Kutwula 29 - KITABU KITAKATIFU

Litakaswa lia Haruni na vayaayi veve kuva vasaalisi

¹ “Yiki nicho cha udukana kokora kutakasa Haruni na vayaayi veve kuvakola kuva avasaalisi, vaduuki kundumikira. Uvuguli ekemoli chi giriki harara na magondi mamigu gaviri vugira imbara.

² Tumikira uvusie vulahi vwi ingano, uvutaveeye na mamera, olombe umugadi kandi zikeki izizuganyiywi mu amaguta, izindi zitaveeye mu na maguta na nizindi uzilombe kuli ivisukuti ivivakiywi ku amaguta.

³ Uviviiki mu kikabo ma uvihaane ku inzi harara ni igiriki na magondi mamigu gaviri lwa uhaana visiuviliru yivi.

⁴ “Oleete Haruni na vayaayi veve ha vwingiliru vwi Lihema liukuvuganira mu, na uvavoolere visingi na mazi gu kwitakasa.

⁵ Maku uviiki Haruni zinguvu ziu vusaalisi, lisadi, kisibao, iganza ivitiraa mu kisibao, isalamba yu mukiritu, kandi umusibi.

⁶ Umuviiki ekelemba, ma ovohe kucho ikimanyiru kitakatifu keng'odeywi ku amang'oda gavoora, ‘Umali kutakaswa kigira vutumiki vwa Yahova.’

⁷ Maku uvuguli amaguta gu kuvaka, uzuki ku mutwi gwigwe, ma umuvake.

⁸ “Uvuguli avayaayi veve ma uvaviiki amasadi;

⁹ imisibi mu visindi viavo kandi zikofia ku mitwi jaavo. Nindio gakuduukiraa uviiki utakase Haruni na vayaayi veve. Yavo harara ni visukululwi viavo valandumikira kuli avasaalisi mihiga ni mihiga.

¹⁰ “Oleete igiriki imbiri wi Lihema Liukuvuganira mu, na ovoolere Haruni na vayaayi veve vaviiki amakono gaavo ku mitwi jaavo.

¹¹ Usinziri igiriki imbiri wange ha vwingiliru hi Lihema Liukuvuganira mu.

¹² Uvuguli ku masahi gi igiriki ugaviiki ku zinziga ziu vwali na utumikiri ekedete chicho, kandi uvuguli amasahi gatigaye ugasunduli ha vwikaliru hu vwali.

¹³ Uvuguli ikivana choosi ikifumaa ivindu viu munda, inyama indahi yingudumani, kandi izimbigu ziviri ni ziveeye ni kivana kuzio, ma uzisambiri ku vwali.

¹⁴ Navuzwa usambiri inyama yi igiriki, ekesero chayo, harara na mara gayo ichova wa hokososa. Yiki ni kihanwa chu kutuliza uvwoni vwa vasaalisi.

¹⁵ “Uvuguli lilala ku magondi mamigu, ma ovoolere Haruni na vayaayi veve vaviiki amakono gaavo ku mutwi gwalio.

¹⁶ Usinzi ligondi yili ma uvuguli amasahi galio wuhi ku zimbega ziosi ziu vwali.

¹⁷ Ukalanyie ligondi yilio mu vidonye; wogizi ivindu viu munda harara ni vilenge vienyima, ma uviviiki ku mutwi ni vidonye vindi.

¹⁸ Usambiri iligondi yili ku vwali kuli ikihaanwa chukusambwa. Umwayu gwi kihanwa yiki gunyaanzizaa.

¹⁹ “Uvuguli ligondi lindi limigu, Haruni harara na vayaayi veve na vaviiki amakono gaavo ku mutwi gwalio.

²⁰ Usinzi ligondi yili na uvuguli amasahi galio kugaviika kosonga yu gutu gwu mukono mulungi gwa Haruni na vayaayi veve, ku videte vinene via makono gaavo gu mukono mulungi kandi ku vino vinene vie virenge vilungi. Wuhi amasahi gatigaye ku zikona ziosi zine ziu vwali.

²¹ Uvuguli ku masahi gaveeye ku vwali harara na maguta gu kuvakwa, na wuhi ku Haruni nu ku zinguvu zizie kandi ku vayaayi veve ni zinguvu ziavo. Haruni, avayaayi veve, harara ni zinguvu ziavo valatakaswa kigira vutumiki vwange.

²² “Ukale ikivana chi ligondi limigu, ikivana chu musembe, ikivana kifumaa ivindu viu munda, inyama indahi yingudumani, izimbigu ziviri ni kivana keveeye kuzio, kandi kinama kilungi.

²³ Uvuguli umugadi gwa vuli lugano kutura mu kikabo chu mugadi gumali kuhaanwa ku inzi: mulala ogolombeywi na maguta ga muzeituni, nu gundi golombeywi vugira amaguta, kandi ikisikuti kilala.

