva na avandu veve

¹² Musa yavolera Yahova, “Henza, gaveeye agiligali ndi ivi umali kombolera nzimiliri avandu yava kuzia mu kivala yicho, navuzwa siomboleye nivwaha wautumaa kuzia harara ninzi mba. Umali kovora ndi umanyi vulahi ligali kandi uyanziziywi ninzi.

¹³ Niiva uyanziziywi ninzi, mbolera zing'anagani zizio, kunangwa nduuki kukutumikira kandi nzizagiliri kukuyaanziza. Wizulizi ndi umali kotovola ihiiri yiyi kuva ihiiri yooyo.”

¹⁴ Yahova yavoola, “Inzi mwene ndazia nivi na ndakuha iliguuta.”

¹⁵ Musa yativura, “Niiva siulazia nikunyi utakokola kutuli havundu hano mba.

¹⁶ Ganyala kumanyikana ndi ivi uyanziziywi na avandu vovo kandi ninzi, niiva siulazia nikunyi? Lizia liilio harara nikunyi, lilamanyia liavukanyia hagati hiitu na avandu vandi vosi avaveeye mu lirova.”

¹⁷ Yahova yavolera Musa, “Ndakora kuli umali koteeva, kigira ndakumanya vulahi ligali kandi nyanziziywi nivi.”

¹⁸ Maku Musa yateeva, “Mwaza, nuyanza umanyie uvukumi vuvwo kalunu.”

¹⁹ Yahova yamutivulira, “Ndavitiza uvulahi nuvukumi vwange imbiri woovo, ndalandiza lieta liange litakatifu. Inzi mbeeye Yahova. Ndava ni zimbavasi na uyu wanyenyaa koveera zimbavasi. Kandi ndava ni livererera ku uyu owanyenya koverererwa.

²⁰ Sindaleka olole mumoni mwange mba, kigira sihaveeye ho nu mundu unyala kondola ma ave mwoyo mba,

²¹ navuzwa hano haveeye ho na havundu kolovega lwange aha unyala kusingila ku lwanda.

²² Na galava ndi lwu uvukumi vwange vuvitaa, ndakuvika mu luhangaywa lwu lwanda na ndakufuma numukono gwange kuduuka lwamba nindakavita.

²³ Maku ndatuliza ho mukono gwange, na ulalola mugongo mwange, navuzwa siulalola mumoni mwange mba.”