Kutwula 22 - KITABU KITAKATIFU

Amalago kigira mitungu

¹ “Niiva umundu aliiva eng'ombe anoho ligondi niyiita anoho naaguliza, gamuduukira atungi zing'ombe zitano kuvuli eng'ombe kandi amagondi gane ku vuli ligondi.

² “Niiva mwivi agumirwa niyiguula munyumba vudiku ma akuywi akuzi, umwiti oyo siaveeye nilihiolo liu kuruminda mba;

³ navuzwa niiva galekoleka mbasu, mundu yiiti mwivi oyo aveeye nilihiolo liukuruminda. “Kuduuka mwivi atuungi vindu via yiva, navuzwa niiva siaveeye nichatunga, kuduuka agulizwi kuli mutugwa aduuki kutunga ivindu via yivi.

⁴ “Niiva alanyoleka nu mutugu gwivwa nigoveeye mwoyo, niiva neng'ombe anoho ibunda anoho ligondi, kuduuka atungi haali kaviri.

⁵ “Niiva mundu aleka mitugu jije jiyaye mukiguuti anoho mu mulimi gwi mizabibu ma jizie kulia vitagwa viu mulimi gwuwache, kuduuka atuungi vitagwa vilahi ligali mulimi gwi mizabibu jije.

⁶ “Niiva mundu alahambiza muliru mu mulimi gwigwe ma gulaande kuvitira mundiva kuzia mu mulimi gwu wache nukusamba maduma anoho viukulia iviali nivigeseywi nukuvungizwa mu, oyo uwahambizi muliru alatungaa ivia yononyia.

⁷ “Niiva mundu avugiliraa kulindira uwache amabese anoho vindu vindi viuvuguli ma vivwi kutura munyumba yeeye, niiva mwivi oyo alanyooleka, alatungaa haali kaviri.

⁸ Navuzwa niiva mwivi oyo avula konyooleka, mundu walindaa miandu yijo alaletwa havundu hukusigamira Nyasaye, ahene yaho kuduuka alihiizwi imuma ndi siaveeye niyie uwiiva vindu viu wache mba.

⁹ “Muvindu viosi viletaa livitaana ku miandu, kali vive zing'ombe, anoho zibunda, anoho magondi, anoho zinguvu, kali vindu viosi niiva nivigoti, avandu vaviri vavitaani kigira miandu, valahirwa havundu ahukusigamira Nyasaye Mundu wa Nyasaye anyoora kuva mudamanu alatungaa haali kaviri.

¹⁰ “Niiva mundu alavugilira kulindira mundu wundi ibunda yeeye, anoho eng'ombe, anoho ligondi, anoho mutugu gundi gwosi, ma mutugu zana guukuzi anoho guvuniki anoho gwivwi, na niiva sihaveeye ho nu muloli,

¹¹ mundu oyo kuduuka azie hukusigamira Nyasaye nukwisuhizilwa ho nu kovora ndi siyiiva mutugu gwu wache mba. Niiva mutugu sigwivwa mba, mwene gwo alavugilira gwagota, nu mundu wundi oyo sialamutunga mba.

¹² Niiva mutugu yigwo gwivwa, mundu oyo kuduuka atungi mwene gwo.

¹³ Niiva gwitwa nizinyama ziu muvulimu, mundu oyo kuduuka alaleeta vidonye viatigala kuva kimanyiru; sialenyeka atuungi chi zinyama ziu muvulimu zimali kwita mba.

¹⁴ “Niiva mundu yegoba mutugu kutura ku mundu wundi ma gusaliriziywi anoho guukuzi mwenegwo nataveeyeho, mundu oyo kuduuka atuungi ku gwo.

¹⁵ Navuzwa niiva yaga galakoleka mwenegwo naveeye ho, mundu wegoba sialatunga mwenegwo mba. Niiva mutugu zana gwatungwa kigira vutumiki, ligotiza liagwo litatuungirwa mu mitungu juvutumiki javatunga.

Malago gidiini kandi limenya lilahi

¹⁶ “Niiva mundu avoliza mukaana mugima ukikiri kukwevwa ma agone naye adukanaa atuungi uvukwi vwosi kuli oserereywi kandi amuleete.

¹⁷ Navuzwa niiva baba wu mukaana alasura muyaayi oyo, kuduuka atuungi baba weve mabese goosi gaduukanaa nu vukwi vwu mukaana mugima.

¹⁸ “Mukali woosi okolaa uvukumu adukanaa yiitwi

¹⁹ “Mundu woosi ogonaa nu mutugu kuduuka yiitwi

²⁰ “Oyo uhaanaa visiuviliru ku munyasaye muvogono vwa inzi Nyasaye Wuvunyali kuduuka akalagirwi lidivizwa.

²¹ “Mutadambizi anoho kokolera mugeni uvudamanu mba, kigira kali na munyi mwaali avageni mu kivala cha Egebeti.

²² Mutakoleri mukunzakali anoho muvisandu uvudamanu woosi mba.

²³ Niiva mulakola ndio, inzi, Yahova, ndavativulira lwa vanira ku inzi mbakonye,

²⁴ na ndava nu vutima nimunyi kandi ndamwitira mu vulwani. Avakali vinyu valagwa avakunzakali na avana vinyu valagwa avavisandu.

²⁵ “Niiva ulegobiza amabese ku mulala ku avandu vange avaveeye hagati hinyu avadaka, utakola kuli mwegobizi wa mabese nukumuteva atuungi vukala mba.

²⁶ Niiva ulavugula ilikoti liu mulala live lilagana ndi alakakutuungi, gaduukanaa umwilanyili vwangu liuva nilikikiri koyeera,

²⁷ kigira liveeye lieng'ine vuzwa liayifuumaa ku anyoore uluuya. Kindiki kindi icha anyala kwifuma? Lwa yaniraa ku Inzi mukoonye, ndamutivulira kigira mbeeye wi zimbavasi.

²⁸ “Utamoloma amanyego ku Nyasaye, anoho kulaama wa avandu vovo mba.

²⁹ “Muhaane kuinzi zisadaka zie ligesa lienyu, lie iwaini yienyu namaguta gamizeituni ginyu lwa muva nimwakagesa. “Muhaane ku inzi avana vayaayi vinyu vukutanga kwivulwa.

³⁰ Muhaane ku inzi viukutanga kwivulwa ku zing'ombe zienyu kandi ku magondi ginyu. Muleke viukutanga kwivulwa visaza vimenye na mama wavo ku madiku saba, na ku lidiku lia munane muvileete ku inzi.

³¹ “Munyi muveeye avandu vange vatakase. Kulwayago, simulalia inyama yumutugu gwosi gumali kwitwa nizinyama ziu muvulimu mba, zinyama yizio muhaane ku zimbwa zilie.