Kutwula 19 - KITABU KITAKATIFU

Avandu va Isiraeli ha Kiguru cha Sinai

¹ Avandu va Isiraeli vaatura Refidimu, na kulidiku liu kutanga liu mweli gwakavaga nivakamara kutura Egebeti vaza mu changalangwi cha Sinai.

² Lwa vaali nivakatula Refidimu, viingira mu changalangwi cha Sinai nivalomba hokososa himbi ni kiguru,

³ Musa yanigira ku kiguru ukwagana na Nyasaye. Yahova yalanga Musa kutura mu kiguru namuvolera avolere avandu va Isiraeli visukululwi via Yakobo ndi:

⁴ “Mwalora aga inzi, Yahova ndaakola ku vandu va Egebeti na kuli ndamuginga kuli kihungu kigingiraa viminyu viacho ku zimbaha ziacho, kandi nimuleeta hano ku inzi.

⁵ Kalunu, niiva mulambulira ligali nokolonda lilaga liange, mulava avandu vange. Lirova liosi liveeye liange, navuzwa munyi mulava avandu vatovole vange,

⁶ avandu vaveeye avatakatifu vange, na mulandumikira kuli avasaalisi.”

⁷ Maku Musa yasulunguta kutura mu kiguru naalanga aviimiliri va avandu harara navavoolera vindu viosi via Yahova yamulaga.

⁸ Maku avandu vosi vativura harara nivavoora, “Kunyi kulakola vindu viosi via Yahova amali kovora,” kunangwa Musa yirana ku kiguru navolera Yahova amakuva goosi aga avandu vaali nivavooye.

⁹ Yahova yavolera Musa, “Ndaza ku ivi mu lilesi liliduhu, kunangwa avandu valahulira nimolomaa nivi na valakusuuvira kutura kalunu nu ukuzizagilira.” Musa yavolera Yahova amakuva ga avandu vaali nivamutivuliyi.

¹⁰ Yahova yamuvolera, “Zia ku avandu yavo uvavoolere vahonge kalunu na mugamba niviitakasa ku lisigamira. Kuduuka vafuyi zinguvu ziavo

¹¹ kandi vetegekere lidiku likora kavaga. Ku lidiku liene yilio, Inzi ndiika kukiguru cha Sinai, aha avandu vosi vanyara kondola.

¹² Lombera avandu zinzako ku zimbega ziosi zie kiguru, avandu vavuli kuvita, kandi uvavoolere vatazia mukigulu anoho kwisuunda ahimbi kucho mba. Niiva mundu vosi aviikaa ekelenge chiche ku kiguru aliitwa,

¹³ kuduuka alaswe na magina anoho nimivano juvuta, vugira mundu woosi kumudiira. Yaga galava ku avandu kandi ku zinyama; kuduuka viitwi ligali. Navuzwa lwi kisiriva kikubwa, aheene yaho avandu valanigila ku kiguru.”

¹⁴ Maku Musa yasulunguta kutura mu kiguru kuzia ku vandu navavoolera, vetegeke kusigamira Yahova, kunangwa vafuuya zinguvu ziavo.

¹⁵ Kandi Musa yavavolera, “Mwetegekere lidiku lia gavaga kutura kalunu kandi mutava harara nu mukali ku ing'inga yeyo mba.”

¹⁶ Kunangwa lidiku likora kavaga inyinga yu mugamba haali ho nilihirigana lienguba kandi loheni, ililesi liliduhu lialoleka ku kiguru, nu umwoyo munene ligali gwikisiliva gwahulirika. Avandu vosi avaari hokososa vaadegera nuvuti.

¹⁷ Musa yaavimilira kutura hokososa kuzia kwagana na Nyasaye, kandi vasingira hi kiguru kitangiraa.

¹⁸ Kiguru cha Sinai choosi chizula umwochi, kigira Yahova yaali niyiiki hasi ku cho mu muliru. Mwochi gwaazia igulu kuli mwochi gwi kisambiru kenene, na avandu vosi vaadegera ligali.

¹⁹ Umwoyo gwikisiliva gwamedeka ligali. Musa yaazizagilira komoloma, na Nyasaye yamutivulira nu mwoyo gwe munene kuli gwinguba.

²⁰ Yahova yasulunguta kutura kondongozi kwi kiguru cha Sinai, naalanga Musa kuzia kondongozi kwi kiguru. Musa yanigira mu kiguru

²¹ kandi Yahova yamuvolera, “Yika hasi wiganihizi avandu vatavita ulwaako vaze kombenza mba; niiva valakola ndio, avanyingi kuvo valakuza.

²² Kali avasaalisi avaazaa ahimbi ku inzi kuduuka vitakase, gase ndavaha amageri.”

²³ Musa yavolera Yahova, “Avandu sivanyala kwisuunda ahimbi kukiguru cha Sinai mba, kigira wakwiganihiza kolole kiguru yiki kuva kitakatifu kandi kolombe zinzako kukikumberiza.”

²⁴ Yahova yativura, “Yika hasi uvuguli Haruni, wirane naye. Navuzwa avasaalisi na avandu vatavita ulwako kuuza ku inzi mba, gase ndavaha mageri.”

²⁵ Maku Musa yasulunguta nazia ku avandu navavoolera aga Yahova yaali navooye.