Kutwula 31 - KITABU KITAKATIFU

Avasiza vi Lihema lia Yahova

¹ Yahova yavolera Musa,

² “Inzi mali kotovola Bezeleli, muyaayi wa Uri, kandi mwisukulu wa Huru, kutura mu ihiiri ya Yuda,

³ kandi mali kuhaana kuye Roho wa Nyasaye. Mali kumuha ovogeri vwilimanyiriza, vusiza vwi miyinzi ji zing'ano ziosi.

⁴ Alalohiza miyinzi ju vusiza nijukusiaha nizahabu, ifeza kandi mugasa;

⁵ livaaza liamagina guvuguli nukugahandiza ku kibaho; nukusiaha miyinzi jukutumikira makono zing'ano ziosi.

⁶ Kandi, mali kotovola Oholiabu mwana wa Ahisamaku kutura mu ihiiri ya Dani kuyinzira harara naye. Mali kandi kumuha ovogeri vonene ku avasiza valahi vandi kunangwa vaduuki kolomba vindu viosi via mali kulaga vilombwe.

⁷ Lihema liukuvuganira mu, ni lisandugu lie Lilagana harara ni kikuniku chalio viju viosi iviveeye mu lihema liukuvuganiramu,

⁸ emesa niviju viayo viosi, kinaara chi zitaya kisiyiywi ni zahabu indahi viju viacho viosi, kinaara chi zitaya kisiyiywi ni zahabu indahi viju viacho viosi, nu vwali vwukusambira ku kimuli,

⁹ uvwali vwukusambira ku vihaanwa viu kusambwa harara ni viju viavwo viosi, ebenzeni yukwisavira ku nuvwikaliru vwayo,

¹⁰ zinguvu zindahi ligali ziuvusalisi, zinguvu zindakatifu zia Haruni, na vayaayi veve kutumikira lwa vatumika kuli avasaalisi,

¹¹ amaguta gukuvaka, nikimuli kifunyaa mwayu cha Havundu Hatakatifu. Mulikola vindu yivi viosi, vaduukana vakole kuli ndaakulaga.”

Lisabato

¹² Yahova yalaga Musa

¹³ avolere avandu va Isiraeli ndi, “Mulindi lisabato, lidiku liange liokososa, kigira liveeye kelolero hagati hange ni munyi, ku zing'inga ziosi ziza, ukumanyia ndi, Inzi Yahova, mali kumukola muve avandu vange.

¹⁴ Kuduuka mulindi lidiku lielisosa, kigira liveeye litakatifu. Mundu woosi uvula kulinda lidiku yili, navuzwa ayinziraa, adukanaa yiitwi.

¹⁵ Muveeye na madiku sita gokokola miyinzi jinyu, navuzwa lidiku lia saba lilava lidiku linene liatakasirwa inzi Yahova. Mundu woosi okola miyinzi josi ku lidiku yili, adukanaa yiitwi.

¹⁶ Kunangwa avandu va Isiraeli valalinda lidiku yili kuva kelolero chi lilagana.

¹⁷ Liveeye lilolekiza liokuhindira hagati hange na avandu va Isiraeli, kigira Inzi, Yahova, ndaalomba ligulu ni lirova mu madiku sita, na lidiku lia saba ndaaleka kokora miyinzi nesosa.”

¹⁸ Lwa Nyasaye yamala komoloma ku Musa mu kiguru cha Sinai, yamuha vibaho viviri ukwa Nyasaye mwene yaali nang'odi amalago.