Kutwula 26 - KITABU KITAKATIFU

Lihema lia Yahova

¹ “Olombe mugati mwi Lihema litakatifu liukuvuganira mu, Lihema liukwaganira mu ninzi, kutura ku vidonye likomi vie katani indahi, vianavwa kutura ku vwoya vwirangi ya bulu, muzambarao kandi inzakanyu. Uviiki ku amangirinya ga vakerubi.

² Olombe vuli kedonye keve keleng'ani, ni kindi keve nu vutambi vwi zimita likomi na ziviri nu vuvambalaru zimita ziviri.

³ Unave vidonye vitano kuvio vive kedonye kilala, kandi okole ndio ku vindi vitano.

⁴ Olomba iviulu vie inguvu ya bulu kundulu ichova wa vuli kedonye.

⁵ Uviiki iviulu amusini ku kedonye chukutanga kandi chakaviri viduuki koleng'ana.

⁶ Olombe kandi vigumilu vie zahabu vindi 50 viukuhambanyira vidonye yivi kuva kedonye kilala.

⁷ “Olombe kikuniku chi Lihema kutura ku vidonye inguvu ivialombwa ku vwoya vwi zimburi.

⁸ Olombe viosi vive vileng'anu, uvutambi vwi zimita likomi na zivaga nu vuvambalaru vove zimita ziviri.

⁹ Unave vidonye vitano kuvio vive inguvu ndala, nizindi sita zive kandi inguvu yindi. Ulingi kedonye cha sita haali kaviri imbiri wi Lihema.

¹⁰ Uviikaa iviulu amusini kundulu kwe kedonye chukumaliriza, kandi iviulu amusini kundulu kwe kedonye kindi.

¹¹ Olomba vigumiliru kuli zindoani ziu mugasa amusini muviiviki muviulu viung'anyie vidonye vindi yivio ku viduuki kolomba inguvu yukukunika eve indala.

¹² Mu suungi inusu ye kedonye kitigaye inyima wi Lihema.

¹³ Kedonye chi zisendimita amusini kiva nikitigala kuvuli lovega, keleleera kufuma zimbega zie Lihema.

¹⁴ “Olombe viukufuuma vindi viviri, kilala che kesero chi ligondi limigu chagilunganywa nirangi nzakanyu ni kindi ne kesero kilahi, kutumika kuli kikuniku chi chova.

¹⁵ “Olombe zimbaho zie Lihema zisingiri vulungi kutura ku lubaho lwi kikuma.

¹⁶ Vuli ifuremu ilava zimita zine uvutambi kandi uvuvambalaru vulava zisendimita sitini na sita.

¹⁷ Vuli furemu ilava nuvwungiru vuviri, kunangwa zifuremu zive zinyala kwung'anywa harara. Zifuremu ziosi zilava nuvwungiru yivu.

¹⁸ Olombe zifuremu zie Lihema silini kolovega lwi Isavaalu.

¹⁹ Olombe kandi vikalilu arubaini vwi ifeza isi wizifuremu sirini; viduku viviri isi wavuli ifuremu ndala kugumira viukwungira vialio viviri.

²⁰ Olombe zifuremu silini kolovega lwi Ivaale wi Lihema,

²¹ nu vwikaliru vwazio arubaini vwifeza, viviri isi wa vuli furemu.

²² Kigira inyima wi Lihema kolovega lwimadioli, olombe zifuremu sita,

²³ zifuremu ziviri ziu muzikona.

²⁴ Zifuremu ziu mukoona yizi zilung'anywa ha lwaalo ma zihambanywi ziosi vulahi kuduuka igulu. Zifuremu ziviri zilombanga zikona ziviri zilalombwa munzira yiyi.

²⁵ Na ndio zilava ho zifuremu munane nu vwikaliru vwazio vwu mugase 16, viviri vilava isi wa vuli furemu.

²⁶ “Kandi olombe zimbohero ziu lubaho lwikikuma, zimbohero zitano kigira zifuremu ziveeye kolovega lulala lwi Lihema,

²⁷ kandi zitano kigira zifuremu ziveeye kolovega Lundi, kandi zimbohero zitano kigira zifuremu kundulu inyima kolovega lwi madioli wi Lihema.

²⁸ Lovohero loveeye hagati hi zifuremu lulava kutura kundulu kwi lihema kuduuka kundulu kundi kwi Lihema.

²⁹ Ulavaka izahabu ku zifuremu, kandi uviiki ku zimingiri ziezahabu zigumiri zimbohero, iziduukanaa nazio zivakwe izahabu.

³⁰ Olombe Lihema kolondekana ni lifana lia ndakumanyia ku kiguru.

³¹ “Olombe inguvu yukukinga kutura ku katani indahi iyanavirwa mu uvwoya vwi irangi ya bulu, muzambarao kandi inzakanyu. Olombe amangirinya gi vifananyi via Vakerubi gaveeye kunguvu zana.

³² Ulagisunga ku zitiru zine ziu musaala gwi kikuma iziavakwa izahabu, kandi ukwi vigumiliru vie zahabu uziviiki ku vwikaliru vone vwi ifeza.

³³ Usuungi inguvu yukukinga zana yiyi isi wi vigumiliru viveeye mu kesegese chi Lihema; kandi inyima wi inguvu yukukinga. Viika yo Lisandugu lie Lilagana iliveeye mu ni vibaho via magina. Inguvu yukinga zana yeyo ilava chukwavukanyia hagati ha Havundu Hatakatifu na Huvutakatifu hu vutakatifu ligali.

³⁴ Viika kikuniku ku Lisandugu lie Lilagana Havundu Hatakatifu ligali.

³⁵ Ichova wa havundu Hatakatifu hu Vutakatifu, uviiki ho emesa kolovega lwi Ivaale wi Lihema nikinaara chitaaya kolovega lwisavalu.

³⁶ “Muvwingiliru vwi Lihema olombe inguvu yukukinga kutura ku katani indahi iyanavilwa mu uvwoya vwi irangi ya bulu, muzambarao kandi inzakanyu, kandi iyanavwa vulahi na mangirinya.

³⁷ Munguvu yukukinga mumuliango yiyi olombe zitiru zitano ziu musaala gwikikuma na iziavakwa izahabu kandi izialomberwa ku vigumiliru vie zahabu; uzilombere vwikaliru vwumugasa vutano.