Kutwula 13 - KITABU KITAKATIFU

Kuhaana ku Yahova Chukutanga Kwivulwa

¹ Yahova yavolera Musa,

² “Uhaane ku inzi, Yahova vana vayaayi uvukutanga kwivulwa, kandi mitugu jukutanga kwivulwa. Muyaayi woosi wivulwa kutanga mu Egebeti kandi mutugu gwosi musaza gwivulwa kutanga, viosi viveeye viange.”

Lisavo liu Mugadi gutaveeye na Mamera

³ Musa yavolera avandu, “Mwizurizi lidiku yili lia mwatula mu Egebeti, wa mwaali avatugwa. Yili nilidiku lia Yahova yaamutuliza yo nizinguru zizie zinene. Mutalia mugadi gwa mamera mba.

⁴ Muturaa mu Egebeti lidiku yili mu mweli gwukutanga, mweli gwa Abibu.

⁵ Yahova yasuuviriza ku liesuuha avaguuga vinyu kuha munyi kivala cha vandu va Kanaani, Mori, Hiti, Muhivi, kandi na Jebusi. Lwa amuleeta mukivala chu vutugi, kandi kenoru, kuduuka kenoru, mulindi nukwizuliza lidiku lie Lipasaka ku mweli gwukutanga vuli muhiga.

⁶ Ku madiku saba mulalia mugadi gutaveeye mu na mamera na kulidiku likora saba lilava lisavo liu kuhaana luyali ku Yahova.

⁷ Ku madiku saba mutalia ku mugadi gwosi ugwa zuganywa mu mamera mba, kandi amamera gataloleka ku hoosi mukivala chiinyu mba.

⁸ Lwi lidiku linene lie Lisavo litangaa, muliivalira avayaayi vinyu ndi mukoraa yaga goosi kigira aga Yahova yamukolera lwa mwatula mu Egebeti.

⁹ Yiki kilava kuli kelolero ku makono ginyu, kandi kuli lizuliza mu zimoni zienyu. Muzizagiliri kovora lilago lia Yahova, nukulisoma kigira umali kumutuliza mu Egebeti ni zinguru zizie zinene.

¹⁰ Mulasangalira lisavo yili vuli muhiga ing'inga idukanaa.

Viukutanga kwivulwa

¹¹ “Yahova alakamuleete mu kivala cha vandu va Kanaani, icha yisuhira munyi na avaguuga vinyu. Lwa akihaana ku munyi,

¹² kuduuka muhaane vuli kindu ikisaaza chukutanga kwivulwa ku Yahova. Vuli chukutanga kwivulwa keveeye cha Yahova,

¹³ navuzwa gamudukira mwilane kugura kutura kuye ibunda isaza yukutanga kwivulwa mu lihaana kihanwa che kememe chi ligondi mu vogono vwayo. Niiva siwenya kwirana kugura ibunda zana, uvunanyie ligoti liayo. Kuduuka wirane kugura mwana wowo muyaayi wukutanga kwivulwa.

¹⁴ Mu zing'inga ziza, lwu muyaayi wowo alikoteeva icha makuva yaga gavoora, ulamutivulira ndi, ‘Yahova yatumikira zinguru zizie zinene kukutuliza mu kivala cha Egebeti, havundu ha kwaali avatugwa.

¹⁵ Lwu mwami wa Egebeti yadinyia mwoyo nasuura kukuleka kuzie, Yahova yita vindu visaza viosi chukutanga kwivulwa mu kivala cha Egebeti, viombi avandu kandi mitugu. Yiki nicho kigira nikuhaana kisiuviriru ku Yahova chu mutugu musaza gwu kutanga kwivulwa, navuzwa ukwirana kugura avana vayaayi viitu avukutanga kwivulwa.

¹⁶ Lilinda lilaga yili lilava chukwizuliziraku kuli kindu kevoheeywi ku makono giitu anoho ku vweni vwitu; kilakakwizulizi ndi, Yahova yakutuliza Egebeti kuzinguru zizie zinene.’ ”

Munara gwa malesi kandi munara gwu muliru

¹⁷ Lwu Mwami wa Egebeti yaleka avandu vazie, Nyasaye siyavaleka vaziiri kunzira iyavitira ku lujinga lwinyanza kuduuka Filisitia mba, kali niiva yaali inzira inyimbi ligali ku ziosi. Nyasaye yaganagana ndi, “Inzi sindakenyi avandu vagirung'anyie zing'anagani ziavo nukwirana Egebeti mba, lwa valora ndi vazizaa kulwaana.”

¹⁸ Mu vogono yivwo, yaavahilira munzira evodong'ana kuvitira mwigendanyama nivahenzi munzira izizaa kunyanza Inzakanyu. Avandu va Isiraeli vaali ni vetegeki ku liihi.

¹⁹ Musa yazia nu muviri gwa Josefu, kuli Josefu yaali niyavoolera avandu va Isiraeli vakole kolondekana ni lilagano lie liesuuha. Josefu yaali niyavoola, “Lwa Nyasaye amusoola, kuduuka muvuguli muviri gwange kutura havundu hano.”

²⁰ Avandu va Isiraeli vaatura Sukozi ni vazia kososera ha Ezamu kundulu kwi ligendanyama.

²¹ Mbasu Yahova yimira imbiri wavo nu munara gwa malesi kuvamanyia inzira, na ing'inga yu vudiku yimira imbiri wavo nu munara gwu muliru ukuvaha uvulavu, kunangwa vaduuki kogenda mbasu nu vudiku.

²² Munara gwa malesi gwaali vuli kazozo imbiri wa avandu ing'inga yoosi mbasu, kandi munara gwu muliru ing'inga yu vudiku.