Kutwula 1 - KITABU KITAKATIFU

Avandu va Egebeti vadambiza vandu va Isiraeli

¹ Avayaayi va Yakobo avaazia Egebeti harara naye, sa mulala na avinyumba yeeye vaali:

² Rubeni, Simioni, Levi, Yuda,

³ Isakari, Zabuloni, Benjamini,

⁴ Dani, Nafutali, Gadi na Asheri.

⁵ Visukululwi via Yakobo viosi vaali 70; Muyaayi weve Josefu yaali naveeye mu Egebeti.

⁶ Inyima Josefu yakuza na avamwavo veve vosi, na vilikula yilio liosi.

⁷ Navuzwa vandu va Isiraeli viivulana nivagwa avanyingi ligali, kandi vizingulu ligali ma niviizura mu kivala cha Egebeti.

⁸ Maku mwami muhia yavikwa mu Egebeti, uwavula kumanya Josefu.

⁹ Yavolera avandu veve, “Heenzi, avandu va Isiraeli vaveeye avanyingi ligali kandi avizingulu kukuvita na vakutihizi kunyi.

¹⁰ Niiva vulwani vulakwingila, valahambana navasigu viitu vakulwaane ma viiruki kutura mu kivala chiitu. Gakuduukiraa konyoole inzira yukuvigalira vavuli komeedeka.”

¹¹ Kunangwa vandu va Egebeti vaviika vimiliri valulu kusaliriza vandu va Isiraeli ni miyinzi midinyu. Avandu va Isiraeli vumbakira Mwami amadara manene ga Pitihomu na Ramesesi gatumiki kuli havundu hi videera vwu mwami.

¹² Navuzwa kali niiva vandu va Egebeti vameeda kudambiza vandu va Isiraeli, nilwo lwa vandu va Isiraeli vameedeka kuva vanyingi mu kivala. Kunangwa vandu va Egebeti vaatia vandu va Isiraeli ligali.

¹³ Kunangwa vandu va Egebeti vaakora avandu va Isiraeli kuyinzira kuli avatugwa nu vululu ligali.

¹⁴ Valomba limenya liavo kuva liuvuzuunu muliyinzira miyinzi midinyu, jokolonga madafari govodohi ni miyinzi jie zing'ano ziosi ju mumilimi jaavo vugira kuvavererera.

¹⁵ Maku mwami wa Egebeti yavolera Shifura na Pua vakonyeleri vukwivuliza vaviri avakonyaa avakali va Avaheburaina ndi,

¹⁶ “Lwa mukonyaa avakali Vaheburaina, nivanyoora avana, niiva aliivula mwana muyaayi, mumwiti, naveeye mukaana, muleke ave mwoyo.”

¹⁷ Navuzwa vakonyeleri yavo vaatia Nyasaye, na sivakora kuli mwami wa Egebeti yavalaga vakole mba; navuzwa valeka avana vayaayi nivava mwoyo.

¹⁸ Kunangwa mwami yalanga vakonyeleri yavo, navavoolera, “Kigira ki mukoraa kuli ndi? Kigira ki mulekaa avana vayaayi nivava mwoyo?”

¹⁹ Avakonyeleri vukwivuliza yavo vaativura, “Avakali va Avaheburaina sivaveeye kuli avakali va Egebeti mba yavo vivulaa vugira vudinyu kandi imbiri wa kunyi vakonyeleri vu kwivuliza yava kukikiri kuduuka kuvo.”

²⁰ Kigira vakonyeleri vaavo vaatia Nyasaye, yavagasiza, kandi na avandu vameedeka nivagwa avizingulu ligali.

²¹ Na gaali, kigira vakonyeleri yava vaatia Nyasaye, yavaha lwivulu.

²² Maku Mwami yalaga avandu veve vosi, navavoolera, “Vuli mwana muyaayi Muheburaina wivulwa kuduuka asiuvwi mu mugera gwa Naili, navuzwa muleke avana vakana vave mwoyo.”