Kutwula 14 - KITABU KITAKATIFU

Liambuka Inyanza Nzakanyu

¹ Maku, Yahova yavolera Musa,

² “Volera avandu va Isiraeli viirane valombe hokososa imbiri wa Pihahirozi, hagati ha Migidoli ninyanza Inzakanyu, ahimbi Baali Zefoni.

³ Mwami alaganagana ndi, ‘Avandu va Isiraeli vavodong'anaa mu kivala, na vigaliiywi nichangalangwi.’

⁴ Ndadinyia mwoyo gwigwe naye alamulonderera; Lwa akola ndio, kandi liguuta liange ku Mwami harara ni liihi lilie lilakahaane ku inzi luyali. Maku avandu va Egebeti valakamanye inzi mbeeye Yahova.” Avandu va Isiraeli vaakora kuli Musa yavavolera.

⁵ Lwu Mwami wa Egebeti yavolerwa ndi avandu va Isiraeli vamali kwiluka, oyo harara na vatumikiri veve vagirung'anyia zing'anagani ziavo ni vavoola, “Kokoli kindiki yiki? Kumali koleka vandu va Isiraeli viiruki, kandi kumali kuvagotiza kuli avatugwa viitu!”

⁶ Mwami yetegekiza ligare lilie liu vulwani kandi liihi lilie.

⁷ Yavugula magare gi liihi malahi ligali, 600 harara na magare gandi goosi gu vulwani ga Egebeti nigimiliywi na vimiliri vaavo.

⁸ Yahova yadinyia mwoyo gwu Mwami, nalonderera vandu va Isiraeli, avaari nivaturaa Egebeti kuli avaguuti.

⁹ Liihi lia avandu va Egebeti harara ni zibarasi ziosi, amagare gu vulwani, kandi avahili vago, vavalondelera nivavanyoola aha vaali nivalombi ahokososa kunyanza Inzakanyu, ahimbi Pi Hahirozi kandi Baali Zefoni.

¹⁰ Lwa avandu va Isiraeli valora Mwami wa Egebeti harara niliihi linene lilie nivaazaa kuvo, vaadegera ligali nivaanira ku Yahova nu mwoyo gwosi avakonye.

¹¹ Vavoolera Musa, “Gaveeye kigira vilindwa sivialiho mu Egebeti? Wakoleta hano kukuziri mwigendanyama? Nikindiki cha ive umali kokokolera yiki mulikutuliza mu Egebeti!

¹² Si kwakovolera nikukiri kutura mu Egebeti ndi, yaga galekoleka? Kunyi kwakovoolera ndi okoleke kwenyine kandi oleke kuzizagiliri kuva avatugwa va vandu va Egebeti. Gakaveeye amalahi kunyi kuva kuli avatugwa va vandu va Egebeti kuvita kukuzira hano mwigendanyama.”

¹³ Musa yavativulira navoora, “Mutatia mba! Musingiri vudinyu, na mulalora icha Yahova akolaa kumuhonyia: lidiku linu simulalola vandu va Egebeti yava kandi mba.

¹⁴ Yahova alamulwaanira, na icha mukora vuzwa nu kuchiring'ana.”

¹⁵ Yahova yavolera Musa, “Kigira ki mwaniraa munyore ovokonyi? Volera avandu vazizagiliri nologendo.

¹⁶ Ginga imbimbu yooyo igulu ogesone kunyanza. Amazi galaavukana, na vandu va Isiraeli valagenda kuvitira munyanza ku lirova liumu.

¹⁷ Ndakora vandu va Egebeti vadinye mioyo jaavo navo vingiri munyanza kuvalondelera inyima wavo, kandi ndanyoora uluyali ku vuguuti vwange ku Mwami, liihi lilie, magare geege gu vulwani, kandi avahili vi zibarasi veve.

¹⁸ Lwambaguuta, avandu va Egebeti valamanya ndi Inzi mbeeye Yahova.”

¹⁹ Engelosi wa Nyasaye, uwaali imbiri wa avandu va Isiraeli, yatura yo niyiirana inyima wavo. Munara gwi lilesi gwisuunda kuduuka lwa gwaali

²⁰ hagati ha vandu va Egebeti na Isiraeli, navuzwa nilihaana uvulavu ku avandu va Isiraeli, kunangwa amahi sigali ganyala kuva himbi nagandi goosi vudiku vwosi mba.

²¹ Musa yanyira mukono gwigwe kunyanza, kandi Yahova yakola inyanza niyiirana inyima harara ni imbuza enene yikivihiri kutura Ivugwi. Yahuuza uvudiku vwosi ma nigirung'anyia inyanza kugwa lirova liumu. Amazi gavukana,

²² kandi vandu va Isiraeli vavitira munyanza ku lirova liumu, harara na madigi ga amazi ku zimbega ziombi.

²³ Avandu va Egebeti vavalondelera kandi ni vingira munyanza kuvalondelera mu harara ni zibarasi ziavo, magare gaavo gu vulwani, kandi vahiri vi zibarasi vosi.

²⁴ Kunangwa mumavwevwe Yahova yahenza hasi kutura mumunaara gwu muliru kandi gwa malesi ku liihi lia vandu va Egebeti naavagoyanyia ligali.

²⁵ Yakola magurudumu gamagaare gaavo nigahanda, kunangwa gagendaa nuvudinyu. Avandu va Egebeti vavoola, “Yahova alwaaniraa vandu va Isiraeli! Gendi kwiluki kutuli hano imbiri wa vandu va Isiraeli.”

²⁶ Yahova yavolera Musa, “Nyira mukono gugwo kunyanza, na amazi galiirana ku vandu va Egebeti na magare gaavo guvulwani navahili vizibarasi vaavo.”

²⁷ Kunangwa Musa yanyira mukono gwigwe kunyanza, lwu mugamba gwaduuka amazi girana kuva kuli kazozo. Avandu va Egebeti vaageriza kwiluka kutura mumazi, navuzwa Yahova yavatuula vosi munyanza.

²⁸ Amazi girana nigakunika amagare gu vulwani, navahili vi zibarasi harara niliihi liosi lia vandu va Egebeti iliali nililondeleye avandu va Isiraeli munyanza; kali mulala kuvo siyatigala mba.

²⁹ Navuzwa vandu va Isiraeli vagenda munyanza ku lirova iliumu, harara na madigi ga mazi ku zimbega ziombi.

³⁰ Lidiku yilio Yahova yahonyia avandu va Isiraeli kutura ku vandu va Egebeti, na avandu va Isiraeli vavalora nivaveeye avakuzu kulujinga lwinyanza.

³¹ Lwa vandu va Isiraeli valora zinguru zinene zia Yahova yaguutira vandu va Egebeti, vaatia ligali, kandi vaali nilisuvira mu Yahova kandi mu mutumikiri weve Musa.