Kutwula 20 - KITABU KITAKATIFU

Amalago Likomi

¹ Nyasaye yamoloma amakuva yaga:

² “Inzi mbeeye Yahova, Nyasaye winyu uwamutuliza Egebeti, uwa mwaali avatugwa.

³ “Mutasigamiri vanyasaye vandi nataveeye inzi mba.

⁴ “Mutelomberi vifananyi vie kindu choosi mwiligulu anoho chuku lirova, anoho chu mumazi musi mwi lirova mba.

⁵ Mutinamiri nukusigamira kifananyi choosi mba, kigira Inzi mbeeye Yahova Nyasaye winyu kandi simbugilira avanyasaye vandi mba. Mbana amageri ku yavo avandunyira kandi ku visukululwi viavo kuduuka ku likula lia kavaga kuduuka ni lia kane.

⁶ Navuzwa ndolekizaa uvuyanzi vwange ku zielefu zia makura aga yavo avanyanzaa nokolonda amalago gange.

⁷ “Mutatumikiri lieta liange vuzwa mba, kigira Inzi, Yahova Nyasaye winyu, ndahaana amageri ku mundu woosi utumikira lieta liange vudamanu.

⁸ “Mwizurizi lidiku lie Lisabato nukulilinda kuva litakatifu.

⁹ Muveeye na madiku sita gokokolera mu miyinzi jinyu josi,

¹⁰ navuzwa lidiku lia saba liveeye lidiku lio kososa liviikiywi halovega kigira inzi. Ku lidiku yilio mundu kali mulala atakola miyinzi mba, muve munyi anoho avana vinyu, vatugwa vinyu mba, kali mitugu jinyu mba, anoho kali avamenya vamenyi mu kivala chienyu mba.

¹¹ Ku madiku sita Inzi, Yahova, ndalomba lirova, ni ligulu, zinyanza, kandi vindu viosi viveeye mulio, navuzwa kulidiku lia saba ndaasosa. Yiki nicho chagira inzi, Yahova, ningaasiza lisabato nindikola litakatifu.

¹² “Muhaane luyali ku vababa vinyu va vamama vinyu, kunangwa muduuki komenya ing'inga indambi mukivala chamuhezaa.

¹³ “Mutiita mba.

¹⁴ “Mutaheya mba.

¹⁵ “Mutiiva mba.

¹⁶ “Mutagina avatende vinyu mba.

¹⁷ “Mundu ategomba inyumba yu mutende mba; atakayirwa mukali weve mba, anoho mutugwa muyaayi anoho mukaana weve mba, anoho eng'ombe, nisukili mba anoho kilala ku viosi viaveeye navio mba.”

Vuti vwa Vandu

¹⁸ Lwa avandu vahulira muliviti gwinguba ni kisiriva nivikuba, nizimbeni nizihemahemaa kandi kiguru nikivuyaa mwochi, vaadegera nuvuti nivasingila ihale.

¹⁹ Vavoolera Musa, “Niiva ulamoloma ku kunyi, kulahuliriza; navuzwa koveeye nuvuti ndi niiva Nyasaye alamoloma ku kunyi kulakuza.”

²⁰ Musa yavativulira navoora, “Mutatia mba; Nyasaye umali kuuza kumugeriza nukumukola muzizagiliri kumuhulira, kunangwa muvuli kokora uvwoni.”

²¹ Navuzwa avandu vazizagiliraa kusingila ihale, na Musa yeng'ine yisunda ahimbi ku lilesi limwamu, aha Nyasaye yaali.

Amalago kigira uvwali

²² Yahova yalaga Musa avolere vandu va Isiraeli: “Munyi mumali kolola kuli Inzi Yahova umali komoloma ku munyi kutura mwigulu.

²³ Mutelombera avanyasaye vi izahabu anoho vizifeza vave viukusigamirwa komeeda ku inzi mba.

²⁴ Munombere uvwali vwamarova, na muhaaniri ku visiuviliru via amagondi ni zing'ombe kuva ivihaanwa viu kusambwa kandi kuli vihaanwa vie mirembe. Havundu hoosi hamutovolera kusigamira, ndaaza ku munyi nukumugaasiza.

²⁵ Niiva mulanombera uvwali vwiligina, mutumbakira magina ga vaazwa mba, kigira nimutumikira kivia chukuvaaza magina, mulagononyia kuvutumikiri vwange.

²⁶ Mutanyumbakili vwali voveeye ku ni vika viukuninira ku mba; niiva mulakola ndio, chahonyo chienyu kilaloleka lwa muva nimuniinaa igulu ku vika.