Kutwula 2 - KITABU KITAKATIFU

Livulwa lia Musa

¹ Kunangwa mu ing'inga yeyo mundu kutura mu ihiiri ya Levi yaleeta mukali kutura mu Ihiiri yeeye.

² Mukali oyo yavereka niyivura umwana muyaayi. Lwa yalora ndi mwana uyu aveeye wi ligondo lilahi, yamuvisa ku lwi mieli jivaga.

³ Navuzwa lwa yaali sianyala ku muvisa kandi mba, yamunavira kihinda cha mafunzu navaka ku iramu kunangwa amazi gavuli kwingira mu, ma naviika mu umwana, nakiviika mu lifunzu halujinga lwu mugera.

⁴ Mbozo mwana oyo yasingira ihale, alole ni kindiki kinyala kwekoleka kuye.

⁵ Mukaana wu Mwami yasulunguta kuzia ku mugera kwisinga, na vakana vatumikiri veve vagendagenda kundulu kwu mugera. Ahene yaho mukaana wu mwami oyo yalora kihinda mumafunzu amatambi ma natuma mukaana mutumikiri weve kuzia ku kivugula.

⁶ Mukaana wu Mwami yakikunula yalora mwana muyaayi. Mwana yaali nalira, naye yamuvererera, yavoola, “Uyu ni mulala ku avana va Avaheburaina.”

⁷ Maku mbozo weve yamuteeva, “Nyara kuzia kulanga mukali mu Heburaina akunyunyili nokokolelera mwana oyo?”

⁸ Mukaana wu Mwami yamutivulira, “Mwaza zia umuleete.” Kunangwa mukaana yazia naleta mama wu mwana uyu.

⁹ Mukaana wu Mwami yavolera mukali oyo ndi, “Vugula mwana uyu uzie kunyunyira, na ndakutunga.” Kunangwa mukali yavugula mwana nazia kumulinda.

¹⁰ Inyima wu mwana yaali niyakaviruka, mukali oyo yamuleta. Yamwiranyia ku mukaana wu Mwami. Yamuvugula kuva kuli umwana weve mwene. Na yavoola, “Ndamugulika Musa, kigira ndaamutuliza mu mazi.”

Musa yirukira Midiani

¹¹ Lwa Musa yaali niyakaviruka, yatura nazia kogendelera avandu veve, Avaheburaina. Yalora kuli vadambizwa nokokolizwa miyinzi midinyu. Kali Musa yalora Umwegebeti niyiita Umuheburaina, uwaali mulala ku avandu vi hiiri ya Musa.

¹² Musa yahenza yiyi na yiyi kandi lwa yavula kolola mundu naamulora, yakuya niyiita Umwegebeti, naamuvisa mumuyeke.

¹³ Lidiku liakaviri, lwa yirana yalora avasaza vaviri ava Heburaina nivakubanaa. Yavolera waali mutindi, “Kigira ki ukuya Umuheburaina wacho?”

¹⁴ Mundu zana yativura, “Nivwaha wakokola kuva mwamihi nu mukalagi ku kunyi? Wenyaa kunzita kuli wita Umwegebeti?” Na Musa yatia navoora, “Ng'ani makuva yaga gamanyikani ligali.”

¹⁵ Lwu Mwami yahulira makuva yaga, yenya kwita Musa. Navuzwa Musa yiruka kutura imbiri wu Mwami nazia komenya mu kivala cha Midiani, na lidiku lilala yazia kwikala ha kidaho.

¹⁶ Musaalisi wa Midiani, Jezero, yaali na avakaana saba vaza kudaha amazi nivizuliza miliinga ja vanwehiziraaku mitugu ja baba wavo.

¹⁷ Navuzwa avayi vaza ni vakunga avakaana va Jezero. Maku Musa yazia kuvasoora naavakonya kudahira mitugu jaavo amazi.

¹⁸ Lwa virana yengo, baba wavo Jezero, yavateva, “Kigira ki mwilani vwangu kalunu?”

¹⁹ Navo vaativura, “Umwegebeti akosoye kutura ku vayi kali naakudahila amazi kandi naanwehiza mitugu jietu.”

²⁰ Jezero yateeva avakaana veve, “Aveeye hayi? Kigira ki nimuleka mundu uyu ichova? Mulangi yaaze kulia chukulia harara nikunyi.”

²¹ Kunangwa Musa yavugilira komenya yo, na Jezero yaaha Musa mukaana weve Zibora kuva mukali weve,

²² uwamwivulira mwana muyaayi. Musa yevoolera mwene ndi, “Ndamugulika Gerishomu, kigira mbeeye mugeni mu kivala kinu.”

²³ Inyima wimihiga yijo josi, mwami wa Egebeti yakuza, navuzwa vandu va Isiraeli vaali nivakekenya ligali kigira uvusaaliri vwavo mu vutugwa, nivenya vokonyi. Lilira liavo liadukira Nyasaye;

²⁴ uwahulira likenya liavo ma niyizuliza lilagana lilie lia yalomba na Aburahamu, Isaka na Yakobo.

²⁵ Nyasaye yalora linyang'ana lia vandu va Isiraeli mu vutugwa kandi yavahendera mwoyo.