Kutwula 15 - KITABU KITAKATIFU

Lwimbu lwa Musa

¹ Maku Musa na avandu va Isiraeli vimbira Yahova ulwimbu yilu: “Ndimbira Yahova, kigira umali kuguuta liguuta liu vukumi: Umali kusiuva zibarasi harara navahili vazio munyanza.

² Yahova aveeye mukingi wange wi zinguru; niyie yenyine umali kombonyia. Aveeye Nyasaye wange, nainzi ndamwizominya, aveeye Nyasaye wa vaguuga vange, kandi ndimba kigira ovonene vwivwe

³ Yahova aveeye wuvulwaani; Lieta lilie ni Yahova.

⁴ “Yasiuva liihi lia vandu va Egebeti kandi magare gi liihi gaavo munyanza. Aviimiliri valio avalahi ligali vasiuvwa munyanza Inzakanyu

⁵ Inyanza yululiva yaavakunika; viiyina kuduuka kulwaalo hasi munyanza kuli ligina.

⁶ “Mukono gugwo mulungi, O, Yahova, goveeye nizinguru. Guvunaganyia avasigu mu vidonye.

⁷ Mu vonene vwu vukumi vuvwo, waguuta avasigu vovo, uvutima vuvwo vwaka kandi vuvasambaa kuli uluvuva.

⁸ Wahuuza kunyanza, na amazi gavunga igulu ligali; gasingira igulu vulungi kuli lidigi; ululiva lwu musi ligali lwinyanza lwagwa ludinyu.

⁹ Musigu yavoola, ‘Ndavalonderera na ndavagumira, ndagavulanyia vutugi vwavo nu kuvugura viosi viavaveeye navio.’

¹⁰ Navuzwa mwika mulala kutura ku ivi Yahova, na vandu va Egebeti vakunikwa na amazi; viiyina kuli lisasi mu amazi manene gukutihiza.

¹¹ “O, Yahova, nivwaha munyasaye oveeye kuli yivi? Nivwaha oveeye kuli ivi, wokogenyia mutakatifu? Nivwaha unyala kokora vilolekizu iviokogenyia ni vinene kuli vivio?

¹² Wanyiira mukono gugwo mulungi. Kandi lirova liamira avasigu viitu.

¹³ Kuli oveeye musuvirifu ku lisuuviriza, wimilira avandu vovo va wavahonyia kuzinguru zizio wavimilira kuduuka mu kivala kitakatifu.

¹⁴ Zihiiri zimali kuhulira, kandi zidegera nuvuti; avandu va Filisitia vaveeye nuvuti vonene ligali.

¹⁵ Aviimiliri va Edomu vadegeliziywi. Avasaza vizingulu va Moabu vadegera; avandu va Kanaani vagotizi vuluviliri vwavo.

¹⁶ Litihiza nu vuti vonene viduuki kuvo. Valora zinguru zizio, O, Yahova, kandi vaasingiyi no vodedekere kandi nuvuti kuduuka lwa avandu vovo vaambuka, avandu vawavoholola kutura mu vutugwa.

¹⁷ Ivi wavaleeta kandi wavaviika ku kiguru chicho, ha vundu ha ivi, O, Yahova, umali kotovola kuva hango hoho, litembeli lia ivi mwene umali kwumbaka.

¹⁸ Ivi, Yahova, ulava Mwami mihiga ni mihiga.”

Lwimbu lwa Miriamu

¹⁹ Avandu va Isiraeli vagenda kuvitira munyanza ku lirova liumu. Navuzwa lwa magare ga vandu va Egebeti harara nizibarasi ziavo kandi navahili vazio vazia munyanza; Yahova yiranyia amazi ni gavakunika.

²⁰ Muporofeti Miriamu, mbozo Haruni, yavugula vikuli mu mukono gwigwe, na avakali vosi vaamulonda, nivakuba vikuli nivavina.

²¹ Miriamu yaavimbira: “Mwimbiri Yahova, kigira uguuti liguuta liu uvukumi; umali kusiuva zibarasi harara na vahiri vazio munyanza.”

Amazi Malulu

²² Maku Musa yimilira avandu va Isiraeli kutura kunyanza Nzakanyu nivingira mu changalangwi cha Shuri. Ku madiku gavaga vagenda kuvitira mu changalangwi, navuzwa sivanyoola amazi mba.

²³ Maku vaduuka ha vundu halangwa Mara, amazi gaali ho amalulu ligali kali sivali vanyara kuganwa mba. Yicho nicho chagira ni halangwa Mara.

²⁴ Avandu vililira ku Musa nivateeva, “Kulanwa ki?”

²⁵ Musa yasaala niligoonya ku Yahova, na Yahova yamumanyia kedonye chu musaala, ichayalasa mu mazi; na amazi gagwa amalahi gukunwa. Hene yaho, Yahova yavaha amalago gokomenyera, kandi yaavageliza.

²⁶ Yavoola, “Niiva mulahulira ligali mwoyo gwange, inzi Yahova Nyasaye winyu ku likora agaveeye malungi imbiri wange nukulinda amalago gange, sindamuha amageri ni zinguzu zia ndaleta ku vandu va Egebeti mba. Inzi mbeeye Yahova muhonyi winyu.”

²⁷ Maku, vaduuka ha Elimu, ahaali nividaho likomi na viviri kandi misaala ja amakindu sabwini; ahene yaho valomba hokososa himbi na mazi.