²⁴ Uviiki iviukulia yivi viosi mu makono ga Haruni na vayaayi veve, kandi uvavoolere vaviviki halovega kuva ikihaanwa lehagimwa.

²⁵ Maku uvivuguli kutura mu makono gaavo na uvisambiri ku vwali, igulu wi kihanwa chu kusambwa, kuva kuli kihanwa chu chukulia ku inzi. Mwayu gwi kihanwa yiki goveeye liyaanziza ku inzi.

²⁶ “Uvuguli ikididimo chi ligondi yili ukiviiki halovega kigira inzi kuva ikihaanwa lehagimwa. Ekedonye yiki kilava ichicho.

²⁷ “Lwu umusaalisi atakaswaa, ikididimo harara ni kinama chi ligondi limigu kitumikirwa mu litakaswa vilatakaswa kuva kihanwa clehagimwa, na vilaviikwa halovega kulwa vasaalisi.

²⁸ Yili lilaga liange litagirung'ana mba, lwa vandu vange vahaana kihanwa chimirembe, inyama yi kididiimo harara ni kinama viveeye via vasaalisi. Yiki ni kihanwa cha vandu ku inzi, Yahova.

²⁹ “Zinguvu zia Haruni ziu vusaalisi zilahevwa ivisukulurwi vivie lwa va nakuza, navaduuki kwivika lwa vasaliswa.

³⁰ Umuyaayi wa Haruni uvugura uvwiyangu vwivwe kuli umusaalisi, kuduuka yiviiki zinguvu ziene yizio ku madiku saba lwa yaazaa mu Lihema Liukuvuganira mu.

³¹ “Uvuguli inyama yi ligondi limigu imali kutumika ku litakasa Haruni harara na vayaayi veve na ogedeekere havundu hatakatifu.

³² Gavadukiraa valiri inyama yiyi harara nu mugadi gutigaye mu kihinda havwingiliru vwilihema liu kuvuganiramu.

³³ Valalia vindu yivio viu kwitakasila nu kusamiifwa amahiolo gaavo ing'inga yu kusaaliswa. Avasaalisi venyine nivo avaadukana kulia ichukulia yiki kigira chatakaswa.

³⁴ Niiva ichukulia choosi anoho inyama yoosi siviliviiywi kuduuka mugambazuri, gaduukanaa vitigaye visambwe; sigenyekaa viliivwi mba kigira viatakaswa.

³⁵ “Okole miruka ju kutakasa Haruni na vayaayi veve ku madiku saba kuli mali kukulaga.

³⁶ Vuli lidiku kuduuka uhaane igiriki kuva kuli ikisiuviliru, kunangwa uvwoni vuduuki kusamifwa. Yaga galakola vwali kuva vulahi. Maku uvake uvwali zana amaguta ga muzeituni kovokola vove uvutakatifu.

³⁷ Okole ageene yaga ku madiku saba. Maku uvwali vulava uvutakatifu ligali, ni ikindu choosi ikidiira ku vwali yivu kilava kitakatifu.

Ivihaanwa via Vuli Lidiku

³⁸ “Vuli lidiku ku zing'inga ziza, uhaane visiuviliru vie vimeme viviri ku vwali iviveeye umuhiga mulala.

³⁹ Uhaane ekememe kilala zing'inga zia mugamba, ni ikindi ukihaane hamugorova.

⁴⁰ Uhaane ikilo ndala yu vusie uvunyuki vwi ingano ni vuzugani ilita ndala ya maguta malahi ga muzeituni lwa uhaana kememe chukutanga. Uzuki ilita ndala yi waini eve kuli ikihaanwa chukunwa.

⁴¹ Uhaane ekememe chakaviri hamugorova harara ni kihanwa kilala chere chu vusie, amaguta ga muzeituni ni iwaini kuli ikibimu cha hamugamba. Yiki ni kihanwa chi chukulia ku inzi Yahova, kigira umwayu gwacho nu mulahi ligali ku inzi.

⁴² Ing'inga yoosi yiza, kihanwa chukusamba yiki kuduuka kihaanwi vuli kazozo ha vwingiliru vwi Lihema Liukuvuganira mu. Hene yaho niho hukwaaganira na vandu vange kandi komoloma ku ivi.

⁴³ Yaho niho hanomba livugana na vandu va Isiraeli, kandi uvukumi vwange vulalomba havundu hene yaho kuva Hatakatifu.

⁴⁴ Ndalomba Lihema liukuvuganiramu nu vwali kuva hatakatifu, na ndaviika Haruni na vayaayi veve halovega kundumikira kuli avasaalisi.

⁴⁵ Ndamenya hagati ha vandu vange Isiraeli, kandi ndava Nyasaye wavo.

⁴⁶ Valamanya ndi, inzi mbeeye Yahova, Nyasaye wavo wavaleeta kutura mu kivala cha Egebeti kunangwa nduuki komenya hagati haavo. Inzi mbeeye Yahova Nyasaye wavo.