Kutwula 11 - KITABU KITAKATIFU

Likuza lia avana vayaayi vukutanga kwivulwa

¹ Maku Yahova yavolera Musa, “Inzi ndatuma ku Mwami wa Egebeti na avandu veve iliduywa lindi lilala. Inyima walio, alamuleka muzie. Ligali alamukunga mwosi muturi hano.

² Kalunu omolome ku avandu va Isiraeli kandi uvavoolere vosi vasave avatende vaavo iviju viefeza ni vie izahabu.”

³ Yahova yakola vandu va Egebeti kuhaana ku vandu va Isiraeli uluyali. Mugiligali, vatumikiri vu Mwami na avandu vosi valora Musa kuva mundu munene ligali.

⁴ Musa yavolera Mwami, “Yahova avoora, ‘Vudiku hagati ndavitira mu Egebeti;

⁵ na vuli umwana muyaayi uwimbiri mu livulwa alakuza, kutura ku mwana muyaayi wu Mwami ulikala kondeve yu vwami, kali kuduuka ku wumukali mutugwa usiezaa kulugina. Kandi viukutanga kwivulwa viosi vie mitugu vilakuza.

⁶ Lilava ho lilira linene mu kivala choosi cha Egebeti, iliavula kuva ku ho kandi Lilivula kuva ku ho kandi mba.

⁷ Navuzwa kali imbwa silalokera mundu wa Isiraeli anoho mutugu mba. Maku mulamanya ndi Inzi, Yahova, nombaa liavukanyia hagati ha vandu va Egebeti na vandu va Isiraeli.’ ”

⁸ Musa yamaliriza ku livoora ndi, “Avatumikiri vovo vosi valakaze kwinama imbiri wange, na valakandeve mbuguli avandu vange vosi nu kuzia navo. Inyima wayaga ndakatuli.” Maku mu vutima vonene Musa yatura ku Mwami.

⁹ Yahova yaali navoleeye Musa, “Mwami alazizagilira kuvula kumuhulira, kunangwa nduuki komeeda kokora vilolekizu vindi vinyingi mu Egebeti.”

¹⁰ Musa na Haruni vaakora vilolekizu yivi viosi imbiri wu Mwami navuzwa Yahova yamudinyia umwoyo gwigwe na siyenya koleka vandu va Isiraeli kutura mu kivala chiche mba.