Kutwula 24 - KITABU KITAKATIFU

Lilagana lia Nyasaye na vandu veve

¹ Yahova yavolera Musa, “Hamba ku inzi ku kiguru, ivi harara na Haruni, Nadabu, Abihu na aviimiliri 70 va vandu va Isiraeli; nimuveeye himbi kuduuka mwiname hasi musigamira.

² Ivi weng'ine, ulaaza ahimbi ku inzi. Avandu sivanyala kwanigira ku kiguru mba.”

³ Musa yazia navolera avandu amalago goosi ga Yahova kandi amakuva goosi, na avandu vosi vativura harara nivavoora, “Kunyi kulakola vindu viosi via Yahova avooye.”

⁴ Kunangwa Musa yang'oda amalago goosi ga Yahova Mugamba gwalonda ku, yumbaka uvwali havundu hi kiguru kitangiraa ma nasimika ho amagina likomi na gaviri, lilala ku vuli ihiiri ya Isiraeli.

⁵ Maku yatuma vasoleri ku avandu va Isiraeli, vasambiri Yahova visiuviliru vie zing'ombe kuva vihaanwa vie mirembe.

⁶ Musa yavugula inusu yamasaahi gimitugu naazuka muzibakuli; ninusu niyuha ku vwali.

⁷ Maku yavugula kitabu chililagana, ichang'odwa mu amalago ga Yahova, ma naagasoma vudinyu ku avandu. Vavoola, “Kulahulira Yahova kandi kulakola vindu viosi viamali kukulaga.”

⁸ Maku Musa yavugula masahi gaali kubakuli niyuha ku vandu navoora, “Yaga na masahi gahambanyia lilagana lia Yahova yalomba ni munyi lwa yahaana amalago yaga.”

⁹ Musa, Haruni, Nadabu, Abihu, na vimiliri sabwini va vandu va Isiraeli vaanigira ku kiguru

¹⁰ na valora Nyasaye wa Isiraeli. Isi wi virenge vivie haali ho nikindu chafwanana amagina gaalwa hasi gi kibiriti, gi langi ya bulu kandi enengeru kuli ligulu.

¹¹ Nyasaye siyasaliriza vimiliri va Isiraeli yava mba; valora Nyasaye, na valia nivanwa harara.

Musa ku kiguru cha Sinai

¹² Yahova yavolera Musa, “Hamba ku inzi ku kiguru, na lwa oveeye hano, ndakuha ivibaho viviri via magina iving'odeeywi ku amalago goosi agu kwigiza avandu.”

¹³ Kunangwa Musa nu mukonyi weve Joshua vetegeka, na Musa yaatanga kwanigira ku kiguru kitakatifu.

¹⁴ Musa yavolera aviimiliri, “Mukulindiri hano hokososa kuduuka lwa kwirana. Haruni na Huri vaveeye hano ni munyi; mundu woosi uva naava nuvudinyu nuwache mulazia kuvo.”

¹⁵ Musa yanigira kukiguru cha Sinai, na lilesi lia kikunika.

¹⁶ Uvukumi vwa Yahova vwaza ku kiguru kandi lilesi liakikunika ku madiku sita. Lidiku lia saba Yahova yalanga Musa kutura hagati ha malesi.

¹⁷ Vukumi vwa Yahova vwaloleka kuli muliru gusambaa kondonyozi kwi kiguru imbiri wa avandu va Isiraeli.

¹⁸ Musa yazia yigulu ku kiguru niyingira mu malesi namenya yo madiku arubaini mbasu nu vudiku.