Kutwula 10 - KITABU KITAKATIFU

Amaduywa gi Zisigi

¹ Maku Yahova yavolera Musa, “Zia olole Mwami kigira mali kumukola oyo harara na vatumikiri veve kudinyia mioyo jaavo, nduuki kokora vilolekizu hagati haavo,

² kandi munyi muladuuki kovoolera avana vinyu kandi visukululwi vienyu kuli ndakora vandu va Egebeti kololeka avasiru ulwandaakola vilolekizu hagati haavo. Na munyi mwosi mulamanya inzi mbeeye Yahova.”

³ Kunangwa Musa na Haruni vazia ku Mwami nivavoora, “Yahova, Nyasaye wa Avaheburaina, avoora, ‘Ulasuula kwegehiza ku inzi kuduuka ng'inga ki? Leka avandu vange vazie kunangwa, vaduuki kusigamira.

⁴ Niiva uzizagilira kusuura, ndaleta izisigi mu kivala chicho mugamba.

⁵ Zilava zinyingi ligali kali zilakunika lirova liosi. Zilalia vuli kindu choosi chimbula yamagina yavula kwononyia, kandi zilalia misaala josi ijaamera mu milimi.

⁶ Ziliizula munyumba yu vwami yooyo kandi mu zinyumba ziavatumikiri vovo vosi kandi ku avandu vovo vosi. Zilava zindamanu ligali kuvita kindu choosi cha avaguuga vinyu vavura kololaku.’ ” Maku Musa yatura hu Mwami yaali.

⁷ Avatumikiri vu Mwami vamuvolera, “Mundu uyu alakukubiza kivi kuduuka ng'inga ki? Leka avandu va Isiraeli vazie, vaduuki kusigamira Yahova, Nyasaye wavo. Ukikiri kumanya ndi Egebeti imali kudiva?”

⁸ Kunangwa Musa na Haruni vilanywa kandi ku Mwami, navavoolera, “Munyala kuzia na musigamiri Yahova, Nyasaye winyu. Navuzwa nivwaha avazizaa?”

⁹ Musa yativura, “Kunyi kwosi kulazia, harara na avana viitu avayaayi na vakana, zimburi na magondi, ni zing'ombe kali na vasakulu viitu, kigira gakuduukiraa kolombere Yahova lisavo.”

¹⁰ Mwami yavoola, “Inzi nzisuha ligali ku Yahova ndi sindaleka munyi muvuguli avakali na avana vinyu vazie mba! Galoleka havulavu ndi munyi muganaganaa kokora ikivihiri.

¹¹ Awa! Avandu vasaza veng'ine vanyara kuzia kusigamira Yahova niiva nigo agamwenyaa.” Harara nagene yago, Musa na Haruni vakuungwa kutura imbiri wu Mwami.

¹² Maku Yahova yavolera Musa, “Ginga mukono gugwo ku kivala cha Egebeti koleta zisigi. Zilaza na zilie vuli kindu choosi kemeraa mu mulimi, kali kindu choosi chatigara lwimbula yamagina yakuba.”

¹³ Kunangwa Musa yaginga imbimbu yeeye igulu ku kivala cha Egebeti, na Yahova yaleeta imbuza yu kudiviza kutura Ivugwi nihuza ku kivala umbasu gwosi nu vudiku vwosi. Nivuchezaa mu mavwevwe imbuza yeyo yaleeta zisigi.

¹⁴ Zisigi ziaza muvunyingi nizigwa kukivala choosi cha Egebeti. Ziali zisigi zinyingi ligali zikikiri kololeka ku, kandi izilivula kololeka ku kivala mba.

¹⁵ Ziakunika ikivala choosi nikigwa ikisundi; zialia ikindu choosi cha magina gimbula gaaleka, harara ni misaala ja makuyu josi kali matu sigatigala ku mu kivala cha Egebeti mba.

¹⁶ Maku, Mwami yalanga Musa na Haruni vwangu navoora, “Ndaamara kwona ku Yahova Nyasaye winyu kandi ku munyi.

¹⁷ Kunangwa kalunu mwaza musamiihi uvwoni vwange ing'inga ndala vuzwa kandi musaale ku Yahova Nyasaye winyu atulizi mageri gi likuza yili ku inzi.”

¹⁸ Musa yaleka Mwami nasaara ku Yahova.

¹⁹ Yahova yaagirung'anyia imbuza enene yivugwi niitula imadioli nihuza zisigi ziosi nukuzihira mu inyanza Inzakanyu. Isigi kali indala siyatigala mu kivala choosi cha Egebeti mba.

²⁰ Navuzwa Yahova yadinyia umwoyo gwu Mwami, kandi siyaleka vandu va Isiraeli vazie mba.

Amaduywa gi Kisundi

²¹ Kunangwa Yahova yavolera Musa, “Ginga mukono gugwo mwigulu, ni kisundi kenene chu kutihiza kiduuki kukunika kivala choosi cha Egebeti.”

²² Musa yaginga mukono gwigwe mwigulu, na chaali ho kisundi kenene mu Egebeti mwosi ku lwa madiku gavaga.

²³ Avandu va Egebeti sivali vanyara kolola avache mba, mundu kali mulala siyatula munyumba yeeye ing'inga yeyo mba. Navuzwa vandu va Isiraeli vaali nuvulavu aha vamenya.

²⁴ Mwami yalanga Musa navoora, “Munyala kuzia kusigamira Yahova; kali avakali vinyu kandi na avana vanyara kuzia nimunyi. Navuzwa zing'ombe, magondi ni zimburi zienyu vilatigala hano.”

²⁵ Musa yativura, “Maku gakuduukiraa okohe mitugu jukuhaanira Yahova Nyasaye wiitu kuli vihaanwa ni zisadaka ziu kusambwa.

²⁶ Awa, kulavugula mitugu jietu harara nikunyi; kali mulala sigulatigala inyima mba. Kunyi aveene kulatovola jakunyala kutumikira ku lisigamira Yahova, Nyasaye wiitu. Lwa kuduuka yo, sikunyala kumanya ni mitugu ki jakulimuhaanira mba.”

²⁷ Yahova yadinyia mwoyo gwu Mwami, na siyaavaleka vazie mba.

²⁸ Yavolera Musa, “Tula imbiri wange! Utangola ndore ivi kandi mba! Lidiku liandikolola, ulakakuzi!”

²⁹ Musa yamutivulira navoora, “Ivi oveeye vulahi, siulandola kandi mba.”