Kutwula 25 - KITABU KITAKATIFU

Isadaka yi Lihema Litakatifu

¹ Yahova yavolera Musa,

² “Volera avandu va Isiraeli vanombere kihanwa. Muvuguli vihaanwa viosi viu mundu ayaanza kuhaana.

³ Vihaanwa yivi vilava: izahabu, ifeza, mugasa,

⁴ ikatani indahi yi irangi ya bulu, muzambarao, vwoya vwakanyu, zinguvu zia lombwa ku vwoya vwi zimburi,

⁵ visero viamagondi makore viavakwa irangi inzakanyu, visero vialombwa nizinyasi vulahi ni misaala ji kikuma,

⁶ maguta gizitaya, maguta gukwivaka gafunyaa mwayu, ni kimuli kifunyanga umwayu,

⁷ iberulo na magina gandi guvuguli agukuvikwa mu kisibao chu Musaalisi munene kandi ni isalamba.

⁸ Kuduuka avandu vanombere lihema hatakatifu, kunduuki komenya hagati haavo.

⁹ Olombe lihema yili harara ni viju vialio viosi kolondekana ni lilohiza lia ndikumanyia.

Lisandugu lie Lilagana

¹⁰ “Mulombe lisandugu kutura ku lubaho lwi kikuma, uvutambi vwa hasi vove zisendimita 110, nu vuvambalaru vove zisendimita 66, nu vutambi vwukuzia igulu vove zisendimita 66.

¹¹ Ulalikunika ni izahabu ligali kwigulu kandi mugati mwalio kandi ovodong'anyie kuzindulu ziosi ni izahabu.

¹² Olilombere zimingiri ziukungiraku zine zie izahabu ma uziviiki kuvirenge vialio vine, na mumbalu mwalio zimingiri ziviri kolovega lulala kandi ziviri kolovega Lundi.

¹³ Olombe vigutu viukugingiraku kutura ku lubaho lwi kikuma ma uvivake izahabu.

¹⁴ Kandi uvingilizi mu zimingiri ziveeye mumbalu mwilisandugu.

¹⁵ Zitiru yizi zilalekwa zive muzimingiri zie lisandugu na zitatulizwa mu mba.

¹⁶ Maku ulavika amagina gaviri ga malago gandikuha mulisandugu.

¹⁷ “Olombe kikuniku chi zahabu indahi uvutambi vwacho vove zisendimita 110 nuvuvambalaru vove zisendimita 66.

¹⁸ Olombe kandi vakerubi vaviri vi zahabu yaduywa.

¹⁹ Vuli kilala keve kundulu kwi kikuniku. Uvilombe vihambane kunangwa vive kikuniku kilala.

²⁰ Okole vakerubi yava vahenzane ku kikuniku yiki ni zimbaha ziazio zilafuuma kikuniku yiki.

²¹ Ulavika vidonye viviri viamagina gamalago musi mwilisandugu ma ulikuniki.

²² Ndaamunyoora wene yeyo, na kutura igulu wikikuniku hagati ha Vakerubi viviri, ndamuha amalago gange goosi kigira vana va Isiraeli.

Emesa yu mugadi guhaanwa ku Nyasaye

²³ “Olombe emesa kutura ku zimbaho zie kikuma, yu vutambi vwi zisendimita 88, nuvuvambalaru vwi zisendimita 44, nu uvutambi vwukuzia igulu vove zisendimita 66.

²⁴ Kuniki emesa yiyi nizahabu indahi ma uviiki kundulu kwayo izahabu.

²⁵ Olombe ulukigiti izahabu lugikumbilizi zimbega ziosi nalwo love zimilimita 75.

²⁶ Uzilombere kandi zimingiri zine zie zahabu nukuziviika mu zikona zine hivirenge viayo viveeye.

²⁷ Zimingiri zana zive ahimbi nulukigiti zigumiri misaala jigingaa emesa.

²⁸ Olombe misaala ji kikuma ukuniki ku nizahabu.

²⁹ Olombe zisahani, vikombe, zijagi, ni vituva viduuki kutumikilwa ku vihaanwa vie iwaini. Yivi viosi vilombwe nizahabu indahi ligali.

³⁰ Uviiki mugadi mutakatifu komesa na ugiviki imbiri wilisandugu lie lilagana, na komesa yiku koveku kazozo nu mugadi mutakatifu guhaaniywi ku inzi.

Kinaara chi Taya

³¹ “Olombe kandi kinaara chitaaya chizahabu indahi ligali. Olombe uvwikaliru vwacho nikigutu chacho vive muyinzi gwu muturi, vikombe viacho, matu gacho vimuli viacho, viosi vive kedonye kilala.

³² Na kilava ni zisia sita zilalaanda kutura muzimbega ziacho, zivaga kutura kuvuli lovega lwacho.

³³ Vuli lulala ku zisia sita yizio lulava nivimuli vivaga via mauwa galombeywi kuli vimuli viu muzuliu mu zisia zindi, vivaziywi kuli kinaara chi itaya.

³⁴ Kigutu chi kinaara chi itaya gaduukanaa keve ni vimuli vine via mauwa vialombwa kuli vimuli viu musaala gwu muzuliu.

³⁵ Na kulavaku ni kisivu kilala isi wi zisia zivaga ku zisia ziosi zie kinaara.

³⁶ Na ivivula, ni zisia kandi kinaara vilava vuzwa kedonye kilala chizahabu iduyiywi.

³⁷ Uhambizi zitaya saba ku kinaara na uziviiki higulu ziduuki kong'ereng'ana imbiri wacho.

³⁸ Ivisiminyiru viacho, ni zisahani ziazio uvilombe ni zahabu indahi ligali.

³⁹ Utumikiri zikiloguramu 35 zie izahabu indahi ligali okokora kinaara chitaaya nivindu yivi viosi.

⁴⁰ Na ohenze vulahi kuvilomba kolondekana nilifana liavio lia ndaakumanyia mu kiguru.