Kutwula 32 - KITABU KITAKATIFU

Igiriki yizahabu

¹ Lwa avandu valora ndi Musa ulindagiyi kwika kutura mukigulu, vivungikiza himbi na Haruni, nivamuvoolera, “Sikumanyi ikimali kwekoleka ku mundu uyu Musa uwakwimilira kutura Egebeti mba; kunangwa okolombere umunyasaye unyala kukwimilira.”

² Haruni yavavolera, “Tulizi zimingiri zie izahabu ziveeye mumatu ga vakana na vayaayi vinyu kandi avakali vinyu, mundeetere.”

³ Kunangwa avandu vosi vatuliza zimingiri ziosi ziezahabu ziavaali nazio mu matu gaavo, nivazileeta ku Haruni.

⁴ Naye yavugula zinono yizio kutura mu makono gaavo, naziviika mukisambiru zisaluluki, niyitulura izahabu zana mu kelongero, nagivaaza nuluvaziru, nalomba kemoli kigiriki yizahabu. Avandu vavoola, “Isiraeli, uyu niyie munyasaye wiitu, uwakwimilira kutura Egebeti!”

⁵ Maku Haruni yumbaka uvwali imbiri wi igiriki yizahabu ma nalandiza kovora, “Mugamba lilava lidiku lie lisavo kuhaana luyali ku Yahova.”

⁶ Mugambazuri lidiku lialonda ku valeta zinyama ziukusamba kuli visiuviliru kandi zindi kuli zisadaka zie mirembe. Avandu viikara hasi kulia, nivanwa, nivavina; vagirung'ana ni vakora voheyi.

⁷ Yahova yavolera Musa, “Yika hasi vwangu, kigira avandu vovo avawimilira kutura mu kivala cha Egebeti, vamali kwona mbitilira.

⁸ Vamali koleka inzira ya ndaavalaga kolonda ku: vamali kwelombera kifananyi chi igiriki kutura ku izahabu isialulukiziywi nukugisigamira, nukuhaana kucho visiuviliru. Vavoola ndi oyo numunyasaye wavo, uwavatuliza mu kivala cha Egebeti.

⁹ Inzi manyi vulahi kirage cha avandu yava vaveeye nacho.

¹⁰ Kalunu, utageriza kungaya mba. Mbeeye nu vutima navo ligali kandi nziza kuvadiviza. Maku ndaakola ivi harara ni visukululwi vivio kuva ihiiri enene.”

¹¹ Navuzwa Musa yagoonya Yahova Nyasaye weve, navoora, “Yahova, kigira ki uvutima vuvwo voveeye ku avandu vovo, avawahonyia nuvunyari vuvwo vonene nuvatuliza mu kivala cha Egebeti?

¹² Kigira ki avandu va Egebeti vavoole ndi ivi wimilira avandu vovo kutura mu kivala chavo kuvitira mu vigulu noveeye nililohiza liukuvadiviza ligali? Lekera kuva nu vutima; girung'anyia zing'anagani zizio, na utaleta ikivi yiki ku vandu vovo mba.

¹³ Wizulizi Lilagana lia walomba na avatumikiri vovo Aburahamu, Isaka na Yakobo. Wizulizi lisuuviriza lia walomba navo ndi ulavaha visukululwi vinyingi kuli zing'ereng'ani ziu mwigulu, kandi kuvaha kivala chawavasuuviriza kuva miandu jaavo mihiga ni mihiga.”

¹⁴ Kunangwa Yahova yaagirung'anyia zing'anagani zizie, siyaleeta ku avandu veve kivi cha yaali navooye mba.

¹⁵ Musa yagirung'ana nasulunguta kutura mu Kiguru, nagiingi vibaho viviri mu mukono gwigwe na malago nigang'odeywi ku zimbega ziombi.

¹⁶ Nyasaye mwene yaali naalombi vibaho yivi nang'odi gamalago kuvio.

¹⁷ Joshua yahulira avandu nivahanzuka navolera Musa, “Mbulira liyoga liu vulwani hokososa.”

