Kutwula 16 - KITABU KITAKATIFU

Yahova Yahaana ku Vandu Imaana ni Zisindu

¹ Avandu va Isiraeli vosi vaatura Elimu, na ku lidiku liakomi natano liu mweli gwa kaviri nivamali kutura Egebeti, vaza mu changalangwi cha Sini, ekeveeye hagati ha Elimu na Sinai.

² Mu changalangwi mwene yimwo, vosi vililira ku Musa na Haruni

³ ni vavavolera, “Vwali vove vulahi Yahova alakwitira mu Egebeti. Uwene yeyo kwaali kwakikaaye hasi nukulia zinyama ni viukulia vindi vinyingi. Navuzwa munyi mukoleti mu changalangwi yiki kwosi kukuziri mu ninzara?”

⁴ Yahova yavolera Musa, “Henza, kalunu nziza kumuletera viukulia kutura mwigulu kuli imbura. Avandu kuduuka vatuli ichova vuli lidiku kuvungiza viukulia viduukana nilidiku yilio. Mu liiva yili ndavageriza ndore niiva valalonda amalago gange.

⁵ Ku lidiku lia sita valavugula viukulia haali kaviri kuvita via kazozo nukuvilomba.”

⁶ Kunangwa Musa na Haruni vavoolera avandu va Isiraeli; “Mugolova gwa kalunu munyi mulamanya ndi ninzi Yahova wamutuliza mu kivala cha Egebeti.

⁷ Mugambazuri mulalora vukumi vwa Yahova. Kigira umali kuhulira lielilira lienyu; yee, mumuhing'anaa, kigira kunyi kolondaa nokokola vuzwa amalago geege.”

⁸ Maku Musa yavoola, “Ni Yahova ulimuha inyama ya mulia hamugorova kandi migadi josi kuli mwenya lidiku lia mugamba, kigira umali kuhulira lielilira lienyu. Lwa mwiliriraa ku kunyi, mwiliriraa ku Yahova.”

⁹ Musa yavolera Haruni, “Volera avandu vosi va Isiraeli vaze kusingira imbiri wa Yahova, kigira umali kuhulira lielilira liavo.”

¹⁰ Lwa Haruni yamoloma kulivugana liosi lia avandu va Isiraeli, vagirung'ana nivahenza mu changalangwi, kandi uvukumi vwa Yahova vwaloleka mu malesi.

¹¹ Yahova yavolera Musa,

¹² “Mali kuhulira lielilira lia avandu va Isiraeli. Vavoolere ndi hamugorova, liuva niliyeraa, valalia inyama na mugambazuri valanyora migadi josi ja venya. Maku valamanya ndi, Inzi Yahova, mbeeye Nyasaye wavo.”

¹³ Kunangwa ing'inga ya hamugorova zisindu zinyingi ziaza nizigwa kali zikunika ahokososa haavo hoosi, na mugambazuri lime liali linyingi nilikumberiza hokososa haavo.

¹⁴ Lwi lime liali niliakakamuluka, haali ho nikindu keng'erere kuli mugadi muhuhu ku changalangwi.

¹⁵ Lwa vandu va Isiraeli vakelora, sivakimanya mba, na vateevana aveene na aveene, “Ni kindu ki yiki?” Musa yavavolera, “Yiki keveeye chukulia cha Yahova amali kuhana ku munyi mulie.

¹⁶ Yahova umali kulaga ndi sa mulala ku munyi avungizi vinyingi kuli ayaanza, na mulavugula vigero viviri kutura ku vandu vinyumba ya vuli mulala oveeye nayo.”

¹⁷ Avandu va Isiraeli vaakora ndio, valala vavungiza vinyingi navandi vikekeke.

¹⁸ Lwa vakegera, yavo avavungiza vinyingi sivali nivinyingi mba, kandi yavo avavungiza vikekeke sivali navio vikekeke mba. Vuli mundu yaali navungizi via yaduukanaa navio.

¹⁹ Musa yavavolera, “Mundu woosi ataleka ku kitigale kuduuka mugamba mba.”

²⁰ Navuzwa valala kuvo sivenya kuhulira Musa mba na vaviika vilala ku kedonye. Mugamba gwalonda ku zing'ende ziali ni zizura mu nivifunya vugundu, na Musa yaali nu vutima navo.

²¹ Vuli mugambazuri vuli mundu yavungiza kuli ivia yenya; lwi liuva liaka, iviatigala kumalova viakamuluka.

²² Lidiku lia sita vavungiza viukulia haali kaviri kuvita, vuli mundu yadoola kegero chi zilita zine. Aviimiliri vosi va avandu vaza nivavolera Musa amakuva goosi;

²³ naye yavavolera, “Yahova umali kulaga ndi, mugamba ni lidiku litakatifu liokososa, liviikiywi halovega kigira ye. Mwuminyi kalunu cha mwenya kwuminya kandi mudeeke cha mwenya kodeka. Choosi ikitigala kiviikwi halovega kuduuka mugamba.”

²⁴ Vaviika chatigara kuduuka lidiku lialonda ku, kuli Musa yaali nalagi, si choneka mba kandi zing'ende siziali mu mba.

²⁵ Musa yavoola, “Mulie lidiku linu, kigira kalunu ni lisabato, lidiku lio kososa liviikiywi ku Yahova, kandi simulanyora viukulia kutura ichova wi lihema mba.

²⁶ Gamuduukira muvungizi iviukulia viduuka amadiku sita, navuzwa ku lidiku lia saba, liveeye liokososa, sihalava ho nikindu mba.”

²⁷ Kulidiku lia saba avandu valala akuvo vazia ichova kuvungiza viukulia, navuzwa sivavinyoola mba.

²⁸ Maku Yahova yavolera Musa, “Avandu munyi mulasuura kugumira amalago gange kuduuka ng'inga ki?

²⁹ Mwizurizi ndi Inzi, Yahova mali kuhaana ku munyi lidiku liokososa, na nicho kigira ku lidiku lia sita ndamuha iviukulia vimuduuka ku madiku gaviri. Kunangwa mundu woosi alava vuzwa ahaveeye kulidiku lia saba vugira kutura hango hehe.”

³⁰ Kunangwa avandu vasoosa kokora miyinzi kulidiku lia saba.

³¹ Avandu va Isiraeli valanga chukulia zana mana. Chafwanana kuli uvuguza vokekeeke uvulavu, vwali kuli visikuti vialombwa nu vwuki.

³² Musa yavoola, “Yahova umali kukulaga kuviiki ku kegero kilala chi mana, engekeeke ivikirwi visukululwi vietu, kunangwa valaduuki kolola viukulia via yakuha kulie mu changalangwi ulwayakutuliza mu kivala cha Egebeti.”

³³ Musa yavolera Haruni, “Vugula isiongo na uviiki mu zilita ziviri ziemaana, na ugiviki imbiri wa Yahova ivikirwi visukululwi vietu.”

³⁴ Kuli Yahova yalaga Musa, Haruni yagiviika imbiri wilisandugu lia malago, ku iduuki kuvikwa.

³⁵ Avandu va Isiraeli valia imaana ku mihiga arubaini, kuduuka lwa vaduuka mu kivala cha Kanaani wa vamenya.

³⁶ Ligera zana liadukanaa no voleng'ani vwi zilita silini.