Kutwula 27 - KITABU KITAKATIFU

Uvwali

¹ “Olombe uvwali kutura ku misaala ji kikuma. Gaduukanaa vove ovoleng'ani zimbega ziosi, zimita 2.2 vutambi kandi vuvambalaru na kuzia igulu, zimita 1.3.

² Olombe zinziga ku zisonga zine mu zikona ziavwo zine. Nazio zilalomba kedonye kilala nu vwali navwo vwosi vulavakwa mugasa.

³ Olombe kandi viju viukungula ligoke lie zitinya kandi, olombe mijiko, zibakuli, vigumiliru kandi nuluju lwu muliru. Viju yivi viosi ulavilomba kutura ku mugasa.

⁴ Olombe ekekereko chu mugasa, na uviiki ku zimingiri ziu mugasa mu zikona zine.

⁵ Uviiki kekereko yicho kundulu kwu vwali kolovega lwa hasi, ne kekereko kiduuki hagati hu vwali.

⁶ Olombe misaala jukuginga kutura ku misaala ji kikuma, na uvake ku mugasa.

⁷ Ujiviiki mu zimingiri, mu zimbega ziviri ziu vwali lwa vugingwa.

⁸ Olombe uvwali kutura ku zimbaho na oleke vove mu nu vwiyangu kuli ndaakumanyia mukigulu.

Lugaga lwi Lihema liukusigamira mu Yahova

⁹ “Olombe lugaga lwi Lihema liange kutura ku zinguvu ziukukinga zie katani indahi ligali. Kulovega lwi isavaalu, zinguvu ziu kukinga zive zimita 44 uvutambi,

¹⁰ zidiirwi ni zitiru sirini ziu mugasa mu vwikaliru sirini vwumugasa; ni vigumiliru harara ni zinziga ziazio vialombwa ku feza.

¹¹ Malala mere gakolwe kolovega lwa Ivaale wu lugaga.

¹² Kolovega lwimadioli zilava ho zinguvu ziukukinga ziu vutambi vwi zimita sirini na mbili, na zitiru likomi kandi vwikaliru likomi.

¹³ Kolovega lwi ivugwi wu vwingiliru voveeye mu mugizi, nagwo gulava zimita sirini na mbiri.

¹⁴ Zinguvu ziukukinga ziolovega lulala lwi kirivwa zilava zimita 6.6 ni zitiru zivaga kandi vwikaliru vwazio vuvaga.

¹⁵ Kolovega lundi lulava ni zinguvu ziukukinga zimita 6.6 vutambi nizitiiru zivaga nu vwikaliru vwazio vuvaga.

¹⁶ Muvwingiliru vwu mugizi vulava ninguvu yukukinga yuvutambi zimita tisa, inaviywi kutura ku katani indahi ligali na ilava niyanavilwa ku vwoya vwirangi ya bulu, muzambarao ninzakanyu niyanavirwa mu magirinya vulahi. Gaduukanaa idiirwi ni zitiru zine muvwikaliru vone.

¹⁷ Zitiru ziosi iziakumberiza mugizi zilahambanywa ni zinzizi zie feza ni vigumiliru vialombwa kutura kufeza vwikaliru vwumugasa.

¹⁸ Uvutambi vwu mugizi vulava zimita 44, na vuvambalaru zimita 2.2 kandi uvudiguluku zimita 2.2 zinguvu ziukukinga zilalombwa kutura ku ikatani indahi ligali nu vwikaliru vwu mugasa.

¹⁹ Viju vindi viosi vitumikaa mu Lihema nivivambo vie Lihema viosi kandi viu mugizi vilalombwa kutura ku mugasa.

Kulinda itaya Vulahi

²⁰ “Ulage avandu va Isiraeli valeete ku ivi amaguta ga mizeituni malahi ligali kigira itaya, kunangwa iduuki kuhambizwa vuli ha mugolova.

²¹ Haruni na vayaayi veve valahambiza itaya mu Lihema liukuvuganira mu ichova winguvu yukukinga eveeye imbiri wi lisandugu lie lilagana. Ahene yaho, imbiri wange iladuuka kutura hamugorova kuduuka mugambazuri. Lilaga yili lilakolwa na avandu va Isiraeli nivisukululwi viavo mihiga ni mihiga.