¹⁸ Musa yavoola, “Yigu sigoveeye mwoyo gwisango yiliguuta mba, anoho lilira lieliguutwa mba; eveeye isango yiliemba.”

¹⁹ Kunangwa lwa Musa yisunda ahimbi hokososa, yalora kifananyi chi igiriki yizahabu na avandu nivavina, yaali nu vutima ligali. Ahene yaho hasi hi kiguru, yalasa hasi vibaho viayaali nagiingi niviadika.

²⁰ Yavugula kemoli chi igiriki cha vaali nivalombi, naakisaamba mu muliru, nukukisia kuduuka nikigwa uvusie, kandi nazuganyia na amazi. Maku yaniga avandu va Isiraeli kuganwa.

²¹ Yavolera Haruni, “Avandu yava vakoli kinduki yiki? Ivi ndi uvakoli vingili mu vwoni vonene vwukutihiza kuli ndi?”

²² Haruni yativura, “Utava nu vutima ninzi mba ivi umanyi vulahi avandu yava, vaveeye nu mwoyo gwokokola uvudamanu.

²³ Vaamboleye ndi ‘Sikumanyi ichekolekaa ku mundu Musa uyu, uwakwimilira kutura Egebeti mba, kunangwa okolombere umunyasaye, ukwimirira.’

²⁴ Inzi ndavateeva vandeetere viju viavo viezahabu, na yavo avaari navio vaamba. Ndaaviviika mu muliru, kandi chatula mu ekemoli chi igiriki yiki.”

²⁵ Kunangwa Musa yamanya ndi Haruni niyie uwaleka avandu vibaale kandi vaagwa vindu viokosekerizwa na vasigu vaavo.

²⁶ Kunangwa Musa yasingira mukirivwa cha hokososa na hanzuka navoora, “Umundu woosi oveeye kolovega lwa Yahova, yisundi ku inzi!” Kunangwa vandu vihiiri ya Levi vosi visunda kuye kumukumberiza

²⁷ na yavavolera, “Yahova, Nyasaye wa Isiraeli avoora ndi; Mwevohe sa mulala ni kivavi chiche mu kekenge, na muviiti yiyi na yiyi kutura mu kirivwa yiki kuduuka mukirivwa yiki hagati ha hokososa, na vuli mundu yiiti amwavo weve, wache weve, nu mutende weve.”

²⁸ Avandu vi hiiri ya Levi vaakora kuli Musa yavalaga, na vita ahimbi avasaza 3,000 ku lidiku yilio.

²⁹ Musa yavolera vandu vi hiiri ya Levi, “Lidiku yili mumali kwivika halovega kuli vasaalisi mu vutumiki vwa Yahova kuliita vuli mundu muyaayi weve, amwavo weve kunangwa Yahova amuhe uvugasu vwivwe.”

³⁰ Kunangwa lidiku lialondaku Musa yavolera avandu, “Mumali kokora uvwoni ovonene ligali. Navuzwa kalunu ndanigira kuzia mukigulu ku Yahova; mbula ndanyoora lisamiifwa kigira vwoni vwinyu.”

³¹ Musa yirana ku Yahova navoora, “Avandu yava vamali kokora uvwoni vonene ligali, na velombeeye umunyasaye wizahabu.

³² Navuzwa kalunu nuuva nuyanza kuvasamiiha uvwoni vwavo, nigataveeye ndio, ngusaala, mwaza, utulizi lieta liange mu kitabu chicho cha waang'oda mu mita ga vandu vovo.”

³³ Yahova yavolera Musa, “Vandu vosi vamali kokora vwoni ndatuliza amita gaavo mu kitabu change.

³⁴ Kunangwa kalunu uzie, kwimilira avandu vaduuki havundu ha mali kokovoolera. Wizulizi ndi engelosi wange alakwimilira; navuzwa mu ing'inga yiza lwa ndihaana mageri ku avandu yava kigira uvwoni vwavo.”

³⁵ Kunangwa Yahova yatuma vulwaye vudamanu ku avandu, kigira vaakora Haruni kolomba kemoli chizahabu.