Kutwula 30 - KITABU KITAKATIFU

Uvwali vwukusambira ku kimuli

¹ “Olombe uvwali kutura ku lubaho lwu musaala gwi kikuma, vwukusambira ku kimuli.

² Kuduuka vove voleng'ani zimbega ziosi, uvutambi vove zisendimita 45 kandi vugika vove zisendimita 45; uvudiguluku vove zisendimita 90. Zinziga zizvwo mu zikona zine zive kindu kilala.

³ Ukuniki kwigulu kwavwo, zimbega zine ziosi, zinziga ziavwo zive ni izahabu indahi, kandi uviiki ku ligemo lie zahabu ku vukumbiriza.

⁴ Olombe zimingiri ziviri ziukuvugingira ku kandi uzihandizi isi wi ligemo ku zimbega ziviri, ukugumira misaala ja vugingirwa ku.

⁵ Olombe misaala yiji kutura ku zimbaho zi misaala ji kikuma na uvake ku izahabu.

⁶ Uviiki ichova wu vwali yivu inguvu yukukinga imbiri wi Lisandugu lie Lilagana. Yaho niho havundu ha nzaganiri niivi

⁷ Vuli mugamba lwa Haruni yaza kwetegekiza zitaya, kuduuka asambili ku kimuli kifunyaa mwayu mulahi.

⁸ Kuduuka akole malala mere lwa ahambizaa zitaya hamugorova. Lihaana kimuli yili kuduuka lizizagiliri zing'inga ziosi ziza.

⁹ Mutahaana ku vwali yivu kimuli choosi ichagaywa mba, kihanwa chinyama iyagaywa, anoho kihanwa chu vuswage vwosi, kandi utasundula kihanwa chiwaini yoosi mba.

¹⁰ Haruni alakola muruka gwu kutakasa uvwali ku liviika ku zinziga zine, amasahi ginyama yahaanwa kuli kisiuviriru chu vwoni vuli lulala ku muhiga. Yiki kilakolwa vuli muhiga ku zing'inga ziosi ziza. Uvwali yivu vulava vutakatifu ligali, uvwatakaswa kigira inzi, Yahova.”

Uvusuru kigira Lihema lia Yahova

¹¹ Yahova yavolera Musa

¹² “Lwuvaliza avandu va Isiraeli, vuli mundu alandunga vuguli vwi livamwoyo lilie; kunangwa kivi kivuli kuuza kuye lwi livaliza lizizagiliraa.

¹³ Vuli mundu uvalizwa kuduuka atuungi mutungu gwa mabese genyekaa, nigabimiywi kolondekana ku vuguli vwavugilirwa na vanene. Vuli mundu kuduuka atuungi yaga kuli kihanwa ku Inzi.

¹⁴ Vuli mundu uvalizwa, agaveeye kovora, vuli musaza oveeye ni mihiga sirini anoho kuvita ndio kuduuka yandungi mabese yaga.

¹⁵ Mutugi sialatunga mbitilira mba, anoho kali mudaka sialatunga mabese makekeeke lwa vava nivatunga mabese yaga kigira livamwoyo liavo mba.

¹⁶ Muvungizi mabese yaga kutura ku avandu va Isiraeli na mugatumikiri ku vutumiki vwi Lihema liu kuvuganira mu. Vusuuru yivu vulava mitungu kigira livamwoyo liavo; kandi ndizuliza kuvakinga.”

Ebenzeni Yumugasa

¹⁷ Yahova yavolera Musa,

¹⁸ “Olombe ebenzeni yumugasa eveeye nuvwikaliru vwumugasa. Ugiviki hagati hi Lihema liukuvuganira mu nu vwali, ma uviiki ku amazi.

¹⁹ Haruni harara na vayaayi veve kuduuka vatumikiri amazi yaga kwisaava amakono gaavo nivirenge;

²⁰ nivakiri kwingira mu Lihema liu kuvuganiramu, anoho kwisunda ahimbi ku vwali kuhaana vihaanwa vie viukulia. Maku sivalitwa mba.

²¹ Kuduuka visave amakono gaavo nivirenge, kunangwa vavuli kukuza. Yili nililago liavo harara ni visukululwi viavo vaduukana valonde mihiga ni mihiga.”

Amaguta gu kuvaka

²² Yahova yavolera Musa,

²³ “Uvuguli vindu vifunya mwayu mulahi, imanemane yamazi zikilo sita, zikilo zivaga ziumudalasini, zikilo zivaga zie indago enolu,

²⁴ kandi zikilo sita zie ikida ziosi ziabimwa kolondekana nikibimu chavugilirwa. Omeede ku zilita zine zia maguta ga muzeituni

²⁵ kandi olombe maguta matakatifu gukuvaka, agazuganywa kuli epoda nivifunya mwayu. Yaga galava maguta matakatifu gukuvaka.

²⁶ Ugatumikili kuvaka Lihema liukuvuganira mu, Lisandugu lie Lilagana,

²⁷ emesa, ni viju viayo viosi, kinaara chi itaya niviju viayo, uvwali vwukusambira ku kimuli.

²⁸ Uvwali vwukusambira ku vihaanwa, harara ni viju viavwo viosi, kandi ebenzeni yukwisavira ku harara nuvwikaliru vwayo.

²⁹ Utakase vindu yivi viosi munzira yiyi, na vilava vitakatifu ligali; kandi mundu woosi anoho kindu choosi ikidiira ku kilasalirizwa ni zinguru ziuvutakatifu vwacho.

³⁰ Maku uvake Haruni harara na vayaayi veve amaguta, kandi uvatakase vaduuki kundumikira kuli avasaalisi.

³¹ Ovoolere avandu va Isiraeli, ‘Yaga galava maguta Matakatifu gukuvaka mu vutumikiri vwange mu visukululwi vienyu viosi zing'inga ziza ziosi.

³² Sigaduukana gasundulwi ku muviri gwu mundu wa kazozo mba, kandi utatumikira inzira ndala nzere kolomba agandi kufwanana na yaga ku ligazuganyia mba. Gaveeye matakatifu kandi galava matakatifu ku munyi.

³³ Mundu woosi olomba maguta kuli yaga, anoho utumikira maguta yaga ku mundu woosi utaveeye musaalisi, sialavalizwa kuva mulala ku avandu vange mba.’ ”

Kimuli

³⁴ Yahova yavolera Musa, “Uvuguli vidonye vileng'ani kutura ku vitagwa vifunya mwayu yivi; isitakite, onicha, galibanumu, ni kimuli.

³⁵ Uvitumikiri kolomba kimuli kizuganyiywi mu maguta gafunyaa mwayu. Omeede ku ijumbi kugilinda eve indahi kandi indakatifu.

³⁶ Uvuguli kedonye kucho usie kigwi epoda indahi, ugihili mu Lihema liukuvuganira mu, kandi wuhi imbiri wi Lisandugu lie lilagana. Okole kimuli yiki keve kitakatifu ligali.

³⁷ Utatumikira inzira ndala nzere welombere kimuli choosi kuli yiki mba. Ukivuguli kuli keveeye kindu kitakatifu ichatakaswa kigira inzi.

³⁸ Niiva mundu woosi alombaa kimuli kuli yiki ku litumikira maguta gu mwayu, sialavalizwa kuva mulala ku avandu vange mba.”