Kutwula 17 - KITABU KITAKATIFU

Amazi kutura ku lwanda

¹ Avandu vosi va Isiraeli vaatura mu changalangwi cha Sini, nivageenda kutura havundu harara kuduuka ahandi kuli Yahova yavalaga. Valomba lisosa liavo ha Refidimu, navuzwa sihaali ho na amazi gukunwa mba.

² Kunangwa avandu vililira ku Musa ni vavoola, “Okohe amazi kunwi.” Musa yavativulira, “Kigira ki munyi mudulaa? Kigira ki mugerizaa Yahova?”

³ Navuzwa avandu vaali nuvuluhu vwa mazi ligali kandi vazizagilira kwililira ku Musa nivamudula. Vavoola, “Kigira ki ivi nukutuliza Egebeti, kukwita harara, na vana viitu kandi ni mitugu jietu nuvuluhu?”

⁴ Musa yasaala nu mwoyo gwosi ku Yahova navoora, “Nyara kokolera ki avandu yava? Vaveeye ahimbi kundasa na magina.”

⁵ Yahova yavolera Musa, “Vugula valala ku aviimiliri va Isiraeli harara niivi, na muzie imbiri wa vandu. Vugula imbimbu yawakuyira ku mugera gwa Naili uzie nayo.

⁶ Inzi ndasingira imbiri woovo ku lwanda ha Kiguru cha Sinai. Uduyi kulwanda zana, na amazi galasinuka kulwo ma avandu vanwi.” Musa yakola ndio imbiri wa aviimiliri va Isiraeli.

⁷ Havundu hazana halangwa Maasa na Meriba, kigira avandu va Isiraeli vililira kandi vageriza Yahova lwa vateva, “Yahova aveeye nikunyi anoho mba?”

Uvulwani na vandu va Maleki

⁸ Avandu va Maleki vaza nivingilira kulwaana avandu va Isiraeli ha Refidimu.

⁹ Musa yavolera Joshua, “Tovola vasaza valala vazie kulwaana vandu va Maleki mugamba. Inzi nasingili kondogozi kwi kiguru ningumiyi imbimbu ya Nyasaye yambolera ng'ingi.”

¹⁰ Joshua yakola kuli Musa yaali naamulagi ma yaziia kulwana avandu vamaleki, na Musa, Haruni na Huru vazia kondongozi kwi kiguru.

¹¹ Lwa Musa yaginga amakono geege igulu, vandu va Isiraeli vaguuta, navuzwa lwa yikizaa amakono hasi, vandu va Maleki vatanga kuguuta.

¹² Lwa makono ga Musa galuhaa, Haruni na Huri vamuletera ligina yikare ku, navo nivasingiyi mulala kolovega lulala na wundi kolovega Lundi kudinyiriza amakono geege kusingira kuduuka lwi liuva liayera.

¹³ Munzira yiyi Joshua yalwana ligali vandu va Maleki ni kivavi, kuduuka navaguuta ligali.

¹⁴ Maku Yahova yavolera Musa, “Ng'oda amakuva gi liguuta yili kunangwa galizurizwi. Volera Joshua ndi ndadiviza vandu va Maleki ligali.”

¹⁵ Musa yumbaka uvwali, navulanga lieta “Yahova aveeye ebendera yange.”

¹⁶ Yavoola, “Mugiingi igulu ligali ebendera ya Yahova! Yahova alazizagilira kumulwaanira avandu va Maleki ku makura na makura.”