Kutwula 23 - KITABU KITAKATIFU

Likalaga lia Giligali

¹ “Utalandiza amakuva govovehi mba, kandi utakonya mundu mudamanu kuhaana lilokekiza lio vovehi mba.

² Utalonda uvunyingi vwa vandu lwa vaakora uvudamanu anoho agiligali lwahaana lilolekiza lio vovehi kugirung'anyia agiligali mba.

³ Utamanyia liyaanzilira ku mudaka mu liyaalwa lilie mba.

⁴ “Niiva olola eng'ombe anoho ibunda yu musigu woovo negotaa, vugula ugiilanyie ku mwene.

⁵ Niiva ibunda yeeye igwiyi nu musigo ogekonye kugisingiriza; utageleka mba.

⁶ “Utachaminya likalaga liu vulungi ku mudaka lwa aduukaa imbiri wi kiyaalo mba.

⁷ Utavoola amakuva guvugadi mba kandi utiita mundu utaveeye nimbala kandi mulungi mba, kigira ndakalagira woosi okola kindu kidamanu kuli yiki.

⁸ Mutavugilira kuvugura viambeti, kigira iviambeti vikoola avandu kuvula kolola agaveeye amalungi kandi vidivizaa vandu valungi.

⁹ “Mutadambizi mugeni mba; munyi mumanya vulahi kuli liiva liu kuva mugeni liveeye, kigira munyi mwaali avageni mu kivala cha Egebeti.

Muhiga gwa saba kandi Lidiku lia saba

¹⁰ “Ku mihiga sita mulamiiza uvuguza mu milimi jinyu na mulagesa.

¹¹ Navuzwa mu muhiga gwa saba mutagulima mba, kandi mutagesa kindu choosi ikiva nichamera mu mba. Avadaka vanyara kulia vimera mu, ni zinyama ziu mbulimu zinyala kulia yivio ivitigalaa. Mukore ndio ku milimi jinyu ji mizabibu kandi ja mizeituni.

¹² “Mulayinzira ku madiku sita ku lisiza, navuzwa mutayinziri ku lidiku lia saba mba, kunangwa avatugwa vinyu kandi avageni vamuyinziriraa, kali mitugu jinyu jiduuki kososa.

¹³ “Muhulirizi vindu viosi via inzi, Yahova, mali kovora ku munyi. Mutasaala ku vanyasaye vandi mba; kali mutatala amita gaavo mba.

Amasavo amanene gavaga

¹⁴ “Mulindi kandi mwizurizi masavo gavaga ku muhiga kuhaana luyali ku inzi.

¹⁵ Mu mweli gwa Abibu, mu mweli gwa mwatula Egebeti, mulombe lilia liu mugadi gutaveeye mu na mamera kuli ndaamulaga. Mutalia mugadi gwalomberwa mu amamera ku ing'inga ya madiku saba yaga mba. Mutaaza kusigamira vugira koleta isadaka yoosi mba.

¹⁶ “Mulindi kandi mwizurizi lisavo lwa mutanga kogesa viukulia vienyu “Mulindi kandi mwizurizi lisavo lia madiri mu ing'inga yi ichuvwi, lwa muvungiza amakuyu ginyu kutura mu milimi jinyu je vizabibu.

¹⁷ Vuli muhiga mu masavo gavaga yaga avandu vasaza vinyu vosi kuduuka vaze kusigamira, Yahova, Nyasaye winyu.

¹⁸ “Mutahaana mugadi gwalomberwa mu amamera lwa muhaanaa visiuviliru vienyu viu mutugu ku inzi mba. Itinya yi visiuviliru vie mitugu vihaaniywi ku inzi ing'inga ya masavo yaga, italekwa kuduuka mugamba golonda ku mba.

¹⁹ “Vuli muhiga mulaleeta munyumba ya Yahova Nyasaye winyu vuswage vwukutanga kogesa. “Utasinzi kememe chi ligondi anoho imburi nikinuuna maveere ginyia mba.

Nyasaye Yasuuviza liguutwa lia Kanaani

²⁰ “Ndatuma engelosi imbiri winyu kumukinga lwa mugendaa kandi ndamuleeta havundu ha ndaamwetegekizira.

²¹ Mumuhuliri gavoora kandi mumutie. Mutibaala kuye mba, kigira inzi mali kumutuma, kandi sialasamiiha liebaala kuli yilio mba.

²² Navuzwa niiva mumuhulira na mukore vindu viosi viamulagaa, Inzi ndamulwanira avasigu vinyu vosi.

²³ Engelosi wange alimiira imbiri wenyu nukumuhira mwingiri mu kivala cha vandu va Amori, Hiti, Perizi, Kanaani, Hivi, na Jebusi, na ndavadiviza ligali.

²⁴ Mutinamira avanyasaye vaavo anoho kuvasigamira mba, kandi mutavuguli likora ni miima jidiini yaavo mba. Mwononyie ligali nukuvunanyia minaara jaavo ja magina.

²⁵ Niiva mulasigamira inzi, Yahova Nyasaye winyu ndamugasiza ni viukulia kandi amazi, kandi ndatuliza uvulwaye vwinyu vwosi ku munyi.

²⁶ Mukivala chienyu mukali sialatula mwana anoho ave umugumba mba. Ndahaana kumunyi limenya lia madiku manyi.

²⁷ “Ndakora avandu vahing'ana ni munyi vatie Inzi; ndaleta ligoyana hagati ha avandu valeta uvulwani ku munyi na ndakora avasigu vinyu vosi vagirung'ane nukwiruka kutura ku munyi.

²⁸ Ndakora avasigu vinyu vave nuvuti kandi lidegera kigira amahalamba. Ndakunga vandu va Hivi, na Hiti, vatuli imbiri winyu.

²⁹ Sindavakunga vuzwa mu ing'inga yu muhiga mulala mba; Niiva ndakakoli ndio, kivala chakatigaye vuzwa mang'anye kandi zinyama ziu mbulimu ziakaveeye zinyingi ligali ku munyi.

³⁰ Mu vogono yivwo ndavatuliza nukuvakunga kuduuka lwa muva nimwakameedeka nokuduka avanyingi avamuvugula kivala.

³¹ Ndalomba zinzako zie kivala chiinyu zivambalale kutura ku mukono gwi Inyanza inzakanyu kuduuka kunyanza ya Meditareniani gwa vandu va Filisitia kandi kutura ku changalangwi kuduuka ku Mugera gwa Efurate. Ndamuha zinguru ku avandu vumukivala yicho na munyi mulavakunga vatuli imbiri winyu lwa muvingilira.

³² Mutalombi lilagana navo mba, anoho na avanyasaye vaavo mba.

³³ Mutaleki avandu yavo vamenye mu kivala chienyu mba; niiva mulavaleka vakole ndio, valamukola muhiole imbiri wange. Niiva mulasigamira avanyasaye vaavo, ligali yigu gulava mutego gwu kumwita.”